Daaneeli 5 - Kafa Linguistics Project

Daabbooch Kooreeti Mooyo

¹ Taatoo Belshasoori oogeti gifiroon geddiꞌi, ikke hume iraasheenaꞌon ceekkiihe. Biyoo ebi humeenaꞌona tookkii woyinee uyoon uchii beehe.

² Belshasoori uyoon uchiibee, bi nihoo Nabukadinatsori Yerusaalem beeti yaafee kexoochee bi deebiti, aachoonaa birewoonoochee shuuneeti uyee qiiceenaꞌon biich boonoshi deebemmoyich wochehe. Bi wocheto, bi, bi iraasheenaꞌo, bi mecheenaꞌonaa bi naamacheenaꞌona are qiiceenaꞌona uyoon boonoshi uchemmoyichiye.

³ Boonoshiyoo Yerusaalem beeti Yeerichi yaafee kexoochee waati, aachoochee shuuneeti uyee qiiceenaꞌon deebiyeete. Taatoo, bi iraasheenaꞌo, bi mecheenaꞌonaa bi naamacheenaꞌona aroona uchiyeete.

⁴ Woyinee uyoon uchiibee aachoochee, birewoochee, gooshoochee, xuuroochee, mixonaa xaqqoonoochee shuuneeti, nuggisheenaꞌochi misiloon galleteheete.

⁵ Diqqoona areegaata, ashi kishee yaphero bekkeꞌi, maqirajjee aaxxo gaawichiꞌi bekkeebeeti, tachaa dikkeeti taatee kechi daabbooch kooriye. Taatoo ebi kishoon koorii bi beetaa beeggiye.

⁶ Biyoo oogeton keqqiye; bi halloo shaddeehe; bi baatoo qajjiye; bi tingoo qewehe.

⁷ Bi qaaroon oogichiꞌi, kaayechinaꞌon, allaameenaꞌonaa xojjenee hiddechinaꞌonon ceegiree bi waan boonoshi deebemmoyich gettiye. Ebi shalligechi Baabloonee asheenaꞌo waammona, taatoo boonoshich ishichiye: “Ebi kooreeton shemmeꞌi, taach biichii gettimmoyich, damere iddimoon tajjiyemmo taane; aachee zaaboon bi qettooch tippiyemmo taane; ta taatittinee daggoochoo oogoona keejjinnoon tune iraashe hajjemmone” iye.

⁸ Arooba yiiteenaꞌo bulli giyiyeete; tunebaani boonoshi daggoochee ebi kooreeton shemmoon tuneba ebi kooreeti mooyon taatoyich biichii geton hakkito koniyoona aalloone.

⁹ Taatoo Belshasoori beshoon keqqiye; bi halloo daakkiꞌi shaddeehe; bi iraasheenaꞌoo keqqiꞌi boonoshi hallemmon tuushiyeete.

¹⁰ Taatoochi indee taatoonaa bi iraasheenaꞌonochi cookee qaaroon waayaꞌa, ebi gifiroo geddeebeeti kexooch giyahan. Biyoo ishichiyan: “Taatoocho, hume naton taatebe; keqqiyaahine; ne halloo shaddeyaaye.

¹¹ Ne taatee showee daggooch yaafe nuggisheenaꞌochi ayaano bi toommooch beeti ikke uro beetone. Ebi uro, ne nihoo taatittinee yemeenooba, yaaꞌecho, ariyechonaa nuggisheenaꞌochi shalligoommi shalligechona tuneꞌi daneti uroone. Ebich ne nihoo, taatoo Nabukadinatsori biin kaayechinaꞌo toommooch, yiiteenaꞌo toommooch, allaameenaꞌonaa xojjenee hiddechinaꞌonochi toommooch ukkiriihe.

¹² Gumon biichii getoyich, turitoon biishonaa aacheeti mooyon gaxxiꞌi getonoyich bariti hakkoo, ariyoonaa shalligoona Belxesoori iꞌi taatoo ceeggiti ebi Daaneelich beetone. Ebich and Daaneelin ceekkiibe; biyoo ebi kooreeton biishiree neech gettemmone” iyan.

Daaneeli Daabbooch Kooreeton Biichiꞌi Geto

¹³ Daaneelin taatoo waan deebiyeete. Taatoo biich ishichiye: “Taatoo ta nihoo Yihudee showoochee keccii deebiti asheenaꞌo daggoochee ikkoo tuneti Daaneeli neene?

¹⁴ Yaafe nuggisheenaꞌochi ayaano ne toommooch bi beemon, yaaꞌecho, ariyechonaa shalligechona ne tunoonoo waayeto taane.

