Asteeri 5 - Kafa Linguistics Project

Taatoonaa Hamaaninoyich Asteeri Gifiree Gedo

¹ Keejjinnee qemooba Asteeri taatee kechi tahoon tahaꞌa hammaa, taatoochi qeechi kechi ciinooch beeti, taatee kexooch giyaꞌa neexahan. Taatoo are kechi kellee ciinooch, bi qeenooch koteꞌi beehe.

² Biyoo ebi xaaꞌooch neexaꞌa beeti gennee abeeti Asteerin beeggiye; bi aafoochaa gidoon bi danetoyich, bi kishooch beeti aachee gumboon bi waan yaggiye. Asteeriyoo giddaꞌa gumbee cilloon yechahan.

³ Taatoo “Gennee abeeti Asteere, amoyich waanne? Ta waanee ne qaawiibeeto, amoone? Ta taatittinee qatolla bi tunegaata, neech ichemmone” iye.

⁴ Asteeriyoo wochaꞌa, “Taatoon emirikkito bi tunegaata, taatoyich ta qanniiti gifirooch Hamaanina tookki ittoshi woyemmoyichiye ta qaawaabeeto” iyan.

⁵ Aroochee taatoo “Asteeri qaawitoommon no tuniyemmoyich, Hamaanin kaateree ceegote” iye. Ebich taatoonaa Hamaanina Asteeri qanniiti gifirooch hammiyeete.

⁶ Woyinee uyoon uchii boonoshi beetaa, taatoo Asteerich ishichiye: “Ne qaawaabeeto, amooniye? Neech ichemmone. Ne qollaabeeto, amooniye? Ta taatittinee qatolla bi tunegaata, neech daaggeyemmone” iye.

⁷ Asteeriyoo wochaꞌa ishichiyan: “Ta qaawaa beetonaa ta qollaa beetona ebiniye:

⁸ Taatoocho, ne aafoochaa gidoon daneti ta tunegaata, ta qaawaa beeton imonaa ta qolloon waayoonoyich taanna emirito ne tunegaata, neennaa Hamaanina ta qanniyemmi gifirooch yaach wobote; aroochaa neech ta qaawaa beeton gettemmi taane” iyan.

Hamaani Mordokiyoosin Wuxiya Gaboo

⁹ Arooba Hamaani bi mulloona emiriibee, emiroonoo wucwucciibee kechiye. Tunebaani taatee kechi uxeree kellooch beeti Mordokiyoosi biich tiyaano, biin oogiyee malletoonoo amoonolla bekkiyaano bi tunoon bi beeggiyooba, oogeton ippehe.

¹⁰ Tunetaa haaꞌii, kexooch hammiye. Bi shunechinaꞌonaa bi mechee Zereeshinon ceeggiꞌi,

¹¹ oogeti gaanno biich beemon, bi anaami bushiishee meeton, ebiyoommon wotta taatoo biin bi oogiyoon, iraasheenaꞌo bulliyee beshiti oogee xaaꞌoon biich bi imonoo naadeebee gettiye.

¹² Hamaaniyoo daakkiꞌi, “Ebi bulliyee beshoon, gennee abeeti Asteeri bi qanniiti gifirooch taatoona tookki ta hammemmoyich, ta ikkeetoyee besh koninolla ceegaaneene; yaachoo wotta taatoona tookki ta hammemmoyich taan ceeggetine.

¹³ Tunebaani Ayihudo Mordokiyoosin taatee kechi uxeree kellooch kote bi beetaa bulli aaboon ta ciini beeyemmo bi tunegaata, ebi bulli taach amoon halleshe” iye.

¹⁴ Arooba bi mechee Zereeshinaa bi shunechinaꞌo bullina ishichiyeete: “Aache hira bede giimboon xogiichi, Mordokiyoosin arooch bi yooddiyemmoyich yaach maaddoona taatoon echebe; aroochee emiribee taatoona tookki gifirooch gibe” iyeete. Ebi mooyo Hamaanin emirikkiye; biyoo giimboon qanniihe.