Daaneeli 4 - Kafa Linguistics Project

Nabukadinatsori Gummiti Guttinnee Gumo

¹ Ebiyee gubb, taatoo Nabukadinatsori showee toommo bulliich beeti, ashi yaroo bulliichee, aagetoo bulliichee, asho yibbaateebeeti noonoo bulliicheenoo tuneti asheenaꞌo bullich wochoon daachiihe. Diggoo ittoshich tunebe!

² Beshe Nuggishoo Yeeri taach tuniiti worganikkiti malletoonaa gaakkechi shuunoonon ittoshich geto taach gaaweton shaahiꞌi bekketone.

³ Bi tuniiti worganikkiti malletoo am shaahoon oogetone! Bi shuuneti gaakkechi shuunoo am shaahoon giidechone! Bi taatittino bulli yemeenee taatittinoone; bi hajjemmoo, shiijjeroochee shiijjerooch beddaahaane.

⁴ Ta, Nabukadinatsori, bulli mooyo taach mashaamaa, oogeti gaannoona emiriibee, ta taatee kexooch beehoye.

⁵ Tunebaani ikke shattiiti gumon gummoye. Ta qeenooch tokketaa ta beetaa, ta mullo gabiti gaboonaa yaaꞌoona taan keqqichiye.

⁶ Ebich Baabloon beeti yiiteenaꞌo bulli ta waan waaree, ebi gumon biishiree boonoshi gettemmoyich, gettoye.

⁷ Aroochee kaayechinaꞌo, allaameenaꞌo, xojjenee hiddechinaꞌonaa mareccee maaccechinaꞌona waataa, boonoshich ta gumon maaccehoye. Tunebaani ebi gumon biichiꞌi geton mawiiheete.

⁸ Aroyee gubb Belxesoori getaa ta nuggishoochi shigoona ceekkeebeeti Daaneeli giyiꞌi ta aafooch neexehe. Biyoo yaafe nuggisheenaꞌochi ayaano bi toommooch beeti uroone. Ta gumonoo biich maaccoye; tawoo ishichiyoye:

⁹ “Yiiteenaꞌochi ukkiroo tuneti Belxesooro! Yaafe nuggisheenaꞌochi ayaano ne toommooch bi beemonaa aacheeti mooyo bullin ariibeeto ne tunoonon ariibeeto taane. Ta gummeti gumo ebiyoche, taach biishiree gete!

¹⁰ Ta qeenooch tokketaabee yaaꞌoona showee gutte daggooch beeti, ikke ooge genje mixon beeggoye.

¹¹ Ebi mixoo diccii oogee kuppheꞌi, bi cilloo shimaayooch shaggiye; showee tuggooch beddaahaanoo bekkehe.

¹² Ebi mixo gaawe waajjechone; meeti aafoonoo aafetone; bullich bede maayoonoo immii beetone. Kubbi cooxo bi yiirooch kashee beetone; bi qaakkoochoo shimaajji kafoo bi kexon haggitone; kashecho taane ito bulli bi aafoochee maa beehe.

¹³ “Ta qeenooch tokketaabee ta beeggeti yaaꞌoona ikke quyecho tuneti yaafe maraakoo shimaayoochee bi kindii beetaa beeggoye.

¹⁴ Biyoo bi qaaroon oogichiꞌi ishichiye: ‘Ebi mixon qecceree dichibote; bi qaakkoon qendebote; bi waamonoo caabote; bi aafoonoo shacote. Ebin tuniyoona, bi yiirooch beeti cooxinaꞌonaa gijjeenaꞌona, bi qaakkooch beeti yoobbereenaꞌoo shace aallemmoyich tuniibote!

¹⁵ Tunebaani bi xugoon showooch qayote; bi guudoon xuuroonaa gooshoonoochee shuuneeti cuyoona cuyaa mocee daggooch, gaddooch beebe. Ebi uro shimaayoochee kindiibeeti doshoona (caagibanoona) shuxe; gijjoona tookki tuneree mocoon mame.

¹⁶ Shabaatte nato beshemmi wottoon ashi mullo bacheechaa, gijjee mullo biich ichebe!

¹⁷ Ebi manjiti mooyonaa bi toommooch shaggemmi nalloona quyecho tuneti, bi yaafe maraakeenaꞌona getteetone. Ebiyoo Beshoo Yeeri asheenaꞌochi taatittineenaꞌo toommooch hajjiibeeto bi tunoonaa ebi taatittineenaꞌon asheenaꞌo daggoochee boonoshi qelloon giishii beetinaꞌoyich, bi shunnito konichona immiibeeto bi tunoonon, showee toommooch beeti asheenaꞌo bulli ariyemmoyichiye’ iye.

¹⁸ “Ta, taatoo Nabukadinatsori, gummeti gumo ebine. Belxesoor, and illa ne, ebi gumon biishiree taach gete! Ta taatittinee showooch beeti yiiteenaꞌo bulli daggoochee koniyoona biichiꞌi geton hakkito aalloone; tunebaani yaafe nuggisheenaꞌochi ayaano ne toommooch bi beetoyich, ne hakkemmo neene” iyoye.

Gumon Biichiꞌi Daaneeli Geto

¹⁹ Aroochee Belxesoori getteebeeti Daaneeli oogeton keqqiꞌi giisheche wottoon minnakanna gettemmon qajjiye. Taatoo “Belxesooro! Gumo, wotta ebi gumi biishoo neen keqqichaaye” iye. Belxesoori ishichiꞌi wochiye: “Ta doonocho, gumo, wotta bi biishoo neech tuneyaanoon ne shixechinaꞌonaa ne etteenaꞌonoyich tunebe.

