Daaneeli 6 - Kafa Linguistics Project

Daahereenaꞌochi Oppooch Daaneeli Duppeyoo

¹ Daariyoosi bi taatetoyee gubb, bi taatee showoo bulliich ukkiremmi, balli hiye iraasheenaꞌon kaacciye.

² Eboshi toommooch keejje asheenaꞌon iraashiihe. Boonoshi daggoochee ikkoo Daaneeline. Taatoo toommooch iritoo shagaachemmoyich, ebi keeminaꞌo iraasheenaꞌochi shuunoon boonoshi ciinnemmoyich tunehe.

³ Daaneeli bariti ayaanoona ceenniti asho bi tunetoyich, biinna tookkii iraasheti iraasheenaꞌonaa bare iraasheenaꞌo bullinoyee besho tuneꞌi bekkehe; taatoo bi taatee showoo bulli toommooch biin iraashiiya gabiye.

⁴ Ebich ebi iraasheenaꞌo Daaneeli shuuneebeeti taatee kexeexi shuunoochee muricoon daneree biin taggeya qaawiyeete; tunebaani Daaneeli gibeneeto, muricoon woyee shappe mooyon tuniyaani asho bi tunetoyich, biin boonoshi taggemmi mooyon mucceheete.

⁵ Ebich ebi asheenaꞌo boonoshinaa boonoshina, “Bi Nuggishoona tookkii yesheti mooyoyee besh hini uroon no taggemmi amee mooyonona danoon hakkaachemmo noone” iyeete.

⁶ Aroochee ebi asheenaꞌo ikkittinoona taatoo waan hammiꞌi ishichiyeete: “Taatoo Daariyooso, hume naton taatebe!

⁷ Taatoocho, hini shaashe qemi daggooch asho koniyoona ne waanee qolloyee besh, nuggishoo waanee woyee ashi waanee amoonolla bi qolleyaachemmoyich, qollemmo bi beegaata, daahereenaꞌochi oppooch bi duppeyemmoyich awaajjoon ne kichiyemmonaa ebi awaajjoon manjoo ne tuniyemmonoyich, iraasheenaꞌo, ukkireenaꞌo, mikkirechinaꞌonaa woraaferasheenaꞌona, ne showoon qeejjiibeeti no bulli echeeto noone.

⁸ Taatoocho, ebi awaajjoon kichi kooriree, ne malletoon arooch gede. Ebina shaddeyaani Meedinaa Faariisinochi showee sheeroochoommon tunemmone” iyeete.

⁹ Ebich taatoo Daariyoosi awaajjee koorichooch bi malletoon geddiye.

¹⁰ Daaneeli ebi awaajjo kooreeti koorichee toommooch malletoo geddeyoon bi ariihooba, bi kexooch hammiꞌi, mallee kello Yerusaalem waan qecheebeeti kechi toommeexi bi kexoochaa, bulli aaboon bi tunii beetoommon, heeyooch keejje wottoon guteneꞌi bi Nuggishoo Yeer waan corootiye; biinoo galletehe.

¹¹ Asheenaꞌo ikkottee hammiꞌi, Daaneeli bi Nuggishoo waan corootii, qollee bi beetaa daneheete.

¹² Boonoshiyoo taatoo waan hammiꞌi, “Taatoocho, shaashe qemi daggooch asho koniyoona ne waanee qolloyee besh, nuggishoo waanee woyee ashi waanee amoonolla qollemmo daahereenaꞌochi oppooch bi duppeyemmoyich, awaajjaa koorichee toommooch ne malletoon gedaano neene?” iꞌi bi kichiti awaajjeechon echeheete. Taatoo wochiꞌi, “Ebi mooyo shaddeyaani, Meedinaa Faariisinochi showee sheeroommon manjoone” iye.

¹³ Boonoshiyoo taatoyich ishichiyeete: “Taatoocho, Yihudee showoochee kecaa waati asheenaꞌo daggoochee ikkoo tuneti Daaneeli, neennaa ne kichiti awaajjoonon mooyooch haddaanoon, heeyooch keejje wottoon bi nuggishoon qollee beetone” iyeete.

¹⁴ Taatoo ebin bi waayehooba, oogeton ayiniye. Daaneelin bi wodiyemmi gommon qaawiya gabiye; biin wodiyoyich aabi gimi wottoon qiiccehe.

