Dojjecho 1 - Kafa Linguistics Project

Bulli Mooyo Duubo Tuno

¹ Yerusaalem taateti, Daawitichi bushoo tuneti dojjechochi qaaro ebine.

² Dojjecho ishichiye: “Duubo, duubo, duubeexi duubo, bulli mooyo duuboone” iye.

³ Asho hini showee toommoochaa bi aajjiibeeti aayoochee, bi danemmi gaaco amoone?

⁴ Shiijjeroo beshehe; shiijjeroo kereehe; tunebaani showoo bulli yemeenoon bi arooch beehe.

⁵ Aabe kechahan; giyaanoo iyan; bi kecheti xaaꞌooch wotteya afaafinahan.

⁶ Yongo deshi-waan yongehe; dambi-waanoo guuddiye; guuddii guuddiꞌi bi xaaꞌooch hammiye.

⁷ Aacinaꞌo bulli baharooch wocciyeete; tunebaani baharo ciroona ceenaache; aacinaꞌo boonoshi waati xaaꞌooch, wochinnoon arooch wotteheete.

⁸ Mooyo bulli shewiitone; asho yibbaatetaa ciyaanoone. Aafo ciinnii miyaache; waamo waayee ceenaache.

⁹ Ebiyee aaf tuneti mooyo wochinnoon tune beeyemmone; ebiyee aaf shuuneeti mooyo wochinnoon shuunee beeyemmone; hini showee toommooch andire mooyo amolla aalloone.

¹⁰ “Hini andire mooyone” getteyemmi amee mooyolla aalloone; ebi aroo noyee aaf wonna beetone.

¹¹ Aafi shiijjereenaꞌon shalligemmo aalloone; gubbi shiijjereenaꞌoo boonoshiyee gubb woyemmi shiijjereenaꞌona shalligeyaachemminaꞌone.

Beemoochee Daneti Ariyoo

¹² Dojjechi ta, Yerusaalem beechaa Israꞌeelee showooch taateho.

¹³ Showee toommooch shuuneebeeti mooyo bullin shalligoona qaawaa haattoyich ta mulloon qanniiho. Ebi, ashi bushiisheenaꞌo aajjemmoyich Yeeri immiti magge shuunoone.

¹⁴ Hini showee toommo bulliich shuuneebeeti shuunoo bullin ciinneho; bulliyona duuboone; yongoon yookkii dabboommone.

¹⁵ Wuuqqeeto kaamoon hakkaache; aalli mooyoo haddeyoon hakkaache.

¹⁶ Tawoo ta mulloona, “Tayee aaf Yerusaalemin qeejjitinaꞌo bulliyee shalligoona beshito taane; ariyoonaa shalligoona amo gaata ariito taane” iyo.

¹⁷ Ebich shalligoon, geyoonaa tuushoonon ariyoyich ta mulloon qanniiho. Ebiyoo wotta yongoon yookkii dabboommo bi tunoon shalligiyo.

¹⁸ Shalligoo woddegaata gaabboo woddehe; ariyoo woddegaata ayinoo woddehe.