Asteeri 1 - Kafa Linguistics Project

Oogeti Gifiroon Taatoo Yekisesi Qanniyoo

¹ Hiindee showoochee tiijjiꞌi Topphiyee showooch beddaahaa beeti balli hiyaa shabaatte woraafeenaꞌon hajjiibeeti, taatoo Yekisesi yemeenooba ebi tunehe.

² Arooba taatoo Yekisesi, inde katemoo Suusa beeti taatee qeenooch koteꞌi taateebee,

³ bi taateti keejjinnee natooba bi showooch beeti iraasheenaꞌonaa ukkireenaꞌonoyich gifiroon geddiye. Faariisee showoonaa Meedee showoonochi ginee iraasheenaꞌo, taatee kechi mikkirechinaꞌonaa woraaferasheenaꞌona bi waan waaꞌi ebi gifirooch danetinaꞌone.

⁴ Boonoshichoo ooge bi taatee gaannoonaa bi taatee oogee yiiroonon ceeni shiritte agenoon bekkiihe.

⁵ Aroyee gubb taatoo inde katemoo tuneti Suusi daggooch beeti asho bullich, gaannechonaa girechonon bariyaanoon, bi guudoona becheeti mixinaꞌo beeti, taatee kechi addibaabooch shabaatte qemi gifiroon geddiye.

⁶ Ebi addibaabooch huuttoochee shuuneeti, naccoonaa shimaayitoona tuneti maccillaatoo tippetone; bi tippeto, muttee tuppoochee yokketaa shuuneeti, bi cillooch birewee qalibeto yesheti, damere woderoona nacce xaqqoochee shuuneeti giimboochiye. Naccoonaa ceelloonon tuneti xaqqoona, wotta inqoonaa aaxxe xaqqoona shashiitaa shuuneeti godooch aachoonaa birewoonoochee shuuneeti qeeninaꞌo beetinaꞌone.

⁷ Bi shaahoo ikkoo baroyee bariti aachee xoofoona uyo giddee beehe. Taatoo mulloochee tiijjiꞌi ebin bi tuniitoyich, taatee kexeexi woyinee uyo beddii echetone.

⁸ Uyo ebine, getteyaani woddoone; woyinee uyee qoomechinaꞌo asheenaꞌoyich boonoshi qaawitoommon boonoshi immemmoyich taatoo gettitone.

⁹ Gennee abeeti Ashixiini wotta ebiyoommon taatoo Yekisesi taatee kexoochaa genneenaꞌoyich gifiroon geddetine.

Bi Oogoochee Ashixiini Kindoo

¹⁰ Taatoo gifiroon bi gedditi shabaattinnee qemooba, woyinee uyoon uchii bi ashittino qeeccimmona, guruusheenaꞌo tuneti shabaatte bi aafee bushiisheenaꞌo, Mehuumaani, Biziti, Haribooni, Bigiti, Abagiti, Zetaarinaa Karikaasinoyich ishichiye:

¹¹ “Gennee abeeti Ashixiini taatee kechi gubbichoon ukeree hiniich bi woyemmoyich tuniibote” iꞌi gettiye. Bi ishichito, gennee abeeti malletechi bi tunetoyich, bi malletoon iraasheenaꞌonaa asheenaꞌo bullinoyich bekkiiya bi qaawitoyichiye.

¹² Aafee bushiisheenaꞌo taatoochi wochoon gennee abeeti Ashixiinich getaa, “Waataache” iyaꞌa qajjahan. Ebi mooyo taatoon oogichiꞌi ippiihe; biyoo oogeton kaarehe.

¹³ Ebich sheeroonaa dayinnetoonon ariibeeti yiiteenaꞌon echo taatoyich doyoo bi tunetoyich, yemeenee mooyon shalligiibeeti yiiteenaꞌona tookkii ebi mooyon yibbaatehe.

¹⁴ Eboshiyoo Karisheeni, Shetaari, Adimaati, Tarisheshi, Mereesi, Mariseeninaa Memuukinane. Ebi Faariisinaa Meedinochi showee shabaatte iraasheenaꞌo taatoochi katini asheenaꞌonaa iraasheenaꞌo bulliyee beshe iraasheenaꞌonane.

¹⁵ Biyoo boonoshich “Guruusheenaꞌona wocheeti, ta, taatoo Yekisesi wochoon bi qajjetoyich, gennee abeeti Ashixiini toommooch tunemmi mooyichon sheeroo ama ii beete?” iꞌi echehe.

¹⁶ Aroochee taatoonaa iraasheenaꞌonochi aafoochaa Memuuki ishichiye: “Gennee abeeti Ashixiini qallayito, taatoon baach tuneyaanoon, iraasheenaꞌo bullinaa taatoo Yekisesi woraafeenaꞌo bulliich beeti asheenaꞌo bullinoniye.

¹⁷ Ebi gennee abeeti Ashixiini mooyon genneenaꞌo bulli waayemminaꞌone. Boonoshiyoo ‘Taatoo Yekisesi gennee abeeti Ashixiinin bi waan bi woyemmoyich bi ceekkiitaa qajjetine’ getiree, boonoshi keneenaꞌon qallayemminaꞌone.

¹⁸ Hanaach ebi gennee abeeti mooyon waayeti, Faariisinaa Meedinochi showee iraasheenaꞌochi mecheenaꞌo ebiyoommon boonoshi keneenaꞌoyich gettemminaꞌone; ebina mecheenaꞌo boonoshi keneenaꞌon qallayemminaꞌone; keneenaꞌonaa mecheenaꞌona kaaremminaꞌone.

¹⁹ “Ebi mooyo taatoon emirikkemmo bi tunegaata, gennee abeeti Ashixiini taatoo waan bi giyaachemmoyich, awaajjo keye; ebi awaajjoo bi shaddeyaachemmoyich, Faariisinaa Meedinochi showee sheerooch kooreebe. Taatoo gennee abeeti bi tunee oogee xaaꞌoonoo biyee beshiti bareyich imbe.

²⁰ Aroochee taatoochi awaajjo gamini bi showoo bulliich getteemmona, maacheenaꞌo bulli gaannecho woyee girecho getaanoon, boonoshi keneenaꞌon oogiyemminaꞌone” iye.

²¹ Ebi ciico taatoonaa iraasheenaꞌonon emirikkiye; Memuuki gettiti mooyon taatoo tuniihe.

²² Anaamo bulli bi ikkikkoona bi kexoyich doono bi tunemmonaa bi hajjee noonoona bi yibbaatemmonoyich, taatoo wochoon asheenaꞌo yibbaateebeeti baribare noonoonaa boonoshi kooriibeeti baribare biroona kooriiꞌi, taatee showooch beeti woraafeenaꞌo bulliich daachiihe.