Amootsi 9 - Kafa Linguistics Project

Israꞌeeleenaꞌo Toommooch Doono Yeerichi Nalloo Kindemmo Tuno

¹ Doonon yaaꞌoona, deejjee gudee gaꞌooch neexeꞌi bi beetaa, beeggeho. Biyoo ishichiye: “Kechi koto bulli shuurimmi wottoon yaafee kechi guummon qice! Tiishi ne getaa, aree daggooch beeti asheenaꞌo bulli toommooch shekirebe. Aroochee echeton ta, goraadoona qecce wuxemmo taane. Boonoshi daggoochee koniyoona aashe echeyaachemmone; koniyoona muricaachemmone.

² Showoon iijjiꞌi maash boonoshi hami gaatoona, aroochee boonoshin shotte kichemmo taane. Shimaajj boonoshi keyi gaatoona aroochee boonoshin kindiyemmo taane.

³ Qermeloosi guudi toommooch boonoshi aasheteenona, boonoshin qaawiree aroochee yechemmo taane. Ta aafoochee baharee dechi duchooch boonoshi aasheteenona, dingeroon ta daachiitaa boonoshin qoppemmone.

⁴ Etto boonoshin kecciꞌi, gashee daammitaa aroochaa goraadoona boonoshi qitemmoyich tuniyemmo taane. Boonoshin gaacheya tuneyaanoon boonoshin aalliiya kuxxaa tiyeto taane” iye.

⁵ Beshe Mawe Nuggishoo Doono Yeeri showoon bi yeshaa, muujjemmone; showee toommooch beeto bulli eefemmone. Showoo bulli Abbaayi aaco phiceyoommon kaama tiyii kindibee, phiceyemmone.

⁶ Bi kexon damba shimaayooch haggito, shimaayoon kechi aafoommon showee toommooch neechito, baharee aacon wochiꞌi, showee toommona bi taheyemmoyich tuniibeeto, bi shigo Doono Yeerine.

⁷ Doono Yeeri ishichiye: “Israꞌeeleenaꞌote, ittoshi taach Topphiyee asheenaꞌoyee besho toono ittoshine. Ittoshin Gibitsee ta kichoommon, Filsixeemeenaꞌon Kafitooree showoochee, Sooriyeenaꞌonoo Qiiree showoochee kichito taane.

⁸ “Nuggishoo Doono Yeeri ta, axaaxechi taatittinee showoon manjii ciinnaabeeto taane. Ebi aroon showee toommoochee aalliyemmo taane. Tunebaani Yaaqobichi shiijjeroon ciroona aalliyaachemmo taane. Doono Yeeri ta, ebin getteto taane.

⁹ Illa ebiyoche, maayo gemoona woqqeyoommon, ta getoona Israꞌeeleenaꞌo woqqeyemmoyich tuniyemmo taane. Woqqaa keyiree aageteenaꞌo daggooch shacceyemminaꞌone; butto maayoochee sheqqetaa keyoommon gonde asheenaꞌo sheqqetaa kechemminaꞌone.

¹⁰ ‘Gonde mooyo noonna danemmoyich, no achooch bi shaggemmoyichoo Yeeri daaggaachemmone’ ii beeti, ta asheenaꞌo daggooch beeti axaaxechinaꞌo goraadoona qitemminaꞌone” iye.

Israꞌeeleenaꞌo Boonoshi Showooch Wottemminaꞌo Tuno

¹¹ Doono Yeeri ishichiye: “Ebi arooba, kexo dihoommon dihiti Daawitichi taatittinoon tiijji neechemmo taane; tiisheti uxeroon wochinnoon uxereree andiriyemmo taane; wochinnoon hagiree wonnee bi goorooch wochemmo taane.

¹² Ebina, echeti Edoomee showoonaa ebiyee aaf taacho tuneti bare showoo bullinon koyi yechemminaꞌone” iye ebin tuniyemmi Doono Yeeri.

¹³ Doono Yeeri ishichiye: “Qeccechinaꞌo maayoon qeci ciichaan beetaa, gochechinaꞌo, woyinee aafoon kotee beetinaꞌo hiici ciichaan beetaa, woyinee qomboon bechechinaꞌo, dabbi shaggemmi yemeeno waa beetone. Shaawi woyinee uyo guudi toommoochee xuupphemmone; geppee toommooch taheyemmone.

¹⁴ Ta asheenaꞌo tuneti Israꞌeeleenaꞌon boonoshi showooch wochiree deebemmo taane; boonoshiyoo tiisheti katemeenaꞌon wochinnoon hagiree arooch kotemminaꞌone; woyinoon bechiree woyinee uyoon uchemminaꞌone; maayoon bechiree bi aafoon maayemminaꞌone.

¹⁵ Boonoshi hajjee showooch daamiree, mixo bechoommon boonoshin bechemmo taane; boonoshich ta immeti showoochee, boonoshin waaxxemmo koniyoona aalloone” iye ittoshi Nuggishoo Doono Yeeri.