Asteeri 6 - Kafa Linguistics Project

Mordokiyoosin Taatoo Oogiyoo

¹ Aroobee xum taatoon tokketoo qajjiye; ebich taatee showooch tuneti, batteya bedaani mooyo kooreebeeti kiinee macaafoon deebi boonoshi shemmemmoyich gettiye.

² Aroochee taatoo Yekisesi qemi kexooch giijjiibeeti kelloon quyeebeeti, Bigitaaninaa Tereeshina getteebeeti gutte guruusheenaꞌo taatoon wuxoyich koceeꞌi boonoshi tuniiti mooyonaa ebi mooyon Mordokiyoosi getona kooreeꞌi danehe.

³ Taatoo ishichiye: “Ebin bi tuniitoyich, Mordokiyoosich amee oogoonaa gaacoonane icheto?” iꞌi echehe. Bi aafee bushiisheenaꞌo wochiꞌi, “Biich tuneti amee mooyolla aalloone” iyeete.

⁴ Taatoo “Taatee kexooch beeto, konine?” iꞌi echehe. Areegaata Hamaani bi qanniiti giimbooch Mordokiyoosin yooddiyoyich taatoon daaggiiya taatee kexoyee maach beeti addibaabooch batt shaggitone.

⁵ Taatoo aafee bushiisheenaꞌo wochiꞌi, “Hamaanine” iyeete. Taatoo “Gibe getote” iye.

⁶ Hamaani giyimmona, taatoo biich ishichiye: “Taatoo oogiiya oogichiꞌi bi qaawiti ashich, amo tuneba?” iꞌi echehe. Hamaaniyoo bi mulloona “Taatoo tayee besh bi oogiyemmi asho, koni beete?” iꞌi gabiye.

⁷ Ebich taatoyich ishichiye: “Taatoo oogiiya bi qaawiti ashich,

⁸ taatoo taheebeeti taatee tahoonaa taatoochi malletoo beeti gubbichoon bi shimbooch uketi, taatoo yebbeebeeti hareshoona wobe.

⁹ Aroochee are tahoonaa hareshoona aricheti iraasheenaꞌo daggoochee ikkoyich ichebe; biyoo taatoo biinna emiriꞌi oogiiya bi qaawiti uroyich ebi tahoon tajjibe; hareshoonoo yebbiiree katemee daggeexi addibaaboon guudiibee, ‘Taatoo oogiiya bi qaawiti ashich ebi tunee beetone’ geti cookibee awaajjibe” iye.

¹⁰ Aroochee taatoo Hamaanich ishichiye: “Kaate hamiree, taatee tahoonaa hareshoonon deebe. Taatee kechi uxeree kellooch koteꞌi beeti Ayihudo Mordokiyoosich, ebi ne gettetoommon tuniibe; ebi ne gettetoochee ikke mooyonona shappiiyaahine” iye.

¹¹ Ebich Hamaani taatee tahoonaa hareshoonon deebiye; tahoonoo Mordokiyoosich tajjiye. Hareshoon yebbiiꞌi, katemee daggeexi addibaaboon guudiibee, “Taatoo oogiiya bi qaawiti ashich ebi tunee beetone” ii cookiibee awaajjii beehe.

¹² Aroochee Mordokiyoosi taatee kechi uxeree kellooch wottehe; tunebaani Hamaani yeelloona bi aafoon kaappiꞌi bi kexooch afaafinoona hammiye.

¹³ Bi toommooch shaggiti mooyo bullinoo bi mechee Zereeshinaa bi shunechinaꞌo bullinoyich gettiye. Bi mecheenaa shalligechi bi shunechinaꞌona ishichiyeete: “Bi aafooch ne giishaabeeti Mordokiyoosi yaroo Ayihudo bi tunetoyich, biin hakkaachemmo neene; ne qelloona ne aallo xiisheetone” iyeete.

Hamaanin Taatoo Yooddiyoo

¹⁴ Yibbaatee toommooch boonoshi beetaa, taatoo aafee bushiisheenaꞌo tuneti guruusheenaꞌo shaggiꞌi, Hamaanin Asteeri qanniiti gifirooch afaafinoona bi hammemmoyich tuniiheete.