Daaneeli 11 - Kafa Linguistics Project

¹ “Ta, ta qelloona biin gaachaꞌa kupphiito taane. Ebi bi tuneto, Meedee asho Daariyoosi taateti ikkinnee natoobane.

² Andoo neech ta arichiyemmo iberoone. “Bare keejje taateenaꞌo Faariisee showooch taatemminaꞌone. Awuddinnoo bareenaꞌo bulliyee beshoon gaannechon tunemmone. Gaannoochee tiyitona giidoon bi danetoyee gubb, bareenaꞌo bullin Giriikee taatee showee toommooch tiijjemmone.

Gibitsee Showoonaa Sooriyee Showoonochi Taatittineenaꞌo

³ Aroochee oogeti giidoona hajjiibeeti, bi shunnimmonoo tuniibeeti giidechi taatoo tiyemmone.

⁴ Tunebaani bi giidoo oogeꞌi bi beshiyooba, bi taatittino happeeree showee awudde kelloona qoodeyemmone. Ebi taatittino bi yaroyich besheyaachemmone; cammona waaxeree bareenaꞌoyich beshiitaa ichemmone. Eboshiyoo biichoommon giidechinaꞌo tuneyaachemminaꞌone.

⁵ “Aroochee deshi-waan beeti Gibitsee taatoo giidechon tunemmone; tunebaani bi ginee iraasheenaꞌo daggoochee ikkoo biyee beshoon giidechon tunemmone; bi taatittinoo oogeti giidechon tunemmone.

⁶ Meeti natoyee gubb Gibitsee taatoo Sooriyee taatoona tookki wogoon giyemmone. Ebi wogoon manjiyoyich, bi busheen Sooriyee taatoyich shaakkiyemmone. Tunebaani aree bi giidoon manjii yechaꞌa yagiyoon bi mawiitoyich, boonoshi giyiti wogo manjaachemmone. Arooba bi, bi keno, bi bushoonaa bi naayinaꞌona tookki beshiitaa ichemmine.

⁷ “Aroyee gubb, ureechi xibeenaꞌo daggoochee ikkoo bi nihoochi xaaꞌooch taatemmone. Biyoo dambi-waan beeti Sooriyee taatoochi ginee naayinaꞌon kochemmone; boonoshi xaqqee uxeroon tiishi giyiree boonoshin koyi wochemmone.

⁸ Boonoshi nuggisheenaꞌochi misileenaꞌonaa aachoonaa birewoonoochee shuuneeti boonoshi qiiceenaꞌonon keciree, Gibits daammemmone; giisheche nati wottoon Sooriyee taatoon koyaanoon kotemmone.

⁹ Aroyee gubb, Sooriyee taatoo Gibits hammemmone; aroochee bi showooch wottemmone.

¹⁰ Sooriyee taatoochi anaami bushiisheenaꞌo koyeya qanniree, dofee ginee naayinaꞌon kicemminaꞌone. Boonoshi daggoochee ikkoo hidii daammiibeeti ambamboochoommon diqqoona bi ettoochi xaqqee uxerooch beddaahaa shagiree koyemmone.

¹¹ “Arooba Gibitsee taatoo ippoona keyiree, Sooriyee taatoon koyi, dofee bi ginee naayinaꞌon yechemmone.

¹² Eboshin kochii bi wochitonaa dofee ginee naayinaꞌon bi wuxitonoyich, oogeton geecemmone. Tunebaani kochii wochoona manjiree beetaachemmone.

¹³ Sooriyee taatoo aafichoyee beshe dofee ginee naayinaꞌon kicemmone. Meeti nato beshetoyee gubb, ceeni ginee qiicoon gaawichiꞌi cuyeti dofee ginechinaꞌona tookki wotteree woyemmone.

¹⁴ “Aroobee yemeenooch meeti asheenaꞌo Gibitsee taatoo toommooch tiyemminaꞌone. Boonoshi beeggiti yaaꞌoochee tiyitona ne asheenaꞌo daggoochee hukkechinaꞌo tiyemminaꞌone; tunebaani boonoshich kaameyaachemmone.

¹⁵ Sooriyee taatoo waaree showee gutoon guti, mishigechi katemooch giyiree yechemmone. Gibitsee ginee naayinaꞌo koyoon mawiyemminaꞌone; aricheti ginee naayinaꞌolla koyoyich giidoon muccemminaꞌone.

