Daaneeli 1 - Kafa Linguistics Project

Daaneelinaa Bi Nuucheenaꞌona Baabloonee Taatee Kexooch Gimo

¹ Yihudee taatoo Yoyaqiimi taateti keejjinnee natooba, Baabloonee taatoo Nabukadinatsori Yerusaalem waaꞌi, katemoon giichiye.

² Yeeri Yihudee taatoo Yoyaqiimin yaafee kexooch beeti qiiceenaꞌoochee ikkikkeenaꞌona tookkii bi kishooch beshiiꞌi immiye. Biyoo ebi qiiceenaꞌon Baabloon beeti bi nuggishoochi yaafee kexooch daammiye; qiiceenaꞌonoo bi nuggishoochi ginjabeetooch kotiihe.

³ Aroochee taatoo, taatee kechi iraashoo tuneti Ashifaneezi Israꞌeeleenaꞌo daggoochee taatee yaroonaa woraaferasheenaꞌochi yaroonoochee tunetinaꞌon kaaciree bi deebemmoyich gettiye.

⁴ Bi kaaccemmo, taatee kexooch giyiꞌi maddee hakkoo boonoshich bi beeyemmoyich, boonoshi ashittinee quumo iiweenaꞌon, mallet gaaweenaꞌon, ariyechinaꞌon, yiiteenaꞌonaa mooyon kaatee yechii deqqii beetinaꞌona tuneti gurimaasheenaꞌoniye. Eboshin kaaciree, Baabloonee noonoon, wotta kooreeti mooyonoo bi dojjemmoyich gettiye.

⁵ Taatoo wotta boonoshi maayemmi maayoonaa boonoshi uchemmi woyinee uyoona qemi qemona bi madoochee boonoshich bi ichemmoyich tuniihe. Boonoshiyoo keejje naton boonoshi doyitoyee gubb, taatee kexeexi shuunooch giyemminaꞌone.

⁶ Ebi kaachetinaꞌo daggooch Yihudi yoodoochee tuneti Daaneeli, Hanaaniyi, Mishaꞌeelinaa Azariyaasina beetinaꞌone.

⁷ Taatee kechi iraashoo boonoshich bare shigoon shigiihe; Daaneelin Belxesoori, Hanaaniyin Sidiraaqi, Mishaꞌeelin Misaaqi, Azariyaasinoo Abidinagi, iꞌi shigiihe.

⁸ Daaneeli taatoochi maayoon mamonaa woyinee uyoon uyona bi eeꞌeyaachemmoyich bi mulloona gabiye. Ebin tuniyoona bi qelloon bi eeꞌiyaachemmoyich, taatee kechi iraashoo waanee daaggoon echehe.

⁹ Yeeriyoo taatee kechi iraashoo Daaneelin gaawe aafoona bi ciinnemmonaa bi ariqqemmonoyich tuniihe.

¹⁰ Tunebaani taatee kechi iraashoo, taatoon bi shattitoyich, Daaneelich ishichiye: “Maayoonaa uyoona ittoshich bi ichemmoyich tuniito taatoo ta doonone; ittoshi goomeenaꞌo tuneti gurimaasheenaꞌona tateyaanoon dalliꞌi ittoshi bekkegaata, taatoo taan wuxiyemmone” iye.

¹¹ Aroochee Daaneeli, biinnaa keejje bi nuucheenaꞌonochi toommooch taatee kechi iraashoo ukkiriiti uro waan hammiꞌi ishichiye:

¹² “Ne guuno nooch, no maayemmoyich michi maayoon baach, no uchemmoyichoo aacon baach imiree aashire qemon noon beege!

¹³ Aroochee no ashittinoonaa taatoochi maayoochee maabeeti gurimaasheenaꞌochi ashittinoonon ciine; aroyee gubb, neech shaahimmon tuniibe” iye.

¹⁴ Biyoo deꞌa iꞌi ebin tuniyoona aashire qemon boonoshin ciinniye.

¹⁵ Aashire qemo ciiretoyee gubb, taatoochi maayoon maati bare gurimaasheenaꞌoyee beshoon aangii nuuriꞌi bekkeheete.

¹⁶ Ebich boonoshi toommooch ukkireti uro taatoo boonoshich immiti maayoonaa uyoonon qajjiichii, michi maayoon baach boonoshich immiye.

¹⁷ Yeeri ebi awudde gurimaasheenaꞌoyich kooreeti mooyon boonoshi ariyemmonaa doyemmonoyich, ariyoonaa shalligoonon immiye; Daaneelich wotta daakkiꞌi yaaꞌoonaa gumonon bi biichemmi hakkoon immiye.

¹⁸ Taatoo taajjeti keejje nato shaggiyooba, taatee kechi iraashoo gurimaasheenaꞌo bullin taatoo Nabukadinatsor waan daammiye.

¹⁹ Taatoo boonoshi bullina tookkii bi yibbaatehooba, boonoshi bulli daggoochee Daaneelina, Hanaaniyina, Mishaꞌeelinaa Azariyaasina tookkii tateto aalloone. Ebich taatee kexeexi shuunooch giyiyeete.

²⁰ Boonoshiyoo taatoo boonoshin echeti mooyo bullin ariyoonaa shalligoona bi taatee showoo bulliich beeti kaayechinaꞌonaa allaameenaꞌo bullinoyee aashire kishoon beshiꞌi bekkeheete.

²¹ Daaneeliyoo taatoo Qiroosi taateti ikkinnee nati wottoon taatee kexooch shuuneebee beehe.