Amootsi 6 - Kafa Linguistics Project

Israꞌeeleenaꞌo Naxeyoo

¹ Tsiyooni katemooch mashaamiti beemon beeti, Shamaari guudooch keqqaalloon koteti, boonoshin ittoshi gaachemmoyich Israꞌeeleenaꞌo ittoshi waan waabeeti, showeenaꞌo daggoochee ikkinnoo tuneti Israꞌeelee showee aricheti iraasheenaꞌote, ittoshich woowo!

² Ittoshiyoo ittoshi asheenaꞌoyich, “Eke Kalini katemooch hambote; aricheti katemoo tuneti Hamaat hambote; wotta Filsixeemeenaꞌochi katemoo tuneti Gaat hambote. Ebi areenaꞌo Yihudee showoonaa Israꞌeelee showoonoyee besheheete? Boonoshi showoo ittoshi showoyee beshehe?” iyote.

³ Duꞌo shaggemmi aaboon wokkiiꞌi ciinniibeeti, gonde mooyo showee toommooch taatemmoyich tuniibeeti ittoshich woowo!

⁴ Dangeyi gashoona gaawicheeti qeenooch qeyiibeeti, mashaamiti qeenooch teeqqeechi, bagee baaddoonaa bariyoonochi meenon maabeeti,

⁵ Daawitichoommon andire shoddoon kichiꞌi, ooge ximboon yexxii kaachiibeeti,

⁶ koofoona woyinee uyoon yiifeebeeti, gaawe cinnechi shittoon huuteebeeti, tunebaani Israꞌeeleenaꞌochi aalloyich aaxxiyaani ittoshich woowo!

⁷ Ebich kecooba ittoshi shiichoo tunemmo ittoshine. Ebina gifiroon geddii ittoshi mamonaa uyona arooba echemmone.

⁸ Beshe Mawe Nuggishoo Doono Yeeri bi qelloona wogeꞌi ishichitone: “Israꞌeeleenaꞌochi geecoon tiyaareto taane; boonoshi taatee kexinaꞌonoo shixxeto taane. Boonoshi inde katemoonaa bi daggooch beeto bullinon ettoyich beshii immemmo taane” itone.

⁹ Ikke kexooch aashire asheenaꞌo echegaata, boonoshiyoo wotta qitemminaꞌone.

¹⁰ Dubenoon daami duukkemmi ikke xiboo waa kichi daamibee, kechi maac gatooch beeti uroon ceegiree, “Neenna tookkii echeti asho beete?” gettemmone. Biyoo “Koniyoona aalloone” gettemmone. Are xiboo wochiree, “Qaariyaahine! Doono Yeerichi shigoon ceego nooch qaawiyaache” gettemmone.

¹¹ Doono Yeeri getaa ogooge kexonaa gishiishi kexona tiisheree burico tunemmone.

¹² Hareshoo xaqqee guudi toommona wocon hakkehe? Asho baharoon gattoona goyon hakkehe? Tunebaani ittoshi dayinnetoon xuppattoon, cadiqee shuunoonoo caammeroon, tuniihote.

¹³ Lodebaari katemoon ittoshi yechitoyich geecoona ciixeebeeto ittoshine; wotta “Qarinayimi katemoon no yecheto no giidoonane” ii beeto ittoshine.

¹⁴ Beshe Mawe Nuggishoo Doono Yeeri ishichitone: “Israꞌeeleenaꞌote, tunebaani ta, ittoshi toommooch aagetee asheenaꞌon tiijjemmo taane. Boonoshiyoo Hamaati katemooch beshe kaattoochee tiijjiree Arabee woce aacooch beddaahaa ittoshin duꞌiyemminaꞌone” itone.