¹⁶ Sooriyee taatoo boonoshi toommooch bi shunnimmon shuunemmone. Bi aafooch hakkiree neexemmo koniyoona aalloone. Gaawe Shoween yechemmone; are showoo bullin aalliyoyich giidoon danemmone.

¹⁷ Biyoo bi taatee showooch beeti, bi ginee naayinaꞌo bullin yeshiree woya maaccemmone. Gibitsee taatoona tookki wogoon giyemmone. Ebi taatittinoon aalliyoyicha getiree, bi busheen Gibitsee taatoyich shaakkiyemmone; tunebaani ebi bi gaboo ceenaachemmone.

¹⁸ Aroyee gubb baharee gashooch beeti showeenaꞌon koyiree meetinaꞌon yechemmone. Tunebaani ikke ginee iraashoo biin koyi wochiree bi geecoon aalliyemmone; ebi taatoo geecoona bi tuniiti mooyo, bi toommooch bi wottemmoyich tuniyemmone.

¹⁹ Bi showooch beeti xaqqee uxerechi katemeenaꞌooch wottemmone; tunebaani tepheeree dihemmone; arooba bi ciiro tunemmone.

²⁰ “Aroochee bare taatoo bi keroon taatemmone; biyoo bi taatittinee oogoon eenniyoyich, gibiroon kichiyemmi ikke uroon daachiyemmone. Tunebaani yagaanoon, kaaroona woyee ginoona tuneyaanoon, wuxeyemmone.

Sooriyee Showooch Taateti Maacmanje Taatoo

²¹ “Biyee gubb ikke hoxeeti uro taatemmone; biich taatittinee oogo icheyaachemmone. Biyoo diqqoona waaree taatittinoon maroona deqqemmone.

²² Bi aafooch neexemmi ginee naayo taane ito bullin, qeeshee guudooch beddaahaanona, diqqoona ambamboochoommon shagi hidiree aalliyemmone.

²³ Bare showee asheenaꞌo biinna tookki wogoon boonoshi giyemmoyich bi tuniitoyee gubb, boonoshin dachemmone. Bi dabbeenaꞌo giishecheenaꞌo boonoshi tunetaanoona, giidechon tunemmone.

²⁴ Gaannechi woraafee showeenaꞌon diqqoona yechemmone. Bi qaabbechinaꞌo daggoochee ikkolla tuniyaani mooyon tuniyemmone. Aroochee koyoochee bi daneti mooyinaꞌonaa qiiceenaꞌo bullinon, biin dabbii beetinaꞌoyich qoodemmone. Mishigeenaꞌonoo happoyich gabemmone; tunebaani ebin bi tuniyemmo giisheche aabee wottoon baachiye.

²⁵ “Meeti ginee naayinaꞌon kiciree, bi aafee kupphoonaa bi giidoonon Gibitsee taatoo toommooch bekkiiya tiyemmone. Gibitsee taatoo dofee giidechi ginee naayinaꞌon kiciree, biinna koyemmone; tunebaani bi toommooch boonoshi koceetoyich, kochii wochoon hakkaachemmone.

²⁶ Biinna tookkii maabeeti, katini bi mikkirechinaꞌo biin aalliyemminaꞌone. Bi ginee naayinaꞌo koyaa aallemminaꞌone; meetinaꞌoo wuxeyemminaꞌone.

²⁷ Boonoshi mulloona gondoon gabiibeeti, ebi gutte taateenaꞌo maayoon mamoyich ikke madooch kotemminaꞌone; boonoshiyoo ikkoo baroyich kootoon yibbaatemmone. Tunebaani maacheti aabo batt bi tunetoyich, ebi boonoshi gaboo amoonolla boonoshich gaacaachemmone.

²⁸ Sooriyee taatoo koyoochee bi daneti wodde gaannoon yeshiree bi showooch wottemmone. Tunebaani wottebee Yeerich tuneebeeti, ibere goyinnoon aalliyoyich kupphiiree gabemmone. Aroochee bi shunniton bi shuunetoyee gubb, bi showooch wotteree hammemmone.

²⁹ “Yeeri maacciti aabooba, Gibitsee showoon kocha wotteree woyemmone. Tunebaani mooyo aafichoommon biich kaameyaachemmone.

³⁰ Kitiimee asheenaꞌo markabeenaꞌona waaree biin kochemminaꞌone. Biyoo shatiree gubb kishe wottemmone; aroochee oogeti ippoona Yeerich tuneebeeti, ibere goyinnoon aalliyoyich tiyemmone. Yeerich goyinnoon qajjiti asheenaꞌona tookki xibemmone.

