Daaneeli 7 - Kafa Linguistics Project

Awudde Cooxinaꞌon Yaaꞌoona Daaneeli Beego

^1-2 Baabloonee taatoo Belshasoori taateti ikkinnee natooba, ta, Daaneeli, ta qeenooch qeyaabee gumon gummeho; yaaꞌoonoo beeggeho. Ebi ta beeggeti gumi aafechi mooyon ishichaꞌa kooriyoye: Showee awudde kelloona waati shimaajji yongo ooge baharoon bi shuurikkii beetaa, yaaꞌoona xum beeggeho.

³ Baharoochee ikkoo ikkoon shaahaani, baribare awudde cooxinaꞌo kechiyeete.

⁴ Shiichiꞌi kechito daaheroon shaahoone; booyee qoshoommi qoshechone. Ciinnaa ta beetaa, bi qoshoo waaxehe. Ebi cooxon kaama tiijjiꞌi, ashichoommon gutte baatoona bi neexemmoyich tuniiheete. Ashi mulloo biich ichehe.

⁵ Guttinnee cooxo diiboon shaahoone. Biyoo gubbi baatoona neexeechii kaama qaallitone. Bi kookkooch, bi gashee daggooch keejje naabee shaawusho beetone. Biinoo “Tiyiree ne qettee wottoon meenon mame” iyeete.

⁶ Andoo ta ciinnaa beetaa, maahoon shaahiibeeti bare cooxo bekkehe. Bi gubboochoo kafee qoshoommi awudde qoshoo beetone; awudde qello biich beetone. Bi taatemmoyichoo hakkoo biich ichehe.

⁷ Andoo yaaꞌoona xum ta ciinnaa beetaa, awuddinnee cooxo bekkehe. Biyoo oogeti giidechonaa shattii giiriitonane. Ogooge xuuree gashechone; biyoo bi yechiton yiikkee billbillayiꞌi maahe; echetonoo bi baatoona neexxiye. Biyee shiichiꞌi beeti cooxinaꞌo bulliyee baroone; aashire qaro biich beetone.

⁸ Ebi qareenaꞌon manjii ta ciinnaa beetaa, boonoshi daggoochee ikke giisheche qaro kaama diccii bi beetaa beeggeho. Shiichiꞌi beetinaꞌoochee keeminaꞌo bi aafoochee duchoona waaxeheete. Ebi qaroyich ashi aafoommi aafoonaa geecoona yibbaateebeeti noonoona beetone.

Yeerichi Nallee Kindoo

⁹ Andoo ta ciinnaa beetaa, nallechinaꞌo kotemmi qeeninaꞌon geddiyeete; areexi ikkooch Wonnee Wonneecho kotehe. Bi taho nacce kechoommone; bi qelli eexoo haatteeti huuttoommi naccoone. Bi qeeno qaaqqee conjoommo, bi qeeno koteti gengoommi mooyo aaxxeebeeti qaaqqoommone.

¹⁰ Qaaqqoo woce aacochoommon, bi aafoochee kechiꞌi ufee beehe. Hume kaallee humeenaꞌo biich maddee beeheete; aashire hume kaallee aashire humeenaꞌoo bi aafooch neexee beeheete. Nallechinaꞌo nalliya koteꞌi, macaafeenaꞌon gaxxiyeete.

¹¹ Andoo ciinnaabee, ebi giishi qaro yibbaateebeeti geecee yibbaatoon waayeho. Ta ciinnaa beetaa, awuddinnee cooxo guureehe; bi meeshoo qaaqqooch duppeꞌi miccii aallehe.

¹² Echeti bare cooxinaꞌochi taatittinee hakkoo bayaa dekketone. Tunebaani tuneti yemeenee wottoon kashoona boonoshi beeyemmoyich daaggeehe.

¹³ Ebi yaaꞌoona xum ashi bushoon shaahoo shimaayee quboona bi waa beetaa beeggeho. Wonnee Wonneecho waan waahe; biinoo bi aafooch giddiiheete.