²⁰ Ebi ne beeggeti mixo, diccii oogeꞌi bi cilloo shimaayooch shaggito, showee tuggo bulliich beddaahaa bekketo,

²¹ gaawe waajjechonaa meeti aafechona tuneto, bullich bede maayoon immiibeeto, kubbi cooxinaꞌon bi yiirooch kashiito, bi qaakkoochoo shimaajji kafeenaꞌo boonoshi kexon haggito,

²² taatoocho, are mixo geto, neene. Newoo arichetonaa giidechonon tunehine. Ne oogo beshiꞌi shimaayooch shaggiye; ne giidoo showee tuggooch beddiye.

²³ “Taatoocho, ne ‘Mixon qecce dichiree aalliibote; tunebaani bi xugoon showooch qayote; bi guudoon xuuroonaa gooshoonoochee shuuneeti cuyoona cuyaa, mocee daggooch, gaddooch beebe. Shimaayoochee kindiibeeti doshoona (caagibanoona) shuxe. Shabaatte nato beshemmi wottoon kubbi cooxona tookki gaddooch beebe’ iibee shimaayoochee kinditi, quyecho tuneti yaafe maraakoon beeggehine.

²⁴ “Taatoocho, ebi gumi biisho ebine; Beshoo Yeeri taatoo ta doono ne toommooch bi awaajjiti awaajjo ebine:

²⁵ Ashi daggoochee kichaa yookkeree, kubbi cooxona tookki gaddooch beeyemmo neene; gattoochoommonoo mocoon maayemmo neene; ne ashittino shimaayoochee kindiibeeti doshoona shuxxemmone. Aroochee Beshoo Yeeri ashi taatittino bulli toommooch hajjiibeeto bi tunoonaa ebi taatittinoon bi shunnito konichona immiibeeto bi tunoonon ne ariimmi wottoon, shabaatte nato beshemmone.

²⁶ Maraakoo michi xugo showooch bi beeyemmoyich bi geto, hini showoo bullin qeejjiibeeto, shimaayooch beeti Nuggishoo bi tunoon ne ariitoyee gubb, ne taatittino neech wottemmo bi tunooniye bi bekkiibeeto.

²⁷ Illa ebich taatoocho, ta ciicoon waayebe: Axaaxee shuunoon qayiree kaamoo tuneti mooyon tuniibe; gondee shuunoon qayiree xukketinaꞌoyich ariqqebe. Ebin ne tuniitaa, diggoona ne beeyemmi yemeeno diqqich neech daakkeyemmone” iye.

²⁸ Ebi mooyo bulli taatoo Nabukadinatsori toommooch shaggiye.

²⁹ Aaraa gutte ageno beshetoyee gubb, taatoo Baabloon beeti bi taatee kechi toommona shaꞌeebee,

³⁰ ishichiye: “Ebi Baablooni am shaahe ooge katemoo gaata ciinote. Ebi katemoon ooge ta giidoona taatoo beeyi xaaꞌoon tuniyaꞌa ta shuuniito, ta oogee yiiroon bekkiyoyichiye” iye.

³¹ Ebi yibbaatoo batt bi noonoochee kechaahaa, ishichiibeeti qaaro shimaayoochee biich waayeehe: “Taatoo Nabukadinatsoro, ebi neech ta gettaa beeton waayebe: Ne taatittino ne toommoochee shoottetone.

³² Ashi daggoochee kichaa yookkeree, kubbi cooxona tookki gaddooch beeyemmo neene; gattoochoommonoo mocoon maayemmo neene. Beshoo Yeeri ashi taatittino bulli toommooch hajjiibeeto bi tunoonaa ebi taatittinoon bi shunnito konichona immiibeeto bi tunoonon ne ariimmi wottoon, shabaatte nato beshemmone” iye.

³³ Areegaata bekkech Nabukadinatsori toommooch getteeti mooyo ceenniye. Ashi daggoochee kichaa yookkehe; gattoochoommonoo mocoon maahe. Bi ashittino shimaayoochee kindiibeeti doshoona shuxxiye. Bi qelli eexo booyee wulloochoommon oogichiꞌi genjehe; bi gommoo gaceenaꞌochi gommoommon genjehe.

Taatoo Nabukadinatsori Yeerin Galleto

³⁴ Shabaatte nato beshetoyee gubb, ta, Nabukadinatsori, ta aafoon kaachaꞌa damba shimaajj ciinnehoye; ta mulloo yechiye. Beshoo Yeerinoo galletehoye; bulli yemeenoon beeyechoyichoo naadoonaa galletoonon bechiyoye. Biyoo bulli yemeenoon taatemmone; bi taatittino shiijjeroochee shiijjerooch beddaahaane.

³⁵ Showooch beeti asheenaꞌo bulli bi aafoochaa am bedaaneenaꞌone; shimaayooch beeti maraakeenaꞌo toommooch, showooch beeti asheenaꞌo toommoochoo bi shunnimmon tuniihe. Biin bajjemmo, woyee “Ebi ne tuniibeeto, amoone?” gettemmo aalloone.

³⁶ Arooba ta mullo yechiye; ta taatittinee oogee yiiroo, ta oogoonaa ta giidoona taach wottehe. Ta mikkirechinaꞌonaa iraasheenaꞌona taan qaawiyeete. Ta taatittinoochoo wottehoye; aafichoyee beshoon aricheton tunehoye.

³⁷ Shimaajji Taatoo Yeeri bi tuniibeeto bulli tato, bi gommoo cadiqee gommo bi tunetoyich, ta, Nabukadinatsori, biin galletehoye; oogiihoye; naadiyoye. Biyoo geecii beetinaꞌon giishiyoon hakkii beetone.