Amootsi 7 - Kafa Linguistics Project

Amootsi Yaaꞌoona Gechoo Womon Beego

¹ Ikke areddoon Nuggishoo Doono Yeeri ebi yaaꞌoon taach bekkiihe: Taatoochi maayo macaa giyitoyee gubb mocoo cammii beetaa, gechoon bi hallii beetaa beeggeho.

² Gechoo showee toommeexi mocoo bullin maa bi ciichoon beeggaꞌa, ishichaꞌa corootiyo: “Nuggishoo Doono Yeero, boonoshin ne maaremmoyich neen qollehoye. Israꞌeeleenaꞌo hakka guuteenaꞌo boonoshi tunetoyich, ebin aabichiree hakkeheete” iyo.

³ Ebich Doono Yeeri bi gaboon shaddiꞌi, “Ishigaata, illa ebi ne beeggeti mooyo tuneyaachemmone” iye.

Amootsi Yaaꞌoona Qaaqqee Naxo Kindoon Beego

⁴ Nuggishoo Doono Yeeri bare yaaꞌoon taach bekkiihe. Biyoo ashi toommooch qaaqqoon kindiyoona nalloyich qanniye. Qaaqqoo baharoon napphee ciichiꞌi, showoon michiye.

⁵ Tawoo ishichaꞌa corootiyo: “Nuggishoo Doono Yeero, ebin tuniyaahine! Israꞌeeleenaꞌo hakka guuteenaꞌo boonoshi tunetoyich, ebin aabichiree hakkeheete” iyo.

⁶ Ebich Doono Yeeri bi gaboon shaddiꞌi, “Ishigaata, ebiyoo wotta tuneyaachemmone” iye.

Amootsi Yaaꞌoona Tumbin Beego

⁷ Wotta bare yaaꞌoona ebin taach bekkiihe. Doono, tumbina qellayaa shuuneeti xaqqee uxeree gaꞌooch neexee beehe; biyoo tumbin bi kishooch yechitone.

⁸ Doono Yeeriyoo taach ishichiye: “Amootso! Ebi ne ciinnaabeeti mooyo amoone?” iye. Tawoo “Tumbine” iyo. Yeeriyoo ishichiye: “Ta asheenaꞌo tuneti Israꞌeeleenaꞌo gaꞌiitaa shuuneeti xaqqee uxeroomminaꞌo boonoshi tunoon bekkiyoyich, tumbin yaggaabeeto taane. Ebiyee gubb boonoshin maaraachemmo taane.

⁹ Guudi toommooch beeti Yisaaqi shiijjereenaꞌochi goyinnee xaaꞌeenaꞌo aallemminaꞌone. Israꞌeelee showeexi yaafe xaaꞌeenaꞌo happee aallemminaꞌone. Yeroboꞌami shiijjereenaꞌo toommooch tiyiree goraadoona boonoshin aalliyemmo taane” iye.

Amootsinaa Amasiyaasinochi Mooyo

¹⁰ Beeteeli beeti yaafee kexooch qeeshee guudo tuneti Amasiyaasi Israꞌeelee taatoo Yeroboꞌam waan wochoon daachiiꞌi ishichiye: “Amootsi Israꞌeeleenaꞌo daggooch tuneechii ne toommooch kocee beetone. Ebi showoon xafiibeeti bi yibbaatoon kootiito aalloone.

¹¹ Biyoo ‘Yeroboꞌami ginoochaa qitemmone. Israꞌeeleenaꞌoo boonoshi showoochee kecaa hammemminaꞌone’ ii beetone” iye.

¹² Aroochee Amasiyaasi Amootsich ishichiye: “Yaaꞌechocho, Yihudee showooch tiyi hamiree, aroochaa keembe; ne maayemmonoo boonoshi waanee danebe!

¹³ Tunebaani Beeteeli, taatee goyinnee xaaꞌoonaa taatee showee yaafee kexona bi tunetoyich, guttinnoon hiniichaa keemoon keemmaahine” iye.

¹⁴ Aroochee Amootsi Amasiyaasich ishichiye: “Ta, gijjee qiddoonaa caaree bechechona taalli, keemecho woyee keemechochi bushoo toono taane.

¹⁵ Tunebaani Doono Yeeri taan, gijjee hillooch dabboochee deebiꞌi, ‘Hamiree ta asheenaꞌo tuneti Israꞌeeleenaꞌoyich keemoon keembe’ iye.

¹⁶ Illa and Doono Yeerichi qaaroon waayebe! Newoo ‘Israꞌeeleenaꞌoyich keemmaahine; Yisaaqichi shiijjeroyich qoqqaahine’ iyine.

¹⁷ Illa ebich Doono Yeeri ishichiye: ‘Ne mechee katemee daggooch yahechi tunemmine. Ne anaami bushiishoonaa maache bushiishoona ginoochaa qitemminaꞌone. Ne showoo woderoona qoodaa ashich ichemmone. Newoo yaafeyaani showoochaa qitemmo neene. Iberoon, Israꞌeeleenaꞌoo boonoshi showoochee kecaa hammemminaꞌone’ itone” iye.