¹⁴ Biichoo hakkoo, oogoonaa taatittinoona ichetoyich, ashi yaroo bulliichee, aagetoo bulliichee, asho yibbaateebeeti noonoo bulliicheenoo tuneti asheenaꞌo bulli biich goyinneheete. Bi taatemmo, bulli yemeenooniye; bi taatittinoo besheyaachemmi taatittinoone.

Awudde Cooxinaꞌo Mooyo Biishaa Bi Getteyoo

¹⁵ Ta, Daaneeli, oogeton xuuxeho; ta beeggeti yaaꞌoo taan keqqichiye.

¹⁶ Arooch neexee beetinaꞌoochee ikkoo waan giddaꞌa, ebi bullin biishiree taach bi gettemmoyich echeho. Biyoo ebi mooyon biichiꞌi taach arichiihe. Biyoo ishichiye:

¹⁷ “Ebi awudde ogooge cooxinaꞌo showee toommooch tiyemmi awudde taatittineenaꞌone.

¹⁸ Boonoshiyee gubb Beshoo Yeerichi yaafeenaꞌo ebi taatittinoon deqqemminaꞌone; ebi taatittinoon bulli yemeenoochee bulli yemeenooch beddaahaa yechemminaꞌone” iye.

¹⁹ Aroochee yiikkee billbillayii maati, echetonoo bi baatoona neexxiti, xuuree gashechonaa gooshee gommechona tuneti, bare cooxinaꞌo bulliyeenoo baritonaa oogeton shattiitona tuneti awuddinnee cooxochon xiishoon qaawiyo.

²⁰ Wotta bi qellooch beeti aashire qareenaꞌochonaa gubb kaama dicciꞌi bi aafoochee keejje qareenaꞌo waaxemmoyich tuniiti qaroochonon ariyoyich qaawiyo. Ebi qaroyich ashi aafoommi aafoonaa geecoona yibbaateebeeti noonoona beetone; bareenaꞌoyee beshoonoo tuneꞌi bekketone.

²¹ Ta ciinnaa beetaa, are qaro yaafeenaꞌona koyeꞌi, boonoshin kochii wochiye.

²² Aroochee Wonnee Wonneecho waaꞌi, Beshoo Yeerichi yaafeenaꞌoyich nalliye. Boonoshiyoo taatittinoon boonoshi deqqemmi yemeeno waahe.

²³ Biyoo taach ishichiye: “Ebi awuddinnee cooxo showee toommooch tiyemmi awuddinnee taatittinoone; bare taatittineenaꞌo bulliyee barito tunemmone. Ebi taatittino showoo bullin billbillayi aalliyemmone; neexi buriccemmone.

²⁴ Aashire qareenaꞌo are taatittinoochee tiyemmi aashire taateenaꞌone. Aroochee boonoshiyee bariti, bare taatoo tiyemmone; keejje taateenaꞌonoo giishiyemmone.

²⁵ Beshoo Yeeri toommoochoo geecee yibbaatoon yibbaatemmone; Beshoo Yeerichi yaafeenaꞌonoo duꞌiyemmone; boonoshi baaree aaboonaa boonoshi sheeroonon shaddoyich qiiccemmone. Yaafeenaꞌoo keejje nattaa qati wottoon bi kishooch beshiitaa ichemminaꞌone.

²⁶ “Aroochee shimaajji nallechinaꞌo nalliya kotemminaꞌone. Biyoo bi hakkoon bokkeree ciroona ciirooch beddaahaa aallemmone.

²⁷ Taatittino, hakkoonaa shimaayoyee desh beeti taatittineenaꞌochi oogoona Beshoo Yeerichi asheenaꞌo tuneti yaafeenaꞌoyich ichemmone. Bi taatittino bulli yemeenoon beeyemmi taatittinoone; showee toommooch beeti iraasheenaꞌo biich deꞌa getiree hajjeyemminaꞌone” iye.

²⁸ Gumona ta beeggeti mooyo bulli ebine. Ta, Daaneeli, oogeton keqqiyo; ta halloo shaddeehe. Tunebaani ebi mooyon ta mullooch yechaa beehoye.