Daaneeli 9 - Kafa Linguistics Project

Daaneeli Bi Asheenaꞌoyich Corootoo

¹ Yekisesichi bushoo, Meedee asho Daariyoosi Baabloonee showooch taateꞌi bi beehooba,

² bi taateti ikkinnee natooba, ta, Daaneeli, Yaafe Macaafoon shemmaabee, Yerusaalemi happeeree shabe naton yagemmi bi tunoon Doono Yeeri keemechi Erimiyaasina bi gettiti qaaroon shalligiyo.

³ Ebich dookoon tahaa, tullee toommooch kotaꞌa, coomii, corootii, qollaabee ta aafoon ta Doono, ta Nuggishoo waan wochiyo.

⁴ Ta Nuggishoo Doono Yeer waan no axaaxoon aanniibee corootiyo. Tawoo ishichiyo: “Ta Doonocho, oogoonaa shattiitona tuneti Nuggishoo neene. Neen shunnii, ne getoon ceechii beetinaꞌoyich kuxeyaani ne shunoon bekkiibeeto, ne wogoyichoo gibeneeto neene.

⁵ No, axaaxoon shuuneto noone; xumme mooyon shuuneto noone; gonde mooyon tuniito noone; hukkoonoo shuuneto noone; ne getoonaa ne doyoonoochee gubb wotteto noone.

⁶ No taateenaꞌoyich, no iraasheenaꞌoyich, no qaabbechinaꞌonaa no showee asheenaꞌo bullinoyich ne guuninaꞌo tuneti keemechinaꞌo ne shigoona boonoshi gettiton waayeyaano noone.

⁷ “Ta Doonocho, ne, cadiqo neene. Tunebaani no hanaach yeelleto noone. Ebiyoo Yihudee asheenaꞌonaa Yerusaalem beeti asheenaꞌona, katinoonaa wohonooch boonoshin ne shacceti showoo bulliich beeti Israꞌeelee asho no bulliyoo neech gibeneeto tunoon no qajjetoyichiye.

⁸ Doono Yeero, noonnaa no taateenaꞌona, no iraasheenaꞌonaa no qaabbechinaꞌona ne toommooch axaaxoon shuunoona neen no xuqqetoyich, yeelleto noone.

⁹ No Doono no Nuggishoocho, ne toommooch hukkoon shuuneto no tunetaanoona, ne, ariqqechonaa maarechona neene.

¹⁰ No Nuggishoo Doono Yeero, neech deꞌa getaano noone; ne guuninaꞌo tuneti keemechinaꞌo kishoona nooch ne immeti ne sheeroon quyeyaano noone.

¹¹ Israꞌeelee asho bulli ne sheeroon shaaddetone; ne gettetonoo waayeyaache iꞌi gubb wottetone. “Ne toommooch axaaxoon no shuunetoyich, ne guuno Muusichi Sheerooch kooreeti ufon no toommooch kindiihine.

¹² Magge naxoon deebaꞌa noonnaa noon qeejjii beetinaꞌonochi toommooch ‘Tuniyemmo taane’ ne iti mooyon ceechihine. Yerusaalemi toommooch tunetoommi mooyo hini showee toommo bulliich beeti katemeenaꞌo toommooch ciroona tuneyaanoone.

¹³ Muusichi Sheerooch bi kooreetoommon, ebi bulli naxo no toommooch shaggiye; tunebaani axaaxoon shuunoon qajjaa, iberoo tuneti ne qaaroon waayaꞌa, no Nuggishoo Doono Yeeri ne waanee maaroon qaawaano noone.

¹⁴ Ebich no Nuggishoo Doono Yeero, naxoon no toommooch qanniiꞌa deebehine. Ebin ne tuniito, ne getteton deꞌa iyaꞌa waayo no qajjetoyichiye; wottoo ne tuniibeeti mooyo bullina cadiqo ne tunetoyichiye.

¹⁵ “Andoo, ne asheenaꞌon ooge giidoona Gibitsee kichaꞌa, hanaach beddaahaa ne shigo shalligee bi beeyemmoyich tuniiti no Doono, no Nuggishoocho, no, axaaxoon shuuneto noone; gonde mooyon tuniito noone.

