Daaneeli 10 - Kafa Linguistics Project

Daaneeli Ikke Uroon Yaaꞌoona Beego

¹ Faariisee taatoo Qiroosi taatehoobee keejjinnee natooba, Belxesoori getteeti Daaneelich Yeeri ikke mooyon bekkiihe. Ebi mooyo iberoone; ebiyoo ooge ginee mooyone. Ebi mooyon bi shalligemmoyich yaaꞌoona biishaa getteehe.

² Arooba ta, Daaneeli, keejje shabaattee wottoon ayinii muusheneho.

³ Keejje shabaattoo beshemmi wottoon shaawi maayoon maataano taane; meenon tuneba woyinee uyoon ta noonooch shakkiyaano taane; ta qelloochoo amoonolla huuteyaano taane.

⁴ Ikkinnee agenee hiyaa awuddinnee qemooba, Xegiroosi ooge aachi gashooch neexaa beeho.

⁵ Ta aafoon kaachii ciinnaꞌa, muttee tuppoochee shippeti tahoon taheꞌi, bi shimetooch xalle aachoochee shuuneeti shachoon cuyeti ikke uroon beeggeho.

⁶ Bi ashittino beruulloommon waccii beetone; bi baroo xeeyee phaqqoommon phaqqii beetone; bi aafo qaaqqee aaxxoommon aaxxee beetone; bi kishoonaa bi baatoona naallii shuunetaa aaxxeebeeti gooshoommone; bi qaaroo dofee ashi qaaroommone.

⁷ Ebi yaaꞌoon beeggeto, ta, Daaneeli, baachiye. Taanna tookkii beeti asheenaꞌo beegaaneenaꞌone; tunebaani oogeton shattii qeweꞌi, wocee aasheheete.

⁸ Ebich ta ikkeeto baach ebi worganikkiti yaaꞌoon beeggaabee arooch echeho. Tawoo giidoo qacheho; ta halloo shaddeeꞌa tuusheeho; giidoon mucceto taane.

⁹ Aroochee bi qaaroon waayeho; bi qaaroon ta waayehooba, kashoon tuushaa showooch baroona guufeho.

¹⁰ Aroochee ikke kishoo taan yechiꞌi, ta kishoon showooch matiree, ta gutenoona ta neexemmoyich tuniihe; andoo qewaaniye ta beeto.

¹¹ Biyoo taach ishichiye: “Oogeton shucheti Daaneelo, tiyi kaama neexeree, neech ta gettemmon manjiiree waayebe; tawoo neech getta wochetaa waato taane” iye. Ishin bi gettii beetaa, tawoo qewaabee tiyaa neexeho.

¹² Biyoo taach ishichiye: “Daaneelo, shattaahine! Shalligoon daneya ne Nuggishoo aafooch ne qelloon ne giishiiti, batti batti aaboochee tiijjiꞌi, Yeeri ne qolloon waayetone. Tawoo ne qolloyich tunemmi wochoon yechaꞌa waato taane.

¹³ Tunebaani Faariisee showoon quyeebeeti maraakoo hiyaa ikke qemi wottoon ta gommon hicciꞌi bajjiye. Faariisee showooch ta ikkeeto echetoyich, maraakeenaꞌochi iraasheenaꞌoochee ikkoo tuneti Mikaꞌeeli waaꞌi taan gaachehe; tawoo biin Faariisee taatoona tookkii arooch qajjeho.

¹⁴ And ta waato, gubb ne asheenaꞌo toommooch tunemmi mooyon ne ariyemmoyich tuniyane. Ebi yaaꞌoo gubb tunemmi mooyoniye bi bekkiibeeto” iye.

¹⁵ Ebi mooyon taach bi gettii beegaata showooch ciinneho; yibbaatemmonoo mawiiho.

¹⁶ Aroochee bekkech ashoon shaahiibeeto, ta noonoon shafehe. Tawoo ta noonoon qechaꞌa yibbaateho; biichoo ishichiyo: “Ta doonocho, ebi yaaꞌoochee tiyitona biiyeto taane; giidoonoo mucceto taane.

¹⁷ Ta doonocho, ne aafooch neexaꞌa yibbaatoyich beddeti asho toono taane; ta giidoo qajjitone; kachemmonoo mawiito taane” iyo.

¹⁸ Wochinnoon ebi ashoon shaahiibeeto taan yechiꞌi ta kupphemmoyich tuniihe.

¹⁹ Biyoo ishichiye: “Oogeton shucheti uroocho, shattaahine; diggoo neech tunebe; kupphebe; manjibe” iye. Ebin bi gettimmona, tawoo kupphaꞌa, “Ta doonocho, taan kupphiito neene. Illa getta ne qaawiton gete” iyo.

^20-21 Biyoo ishichiye: “Ne waan aakkiya ta waato gaata arii beetine? Ebiyoo Iberee Macaafooch kooreeton neech bekkiyoyichiye. And wotta hamiree Faariisee showoon quyeebeeti maraakoona tookki koyemmo taane. Aroyee gubb, Giriikee showoon quyeebeeti maraakoo woyemmone. Eboshina tookkii ta koyee beetaa, taan gaacheebeeto, ittoshin quyeebeeti maraakoo Mikaꞌeeliyee damba baroo koniyoona aalloone.