¹⁵ Aroochee Daaneelichi shixechinaꞌo wochinnoon taatoo waan ikkottee giddeꞌi biich ishichiyeete: “Taatoocho, Meedinaa Faariisinochi showee sheeree doyoochaa ikke taatoo kichiti awaajjo shaddeyoon hakkaano bi tunoon ariibe” iyeete.

¹⁶ Ebich taatoo Daaneelin daahereenaꞌochi oppooch boonoshi duppemmoyich bi getaa, deebii duppii boonoshi beetaa, taatoo Daaneelich “Bulli aaboon biich ne goyinnaa maddeebeeti ne Nuggishoo neen wodiibe” iye.

¹⁷ Xaqqoon deebiꞌi oppee kelloon keppheheete. Taatoo ebi Daaneeli toommooch tuneti mooyo bi shaddeyaachemmoyich, ebi aree toommooch bi kisheexi axxaamittee maatemoonaa bi iraasheenaꞌo kisheexi axxaamittee maatemoona dukkehe.

¹⁸ Aroochee taatoo wotteꞌi bi taatee kexooch hammiye. Aroobee xum maayoon maataanoon, bi ashittinoonoo emirikkemmi mooyon tuniyaanoon qeyiye. Tokketoo bi aafoochee aallehe.

¹⁹ Showee harooch maaddoona, taatoo tiyiꞌi daahereenaꞌochi oppooch afaafinoona hammiye.

²⁰ Daaneeli beeti oppooch katinnii, ayinee qaaroona Daaneelin ceeggiꞌi, “Beeyechi Nuggishoochi guuno tuneti Daaneelo! Bulli aaboon biich ne goyinnaa maddeebeeti Nuggishoo daahereenaꞌo waanee neen wodiyoon hakkite?” iye.

²¹ Daaneeliyoo ishichiꞌi wochiye: “Taatoocho, hume naton taatebe!

²² Bi aafoochaa xalloo tunaꞌa ta danetoyich, ne aafoochaanoo ta tuniiti xuꞌo aallo bi tunetoyich, ta Nuggishoo bi maraakoon deejjiꞌi daahereenaꞌochi kookkoon bi hiccitoyich, taan amoonolla hallaaneenaꞌone” iye.

²³ Arooba taatoo oogeton emiriꞌi, Daaneelin oppoochee boonoshi kichemmoyich gettiye. Daaneelin oppoochee kichiyeete. Bi Nuggishoon bi gibenetoyich, bi achooch amee mooyolla shagaanoone.

²⁴ Aroochee Daaneelin taggeti asheenaꞌo bullin, boonoshi mecheenaꞌonaa boonoshi bushiisheenaꞌona tookki daahereenaꞌochi oppooch boonoshi duppemmoyich taatoo getaa, deebii duppiyeete. Ebi asheenaꞌo batt oppee dechi duchooch boonoshi shagaan beetaa, daahereenaꞌo yechii, boonoshi shaawushoon tiichiꞌi, billbillayii maaheete.

²⁵ Aroyee gubb, taatoo Daariyoosi showee toommo bulliich beeti, ashi yaroo bulliichee, aagetoo bulliichee, asho yibbaateebeeti noonoo bulliicheenoo tuneti asheenaꞌo bullich ishichiꞌi kooriye: “Diggoo ittoshich tunebe!

²⁶ Ta taatee showoo bullichi daggooch beeti asho bulli Daaneelichi Nuggishoo Yeerin bi shattemmonaa bi oogiyemmonoyich awaajjoon kichito taane. “Biyoo bulli yemeenoon beeti, beeyechi Nuggishoone; bi taatittinoon koniyoona ciroona aalliyoon hakkaanoone; bi hajjiibeetoo ciirooch beddaahaane.

²⁷ Biyoo shiwehe; wodiihe; showoonaa shimaayoonoochaa worganikkiti malletoonaa gaakkechi shuunoonon shuunehe. Daaneelinoo daahereenaꞌo kishoochee wodiitone” iye.

²⁸ Ebich Daaneeli Daariyoosichi taatittinee yemeenooba, Faariisee asho Qiroosichi taatittinee yemeenooboo mooyo biich mashaamaa beehe.