Asteeri 7 - Kafa Linguistics Project

¹ Ebich taatoonaa Hamaanina gennee abeeti Asteer waan gifirooch guttinnoon hammiyeete.

² Woyinee uyoon uchii boonoshi beetaa, taatoo Asteerich wochinnoon ishichiye: “Gennee abeeti Asteere, ne qaawaabeeto, amoone? Neech ichemmone. Ne qollaabeeto, amooniye? Ta taatittinee qatolla bi tunegaata, neech daaggeyemmone” iye.

³ Aroochee gennee abeeti Asteeri ishichiyan: “Taatoocho, ne aafoochaa gidoon daneti ta tunegaata, neenoo emirikkito bi tunegaata, ta kasheen wodiibe; ta qaawaabeeto, ebiniye. Ta asheenaꞌonoo wodiibe; ta qollaabeeto, ebiniye.

⁴ Guunonaa gonneenon tunoyich baach no kecheto gaata, cikki qajjeshi taane. Ebiyoommi no xuuxo neen yulliyoyich beddito tuneyaacheshone; tunebaani taannaa ta asheenaꞌona qitoonaa hidaa aalloonoyich kecheto noone” iyan.

⁵ Taatoo Yekisesi gennee abeeti Asteerich, “Aroo konine? Ebin tuniyoyich aafoon kuppheti are uro, aabiichiye bi beeto?” iye.

⁶ Asteeriyoo wochaꞌa, “No ettoonaa noon aalliyoyich qaawii beetona, hini gonde uro Hamaanine” iyan. Aroochee Hamaani taatoonaa gennee abeetinochi aafoochaa oogeton keqqiye.

⁷ Taatoo ippoona tiyiye; gifiroon qajjiꞌi becheeti mixo beeti taatee kechi addibaabooch hammiye. Tunebaani Hamaani taatoo waanee gonde mooyo biich gabeeto bi tunoon ariiꞌi, gennee abeeti Asteeri bi kashoon bi wodiyemmoyich qolleya, arooch echehe.

⁸ Taatoo becheeti mixo beeti, taatee kechi addibaaboochee, uyo ucheebeeti kexooch bi wottemmona, Hamaani Asteeri beeti qeenooch dihiꞌi beehe. Taatoo “Halla hini uro gennee abeetin ta kexoochaa, ta ciini beetaa, yecha ii beete!” iꞌi bi toommooch cookiye. Ebi bi noonoochee kechimmona, bekkech guruusheenaꞌo Hamaani aafoon kaappiyeete.

⁹ Aroochee boonoshi daggeexi ikkoo, Haribooni getteebeeto, ishichiye: “Hamaani tuniiti bare mooyo beetone; taatoon qitoochee wodiiti Mordokiyoosin yoodoyich, aache hiroon tuneti giimboon bi kechi gaꞌooch xogiiꞌi qanniitone” iye. Taatoo “Biin daami arooch yoodote” iye.

¹⁰ Ebich Mordokiyoosich bi qanniiti giimbooch Hamaanin yooddiyeete. Aroochee taatoochi ippo aqqehe.