Daaneeli 8 - Kafa Linguistics Project

Daaneeli Bagee Baaddoonaa Emmishee Baaddoonon Yaaꞌoona Beego

¹ Taatoo Belshasoori taateti keejjinnee natooba, shiichaa ta beeggeti yaaꞌoyee gubb, ta, Daaneeli, bare yaaꞌoon beeggeho.

² Ebi yaaꞌoona ciinneho; ta ciinneto, Elaami woraafooch beeti inde katemoo Suusa ta beemoniye. Ulayi aachi gashooch beeho.

³ Ta aafoon kaachii ciinnaꞌa, gutte genje qarechi bagee baaddoo aachi gaꞌooch neexee beeton beeggeho. Ikke qaro baroyee beshoon genjoone; ebi genjoo gubbiye colleꞌi bi diccito.

⁴ Ebi bagee baaddoo aabi-gimooch, dambi-waaninaa deshi-waaninon guuddiꞌi bi qaroona bi kochii beetaa, beeggeho. Cooxo taane itoochee biin hakkiꞌi wochito aalloone; bi kishoocheenoo wodiyoon hakkito, koniyoona aalloone. Tuniiya bi qaawito bullin tuniihe; giidechonoo tunehe.

⁵ Ebi ta beeggeti mooyon gabii ta beetaa, bi aafee gutte daggooch ikke ooge qaro beeti emmishee baaddoo showee toommona kuxxiꞌi, bi baatoon showooch shakkiyaanoon guufeechii, aabi-gimo waanee waahe.

⁶ Aachi gaꞌooch bi beetaa, ta beeggeti, gutte qarechi bagee baaddoo beeto waan hammiye; bi waanoo oogeti kaaroona wocciye.

⁷ Ebi bagoochi gaꞌooch bi shagon beeggeho. Oogeti ippoona bagoon kochiꞌi, bi gutte qareenaꞌon tiichiye. Biin wochoyich bago hakkoon muccetone; bagoon showooch dichiꞌi neexxiye. Biin ebi emmisho kishoochee wodiyoon hakkito koniyoona aalloone.

⁸ Ebi emmisho oogeti giidechon tunehe. Tunebaani bi giidoo oogee bi beshiyooba, ooge bi qaro tiishehe. Bi xaaꞌoochoo showee awudde kello waan bekkiibeeti, awudde ogooge qareenaꞌo kechiyeete.

⁹ Ebi awudde qareenaꞌo daggoochee ikkoo toommooch ikke giisheche qaro kechiye. Bi giidoo deshi-waan, aabi-keyo waan, Gaawe Showoo waanoo gaminniye.

¹⁰ Biyoo shimaayee ginee naayinaꞌo beetooch beddaahaanona, giidecho tuneꞌi dicciye; ginee naayinaꞌoochee, eboshiyoo dofee xojjeneenaꞌoochee ikkikkeenaꞌon showooch holliiꞌi neexxiye.

¹¹ Shimaayeexi ginee iraashoo tuneti Yeerina tookkii bi tatemmi wottoon bi qelloon oogiihe; Yeerich qemi qemona micciibeeti deejjoon echiihe; yaafee kexonoo eeꞌiihe.

¹² Xuꞌee naboona, Yeerichi asheenaꞌo, qemi qemona micciibeeti deejjoona tookkii biich beshiitaa icheheete. Iberee showooch duppahan. Ebi qaro bi tuniibeeto bulli biich kaamehe.

¹³ Aroochee gutte maraakeenaꞌo yibbaatee beetaa waayeho. Ikkoo ishichiꞌi echehe: “Ebi yaaꞌoona bekketi mooyo tune bi beeyemmo, aati wottooniye? Ebi ciigiiti axaaxoo qemi qemona micciibeeti deejjoon keriree bi beeyemmo, aati wottooniye? Yaafee kexonaa Yeerichi asheenaꞌona neeche beeyemmo, aati wottooniye?” iye.

