Asteeri 2 - Kafa Linguistics Project

Gennee Abeeti Tunoyich Asteeri Kaacceyoo

¹ Ebi mooyo tunetoyee gubb, taatoo Yekisesichi ippo beshemmona, Ashixiinin, bi tuniiti mooyonaa bi naboona kechiti awaajjoonon shalligii beehe.

² Aroochee taatoyich katini bi aafee bushiisheenaꞌo ishichiyeete: “Mallet gaawe gidiide bushiisheenaꞌo taatoyich qaaweebeete.

³ Taatoo bi taatee showooch beeti woraafeenaꞌo bulliich iraasheenaꞌon bi iraashiitaa, mallet gaawe gidiide bushiisheenaꞌo bullin, Suusi katemooch beeti genneenaꞌo beeyi kexooch deebeete. Boonoshiyoo maache bushiisheenaꞌo toommooch ukkiroo tuneti guruusho Hegayi kishooch tunebeete. Boonoshi huutemmi huuto boonoshich ichebe.

⁴ Aroochee taatoo shunniti bushee Ashixiini keroon gennee abeeti tunebuye” iyeete. Ebi ciico taatoon emirikkiye; biyoo ebin tuniihe.

⁵ Arooba ebi inde katemoo Suusa ikke Ayihudo beehe; bi shigo Mordokiyoosi getteehe. Biyoo Biiniyaami yoodoochee tuneti, Qiishi bushoo, Shimeꞌi bushoo, Yaꞌiiri bushoone.

⁶ Mordokiyoosi Baabloonee taatoo Nabukadinatsori Yihudee taatoo Yekoniyaahina tookkii Yerusaalemee keccii bi daammiti asheenaꞌo daggoochee ikkoone.

⁷ Biichoo Asteeri getteyaabeeti, bi niheeshoo bushee beetine; bi shigo Hibiree noonoona Hadaasi getteehe. Asteeri mallet gaawe koroote busheene. Bi nihoonaa bi indeena qititoyich, Mordokiyoosi bi hajjee busheen tuniiꞌi daammii dichiye.

⁸ Aroyee gubb taatoo awaajjoon bi awaajjiyooba, iraasheenaꞌo meeti gidiide bushiisheenaꞌon inde katemoo Suusa deebii kiciyeete. Asteeriyoo boonoshi daggoochee ikkeene. Biinoo wotta taatee kexooch daammiꞌi genni beemi kexooch, maache bushiisheenaꞌo toommooch ukkiroo tuneti Hegayi kishooch tuniitinaꞌone.

⁹ Hegayiyoo Asteerin shunniye; bi aafoochoo emirikkiti tunaꞌa bekkahan. Bekkech bi huutemmi huutoonaa gaawe maayoonon immiye. Taatee kexooch beeti maache bushiisheenaꞌo daggoochee bi qoodoo tuneti, shabaatte bushiisheenaꞌon biich naayinaꞌo boonoshi tunemmoyich immiye. Biinnaa bi naayinaꞌonon genni beemi kechi daggoochee beshe gaawetooch beshiihe.

¹⁰ Mordokiyoosi “Gettaahine” bi itoyich, Asteeri bi yaroo Ayihudo tunoon konichona kashaaneene.

¹¹ Mordokiyoosiyoo Asteerichi diggoon echoonaa aabichaa bi beeto gaata ariyoonoyich, qemi qemona genneenaꞌo qeyiibeeti kechi addibaabooch okk hach shaꞌee beehe.

¹² Ebi gidiide bushiisheenaꞌo boonoshi ashittino shiimeyemmo ikke nati wottooniye; shiritte agenoon harebee zayitoona, wotta echeti shiritte agenoon gaawe cinnechi shittoonaa huutoona boonoshi ashittino guuchee beehe. Aroyee gubb gidiide bushiisheenaꞌo boonoshi kaallo shaggimmona, taatoo waan boonoshi giyemmoyich tunii beeheete.

¹³ Ikke gidiide bushee taatoo waan bi giyemmo ebiyoommi gommonane: Maache bushiisheenaꞌo qeyiibeeti kexoochee taatee kexooch bi hammaa beehooba, daamma bi qaawiti mooyo bulli biich ichee beetone.

¹⁴ Biyoo xumoona hamireeshiye bi yaachi maaddoona bi wottemmo. Bi yaachich wotteree guruusho tuneti, taatoochi naamacheenaꞌochi ukkiroo Shashigaazi quyeebeeti, genni beemi bare kexooch bi hammemmoyich tunii beeheete. Taatoo biin shunniꞌi bi shigoona ceego bi qayigaata, wochinnoon taatoo waan giyaachan.

¹⁵ Mordokiyoosi bi busheen tuniiꞌi bi dichiti, bi niheeshoo Abihayili bushee Asteeri taatoo waan bi hammemmi bi kaallo shaggiyooba, maache bushiisheenaꞌo toommooch ukkiroo tuneti, taatoyich maddeebeeti guruusho Hegayi, biin ciiccitoyee damba bare amoonolla qaawaaneene. Asteeriyoo biin beeggitinaꞌo bulli aafooch worganikkiti busheene.

¹⁶ Ebina taatoo Yekisesi taateti shabaattinnee natooba, Tebeeti getteebeeti aashirinnee agenooba, Asteerin taatoo Yekises waan taatee kexooch daammiyeete.

¹⁷ Taatoo bare maache bushiisheenaꞌo bulliyee beshoon Asteerin shunniye. Bare gidiide bushiisheenaꞌoyee beshoon biin shunniye; gaawe aafoonoo biin ciinniye. Ebich taatoo Yekisesi taatee gubbichoon bi shimbooch ukiiꞌi, Ashixiini keroon gennee abeetin tuniihe.

¹⁸ Taatoo, Asteeri oogoyich iraasheenaꞌonaa ukkireenaꞌo bullinon ceeggiꞌi oogeti gifiroon geddiye; wotta bi showee daggeexi woraafeenaꞌooch beeti asheenaꞌo gibiroon qocoochee boonoshi kashemmoyich tuniihe; taateenaꞌochi doyoommon wojjoon wojjiye.

Mordokiyoosi Taatoon Qitoochee Wodiyoo

¹⁹ Gidiide bushiisheenaꞌo guttinnoon kiceehooba, Mordokiyoosi taatee kechi uxeree kellooch kotee beetone.

²⁰ Asteeriyoo Mordokiyoosi biich gettitoommon, Ayihudeche bi tunoon konichona kashaaneene. Ebin bi tuniito, Mordokiyoosi biin dichii beehooba, bushaabee biich deꞌa bi getoommon, andoo biich deꞌa iyaabeeti bi tunetoyichiye.

²¹ Mordokiyoosi taatee kechi uxeree kellooch kotee bi beehooba, taatoochi qemi kexooch giijjiibeeti kelloon quyeebeeti gutte guruusheenaꞌo, Bigitaaninaa Tereeshina taatoo Yekisesi toommooch ippeꞌi biin wuxiya koceeheete.

²² Mordokiyoosiyoo ebi mooyon waayeꞌi hammii, gennee abeeti Asteerich gettiye; biyoo Mordokiyoosi shigoona taatoo Yekisesich gettahan.

²³ Mooyo xiisheyemmon tuniitaa, iberoo tuneꞌi danehe. Ebi gutte asheenaꞌo giimbooch yoodaa qitiyeete. Ebi mooyo taatoo aafoochaa taatee showeexi kiinoo kooreebeeti macaafooch kooreehe.