³¹ “Bi ginee naayinaꞌoo yaafee kexonaa bi xaqqee uxeroonon eeꞌiyemminaꞌone. Yeerich qemi qemona giddeebeeti deejjoon echiyemminaꞌone. Aalloon deebemmi eeꞌoon Yaafe Xaaꞌooch neechemminaꞌone.

³² Biyoo Yeerich goyinnoon qajjiti asheenaꞌon maroona bi waan tuniyemmone; tunebaani boonoshi Nuggishoon ariibeeti asheenaꞌo manji neexeree, biinna koyemminaꞌone.

³³ “Asheenaꞌo daggooch beeti yiiteenaꞌo meetinaꞌoyich arichiyemminaꞌone. Giisheche aabee wottoon, boonoshi daggoochee ikkikkeenaꞌo ginoona koyaa qitemminaꞌone; qaaqqoonoo michaa qitemminaꞌone; boonoshi hajjiton bokkeree cuchemminaꞌone.

³⁴ Boonoshiyoo qitibee giisheche gaachoon danemminaꞌone. Dawushechi meeti asheenaꞌo boonoshina tookki ikkottemminaꞌone.

³⁵ Ebi yiiteenaꞌo daggoochee ikkikkeenaꞌo tepheeree dihemminaꞌone. Ebiichee tiyitona asheenaꞌo xalleenaꞌo, haattee kechitinaꞌonaa muricaalleenaꞌona tunemminaꞌone. Ebi mooyo bi tunemmo, Yeeri maacciti ciireexi yemeeno shaggimmi wottooniye.

³⁶ “Ebi Sooriyee taatoo bi shunniton shuunemmone; nuggisheenaꞌoyee damba bi qelloon oogiyemmone; nuggisheenaꞌochi Nuggishoo toommooch naagee yibbaatoon yibbaatemmone. Yeeri gabito bulli tuno echeyaano bi tunetoyich, Yeerichi kaaree yemeeno tunemmi wottoon ebin tunii beeyemmone.

³⁷ Ebi taatoo bi qaabbechinaꞌo goyinneebee echeti nuggisheenaꞌonaa genneenaꞌo shunniibeeti nuggisheenaꞌonon qallayemmone. Bi qelloon eboshi bulliyee beshoon tuniiꞌi bi ciinnii beetoyich, nuggisheenaꞌo bullin qallayemmone.

³⁸ Eboshichi qoodoon mishigeenaꞌon quyeebeeti nuggishoon oogiyemmone; bi qaabbechinaꞌo ariyaani nuggishoyich aachoon, birewoon, aaxxe xaqqeenaꞌonaa aaxxe wojjoonon giddiyemmone.

³⁹ Dallaawe nuggishoyich goyinneebeeti asheenaꞌochi gaachoona manje bi mishigeenaꞌon quyemmone. Biich qeyitinaꞌon oogichi oogiyemmone; meeti asheenaꞌo toommooch boonoshin iraashiyemmone; biich boonoshi tuniiti moochi gaacoyich, showoon boonoshich immemmone.

⁴⁰ “Ciireexi yemeenooba Gibitsee taatoo biin kochemmone. Tunebaani Sooriyee taatoo gaarin, hareshechinaꞌonaa meeti markaboonon yeshi bi toommooch yuboochoommon guubbiree woyemmone. Meeti showeenaꞌooch giyiree ambamboochoommon hidi boonoshi daggoona beshemmone.

⁴¹ Gaawe Showeech giyemmone; meeti showeenaꞌo bi kishooch dihemminaꞌone. Tunebaani Edoomee showoo, Moꞌabee showoonaa echeti Amoonee showoona bi kishoochee muriccemminaꞌone.

⁴² Bi giidoon meeti showeenaꞌooch beddaahaa bi gamichiyooba, Gibitsee showolla bi kishoochee muricaachemmone.

⁴³ Gibitsee showee gaanno tuneti aachoonaa birewoonon, aaxxe mooyo bullinoo bi kishooch tuniyemmone. Liibiyee showoonaa Topphiyee showoonon hajjemmone.

⁴⁴ Aroochee aabi-keyonaa dambi-waaninoochee waati woroo biin keqqichemmone; oogeti ippoona tiyiree meeti asheenaꞌon wuxi aalliyemmone.

⁴⁵ Ogooge bi taatee duukkaaneenaꞌon baharoonaa yaafee kexo beeti geppoonochi gutte daggooch xogemmone. Tunebaani ciiroochaa aallemmone; koniyoona biin gaacheyaachemmone.