¹⁴ Baroo ishichiꞌi wochii bi beetaa waayeho; “Gutte humaa keejje balle womikkoonaa maaddoonooch beddaahaa yagemmone. Aroochee yaafee kexo wochinnoon xallemmone” iye.

Maraakoo Gabreeli Yaaꞌoon Biichiꞌi Geto

¹⁵ Ta, Daaneeli, ebi yaaꞌoon ta beegiyooba, ama geto gaata shalligoyich qaawiyo; bekkech ashoon shaahoo ta aafooch neexee beeton beeggeho.

¹⁶ Ulayi aachi gutte gaagemee daggoochee, “Gabreelo, ebi uroyich yaaꞌoo ama geto gaata biishi gete” iꞌi cookiibeeti ashi qaaroon waayeho.

¹⁷ Aroochee Gabreeli waaꞌi ta gaꞌooch neexehe; tawoo oogeton keqqaꞌa baroona showooch guufeho. Biyoo taach ishichiye: “Ashi bushoocho, ebi yaaꞌoo yemeenee ciireechon bekkiibeeto bi tunoon shalligibe” iye.

¹⁸ Ebin taach bi gettii beetaa, are ta guufetoochaa kashoon tuushiyo. Tunebaani bi taan yechii tiijjiꞌi, ta baatoona ta neexemmoyich tuniihe.

¹⁹ Biyoo ishichiye: “Tawoo gubb, Yeerichi kaaree shiixxoo kindiyooba, ciiroochaa tunemmi mooyon neech gettemmo taane. Ebi yaaꞌoo bekkii bi beeto, Yeeri tuniiya gabiti, yemeenee ciirooba tunemmi mooyoniye.

²⁰ Ebi ne beeggeti, gutte qarechi bagee baaddoo Meedinaa Faariisinochi taateenaꞌoniye bi bekkiibeeto.

²¹ Emmisho bi bekkiibeeto, Giriikee taatoon tunehona, bi aafee gutte daggooch beeti ooge qaro bi bekkiibeeto, shiichi taatemmi taatooniye.

²² Are qaro tiisheechaa kechiti awudde qareenaꞌo bekkiibeeto, are taatittinoochee kechemmi awudde taatittineenaꞌoniye. Eboshiyoo aafi taatittinee giidoona tateyaachemminaꞌone.

²³ “Boonoshi taatittinee ciirooba, asheenaꞌochi axaaxoo oogichi woddemmone; ebiyooba aaf gondoonaa marechona tuneti taatoo taatemmone.

²⁴ Biyoo oogeti giidechon tunemmone; tunebaani bi hajjee giidoona toonoone. Biyoo shattiiti aalliyoon tuniyemmone. Bi tuniibeeto bulliyoo biich kaamemmone; giidechi asheenaꞌonaa yaafeeti asheenaꞌonon aalliyemmone.

²⁵ Marecho bi tunetoyich, acona mooyo biich bi kaamemmoyich tuniyemmone; bi mulloonoo oogichi geecemmone; diqqoona boonoshi beetaa, meeti asheenaꞌon aalliyemmone. Taateenaꞌochi Taatoo toommoochona tiyemmone; tunebaani ashi kishoona tuneyaanoon, biyoo aallemmone.

²⁶ “Ebi neech biishaa getteeti yaaꞌoo, ebiyoo deejjoo giddeyaachemmi womikkeechonaa maaddeechona iberoon ceennemmone. Tunebaani meeti natoyee gubb ceennemmo bi tunetoyich, ebi yaaꞌoon konichona arichiyaahine” iye.

²⁷ Ta, Daaneeli, ta giidoo qayaa, meeti aaboon biiyaꞌa qeyeho. Aroochee ta achooch gaawetaa, tiyaꞌa taatoochi shuunooch wottaa hammeho. Ebi yaaꞌoona keqqito taane; ebi ama geto gaatoo shalligaano taane.