Asteeri 8 - Kafa Linguistics ProjectTaatoo Awaajjiti Bare Awaajjo 1 Arooba taatoo Yekisesi Ayihudeenaꞌochi etto Hamaanicho tuneto bullin gennee abeeti Asteerich immiye. Asteeriyoo biinnaa Mordokiyoosina daggooch beeti xibittinoon taatoyich bi gettetoyich, Mordokiyoosi taatoo waan giyiye. 2 Taatoo, Hamaan waanee wochii bi deqqiti, axxaamittee maatemoon bi kishoochee kichii Mordokiyoosich immiye. Asteeriyoo Mordokiyoosin Hamaanicho tuneti mooyo bulli toommooch ukkiriihan. 3 Aroochee Asteeri taatoochi baatooch dihaꞌa eeppaabee wochinnoon taatoyich yibbaatehan. Agaagi yaroochee tuneti Hamaani Ayihudeenaꞌo toommooch tuniiya bi gabiti gonde gaboon echiyoyich, ikke mooyon bi tuniyemmoyich qollahan. 4 Taatoo aachee gumboon Asteerich yaggiye. 5 Biyoo tiyaꞌa bi aafooch neexahan. Ishichaanoo iyan: “Taatoon emirikkito bi tunegaata, bi aafoochaa gidoon daneti ta tunegaata, ebi mooyo taatoo aafooch tato tuneꞌi bi bekkegaata, wotta taanna emirito bi tunegaata, Agaagi yaroochee tuneti, Hamedaati bushoo Hamaani taatoochi woraafeenaꞌo bulliich beeti Ayihudeenaꞌon aalliyoyich bi gabiti gaboonaa bi kooriti koorichoonon echiyemmi awaajjo keye. 6 Ebi naxo ta asheenaꞌo toommooch shagaa ciinibee, aabichiree haaꞌiyehote? Ta xibeenaꞌo hidaa aallee beetaa, aabichiree haaꞌiyehote?” iyan. 7 Aroochee taatoo Yekisesi gennee abeeti Asteerinaa Ayihudo Mordokiyoosinoyich ishichiye: “Ebiyoche, Hamaani Ayihudeenaꞌon wuxiya bi koceetoyich, giimbooch yoodaa qititone; biicho tuneto bullinoo Asteerich immeto taane. 8 Taatoochi shigoona kooreeꞌi bi kisheexi axxaamittoona dukkeeti koorichoo shaddeyaano bi tunetoyich, ittoshi wotta Ayihudeenaꞌoyich gaaweton tuneꞌi ittoshich bekketi bare awaajjoon kooriree, taatoo kisheexi axxaamittoona dukkebote” iye. 9 Siwaani getteebeeti keejjinnee agenee hiyaa keejjinnee qemooba ebi tunehe; taatoochi koorechinaꞌo ceegaa waaꞌi, Mordokiyoosi boonoshich gettito bullin Hiindee showoochee tiijjiꞌi Topphiyee showooch beddaahaa, balli hiyaa shabaatte woraafooch beeti Ayihudeenaꞌoyich, iraasheenaꞌoyich, woraaferasheenaꞌonaa geppee taateenaꞌonoyich kooriyeete. Ebi mooyo kooreeto, woraafeenaꞌooch beeti asheenaꞌo yibbaateebeeti baribare noonoonaa boonoshi kooriibeeti baribare biroona tunemmona, Ayihudeenaꞌoyich wotta boonoshi noonoonaa boonoshi biroonane. 10 Mordokiyoosiyoo koorichoon taatoo Yekisesi shigoona kooriiꞌi, taatoo kisheexi axxaamittoona dukkehe. Taatee kexooch shiijjeti, gaawichii wocciibeeti haresheenaꞌon yookkiibeeti wocheyechinaꞌo kishoona ebi kooricheenaꞌon daachiihe. 11 Ebi koorichooch beeti taatoochi awaajjo, katemoo taane itooch beeti Ayihudeenaꞌo kiceeree, boonoshi qelloon boonoshi quyemmoyich taatoo daaggito bi tunoon gettii beetone. Wottoo boonoshi toommooch, boonoshi mecheenaꞌonaa bushiisheenaꞌonochi toommooch ginee qiicoon yechiꞌi tiyimmon, konichi yaroolla tuneba, amee woraafeexolla tuneba, wuxi hidi boonoshi aalliyemmonaa boonoshi etteenaꞌocho tuneto bullin boonoshi boggemmonoyich gettii beetone. 12 Ayihudeenaꞌo taatoo Yekisesichi woraafeenaꞌo bulliich ebin boonoshi tuniyemmoyich bi getteeto, Adaari getteebeeti aaraa guttinnee agenee aaraa keejjinnee qemoobane. 13 Ebi koorichoo kooraa bi hammemmo, Ayihudeenaꞌo ebi aabooba boonoshi etteenaꞌo toommooch nichoon kichiya boonoshi qannemmoyich, wotta ebi mooyo sheeroochoommon bi awaajjeyemmonaa woraafeenaꞌo bulliich beeti aagetee asheenaꞌo bullich bi arichemmonoyichiye. 14 Ebich taatee kexeexi haresheenaꞌon yebbeti wocheyechinaꞌo taatoo getaa, afaafinoona kechii hammiyeete; awaajjoo wotta inde katemoo Suusaa getteehe. 15 Mordokiyoosi shimaayitoonaa naccoonon tuneti taatee kechi tahoon taheꞌi, muttee tuppoochee shippeti damere iddimoon bi toommooch geddiꞌi, bi shimboochoo oogeti aachee gubbichoon ukeꞌi, taatoo aafoochee kechiye. Suusi katemeexi asheenaꞌo emiroona ililiyeete. 16 Ebina Ayihudeenaꞌo mullo kashehe; boonoshiyoo emiroona wucwucciyeete; oogoonoo daneheete. 17 Taatoochi awaajjo shaggiti woraafeenaꞌonaa katemeenaꞌo bullinooch beeti Ayihudeenaꞌo oogeton emiriyeete; emiroonoo wucwucciyeete; gifiroon geddiꞌi baaroon baariyeete. Ebina Ayihudeenaꞌon shatoochee tiyitona, meeti aagetee asheenaꞌo Ayihud wotteheete. |
SIM International, 2020.