Asteeri 4 - Kafa Linguistics Project

Asteerin Taatoo Waan Mordokiyoosi Wocho

¹ Mordokiyoosi ebi tuneti mooyo bullin bi waayehooba, bi tahoon keexxiye; dookoon tahee tulloon bi toommooch shakkii, bi qaaroon oogichiꞌi eeppii ayiniibee, katemee daggooch hammiye.

² Dookoon taheꞌi maac gimo daaggeyaano bi tunetoyich, bi hammito, taatee kechi uxeree kellooch beddaahaa baachiye.

³ Taatoochi awaajjo getteeti woraafo bulliich beeti Ayihudeenaꞌo daggooch oogeti eefo tunehe. Boonoshiyoo coomiyeete; eeppiyeete; bunneheete; meetinaꞌoo dookoon taheꞌi tullooch qeyiyeete.

⁴ Asteeri naayinaꞌo tuneti maache bushiisheenaꞌonaa guruusheenaꞌona waaꞌi, Mordokiyoosi mooyon biich boonoshi getaa waayaꞌa, oogeton ayiniyan; biyoo dookoon shootiichi bi tahemmoyich, bare tahoon Mordokiyoosich daachiihan; tunebaani ebi aroon deqqemmon qajjiye.

⁵ Aroochee taatee kechi guruusheenaꞌo daggoochee, biin bi gaachemmoyich taatoo tuniiti Hataakin ceeggahan. Mordokiyoos waan hamiree, tuneti mooyo amo gaata, wotta amoyich ebin bi tuniito gaata eche waayeree bi woyemmoyich, wochaa daachiihan.

⁶ Hataaki taatee kechi uxeree kellooch, addibaabooch beeti, Mordokiyoos waan hammiye.

⁷ Mordokiyoosiyoo bi toommooch tuneti mooyo bullin gettiye; wotta Hamaani Ayihudeenaꞌon wuximmoyich taatoochi ginjabeetooch giijjiya bi gettiti gijjee haddoonoo gettiye.

⁸ Mordokiyoosi daakkiꞌi, Ayihudeenaꞌo wuxaa aallemmoyich Suusaa getteeti awaajjo kooreeti koorichoochee ikkoon immiye. Asteerich daami bi bekkiyemmonaa mooyon biich bi gettemmonoyich gettiye. Wotta “ ‘Taatoo waan giyiree, ne asheenaꞌochon qolle maaggebe’ gete” iye.

⁹ Hataakiyoo wotteꞌi, Mordokiyoosi gettito bullin Asteerich gettiye.

¹⁰ Asteeriyoo Mordokiyoosich ishichi bi gettemmoyich, Hataakin wochaꞌa daachiihan:

¹¹ “Taatoochi naayinaꞌo bullinaa bi woraafeenaꞌooch beeti asheenaꞌo bullina ariibeeti mooyo beetone. Anaamo tuneba maachee koniyoona ceekkeyaanoon, taatoo beeti maaci kexooch giyimmoo bullich ikke sheeroo baachiye beeto; ebiyoo ‘Ebin tuniiti asho bulli qitibe’ ii beetone. Ikke asho ebi qitoochee wodoon bi hakkemmo, taatoo bi kisheexi aachee gumboon bi yaggigaata baachiye. Tawoo shaashe qemi daggooch taatoo waan ceekkeyaane taane” iyan.

¹² Mordokiyoosi Asteeri getteton waayeꞌi,

¹³ ishichii biich wochehe: “Taatee kexooch ne tunetoyich, ‘Ayihudeenaꞌo bulli qitiyooba ta muriccemmi taane’ getiree gabiyaahine.

¹⁴ Ebiyoommi aabooba ne cikkii qayigaata, Ayihudeenaꞌoyich gaachoonaa wodoona bare xaaꞌoochee woyemmone; tunebaani neennaa ne nihoochi kechi asheenaꞌona aallemmo ittoshine. Ne, gennee abeeti tunoyich ne beddeto, diqqich ebiyoobee aaboyich gaata, koni ariihe?” iye.

¹⁵ Aroochee Asteeri Mordokiyoosich ishichaꞌa wochahan:

¹⁶ “Hamiree Suusa beeti Ayihudeenaꞌo bullin ikkittinoona kicibe; taachoo coomibote; keejje areddoonaa keejje xumoonon amoonolla maayaahote; uchaahote; taannaa ta naayinaꞌo tuneti maache bushiisheenaꞌona ebiyoommon coomemmo noone. Aroyee gubb, sheeroona bacheto bi tunetaanoona, taatoo waan giyemmi taane; ta qitenoo qitibona” iyan.

¹⁷ Mordokiyoosiyoo tiyii hammiye; Asteeri getteto bullin tuniihe.