¹⁶ No axaaxee naboonaa no qaabbechinaꞌochi xuꞌee naboona no guudoona beeti bare yoodee asheenaꞌo ne katemoo Yerusaaleminaa ne asheenaꞌonon qallayitinaꞌone. Ta Doonocho, ebich ebiyee aaf ne shuuneti cadiqee shuunoommoona, ne yaafee geppoo tuneti Yerusaalemi toommoochee ne kaaroon wochibe!

¹⁷ “Illa and no Nuggishoocho, ne guuno ta qolloonaa ta corootoonon waayebe! Ta Doonocho, ne shigoyicha getiree, ebi happeeti ne yaafee kexo waan ne aafoon guudiiree ciine!

¹⁸ Ta Nuggishoocho, ne waamon gaꞌiiree waayebe; ne aafoon gaxxiree no xuuxoonaa ne shigo beeti katemoonon ciine. Ebi qolloon ne aafooch no giddiibeeto, cadiqo no tunetoyich tuneyaanoon, ne maaree woddoyichiye.

¹⁹ Ta Doonocho, no qolloon waayebe! Ta Doonocho, noon maaribe! Ta Doonocho, no qolloon elle waayeree tuniibe! Ne shigo ne katemoonaa ne asheenaꞌonochi toommoochaa ceekketone. Ta Nuggishoocho, ne shigoyicha getiree yagiyaahine” iyo.

Maraakoo Gabreeli Keemoon Biichiꞌi Geto

²⁰ Tawoo corootii ta beetaa, ta axaaxoonaa ta asheenaꞌo tuneti Israꞌeeleenaꞌo axaaxoonon aannii ta beetaa, bi yaafe geppoochon ta Nuggishoo Doono Yeerin qollaabee

²¹ corootii ta beetaa, yaaꞌoona shiichaꞌa ta beeggeti, Gabreeli, womikkee deejjoo giddeebeeti saatooch afaafinee yoobbiibee ta waan waahe.

²² Biyoo ishichiꞌi taach biichii gettiye: “Daaneelo, ta and ebi keemoon ne shalligemmoyich neen gaacheya waato taane.

²³ Ne, oogeton shucheto ne tunetoyich, corootooch ne giyiyooba, Yeeri ne qolloon waayetone; tawoo ebin neech getta waato taane. Ebich ebi mooyon gabibe; yaaꞌoonoo shalligibe!

²⁴ “Xuꞌee shuunoon neechoyich, axaaxee shuunoon bayoyich, gonde shuunoon maariyoyich, bulli yemeenee cadiqoonoo deeboyich, yaaꞌoonaa keemoonon hiconaa yaafee kexon huutonoyich, ne asheenaꞌonaa ne yaafe katemeenoyich shabe kaallee shabaatte naton Yeeri maaccitone.

²⁵ “Ebin ariibe; shalligibe! Yerusaalemin andiriyoonaa wochinnoon hagonoyich awaajjo kechitoochee tiijjiꞌi, Huutteto, Taatoo, waammi wottoon, shabaatte kaallee shabaatte nato tunemmone. Aroochee shichaa gutte kaallee shabaatte nati wottoon Yerusaalemi mishigoonaa bi gommona wochinnoon shuuneyemmone; tunebaani ebi bi tunemmo, xuuxee yemeenoochiye.

²⁶ Shichaa gutte kaallee shabaatte natoyee gubb, Huutteton wuxemminaꞌone; amolla biich echeyaachemmone. Woyemmi taatoochi ginee naayinaꞌo are katemoonaa yaafee kexonon aalliyemminaꞌone. Bi ciiroo ambamboochoommon diqqoona woyemmone; Yeeri gettiti ginoonaa aalloona ciirooch beddaahaa tunemmone.

²⁷ Are taatoo meeti aageteenaꞌona tookki shabaatte nati wottoon bi wogoon manjiyemmone. Ebi yemeenee qato shagiyooba, deejjoonaa buuroonon echiyemmone. Aalloon deebemmi eeꞌoon yaafee kechi guummooch bi gedaa, arooch beeyemmone. Ebiyoo arooch bi beeyemmo, aalliyecho toommooch Yeeri gettiti nalloo kindimmi wottooniye” iye.