¹⁵ Ebi kooreeton shemmeree biishi boonoshi gettemmoyich, yiiteenaꞌonaa kaayechinaꞌonon ta waan boonoshi giijjemmoyich tuniito taane. Tunetaa biichiꞌi geton hakkaaneenaꞌone.

¹⁶ Tunebaani ne, biichiꞌi getonaa aacheeti mooyon gaxxiꞌi bekkiyoonon hakkaabeeto ne tunoon waayeto taane. Ebi kooreeton shemmaꞌa biichaa taach ne getigaata, damere iddimoon neech tajjiyemmo taane; aachee zaaboon ne qettooch tippiyemmo taane; ta taatittinee daggoochoo oogoona keejjinnoon tune iraashemmo neene” iye.

¹⁷ Daaneeli taatoyich ishichiꞌi wochiye: “Taatoocho, ebi ne wojjoon neech tuniibe; woyee bare ashich imbe; tunebaani ta ebi kooreeton neech shemmeree biishi gettemmo taane.

¹⁸ “Taatoocho, Beshe Nuggishoo Yeeri ne nihoo Nabukadinatsorin taatiiꞌi, oogoon, giidoonaa oogee yiiroonon biich immitone.

¹⁹ Ebi shaahe oogoon biich bi immitoyich, ashi yaroo bulliichee, aagetoo bulliichee, asho yibbaateebeeti noonoo bulliicheenoo tuneti asheenaꞌo bulli biin shattiꞌi qewetinaꞌone. Wuxiya bi qaawiton wuxii, wodiiya bi qaawitonoo wodii beehe. Oogiiya bi qaawiton oogii, giishiiya bi qaawitonoo giishii beehe.

²⁰ Tunebaani geecechonaa mulli manjoona bi tunehooba, bi taatittinoochee kindiye; bi oogee yiiroonoo muccehe.

²¹ Ashi daggoochee kichaa yookkehe; bi mullo gijjee mullooch shaddeehe. Kubbi kureenaꞌona tookkii beehe; gattoochoommonoo mocoon maahe; bi ashittino shimaayoochee kindiibeeti doshoona shuxxiye. Beshe Nuggishoo Yeeri asheenaꞌochi taatittino bulli toommooch hajjiibeeto bi tunoonaa ebi taatittinoon bi shunnito konichona immiibeeto bi tunoonon ciiroochaa ariihe.

²² “Belshasooro, ne, bi bushoo neene; ebi bullin ariibeeto neene; tunebaani ne qelloon giishiyaano neene.

²³ Ne qelloon shimaajji Nuggishoyee damba tuniyaꞌa, bi yaafee kechi uyee qiiceenaꞌo woyemmoyich tuniihine. Ne, ne iraasheenaꞌo, ne mecheenaꞌonaa ne naamacheenaꞌona aroona woyinee uyoon uchiyote. Uchiibee birewoochee, aachoochee, gooshoochee, xuuroochee, mixonaa xaqqoonoochee shuuneeti, ciinon, waayoonaa ariyoonon hakkaani, nuggisheenaꞌochi misiloon galletehote. Tunebaani ne kashoon, ne shaaddo bullinoo bi kishooch yechiti Nuggishoon oogiyaano neene.

²⁴ Yeeri ebi kooriti kishoon bi deejjito ebichiye.

²⁵ “Ebi kooreeto ishichii beetone: ‘MENE, MENE, TEQEELI, FARISINI’ ii beetone.

²⁶ Ebi geto ishine: ‘MENE’ geto, ‘Yeeri ne taatittinee yemeenoon hadditone; ciiroochoo bechitone’ getone.

²⁷ ‘TEQEELI’ geto, ‘Machoona qocaa kettoo tunaꞌa daneto neene’ getone.

²⁸ ‘FARISINI’ geto, ‘Ne taatittino qoodeete; Meedee asheenaꞌonaa Faariisee asheenaꞌonoyich ichete’ getone” iye.

²⁹ Belshasoori Daaneelich damere iddimoon boonoshi tajjemmonaa aachee zaaboon bi qettooch boonoshi tippemmonoyich, bi asheenaꞌoyich gettiye. Bi taatittinee daggooch oogoona keejjinnoon tuneꞌi bi iraasheechi awaajjoon gettiihe.

³⁰ Aroobee xum Baabloonee taatoo Belshasoorin wuxiyeete.

³¹ Shichaa gutte nati asho tuneti, Meedee asho Daariyoosi bi taatittinoon deqqiye.