Amootsi 4 - Kafa Linguistics Project

¹ Bashaani beeti, shiimetaa yecheti miiminaꞌo aangoommon aangiti Shamaari genneenaꞌote, ebin waayebote! Ittoshi, hakka guutoon xuqqiyote; girechonoo giishiihote. Ittoshi keneenaꞌon “Uyoon nooch ittoshi deebaa uyone” iyote.

² Nuggishoo Doono Yeeri bi yaafittinoona ishichiꞌi wogetone: “Qamaaxiroona yeshaa ittoshi hammemmi aabo shaggitone; ittoshi daggoochee koniyoona echeyaanoon haashe yeshe qamaaxiroona yeshaa hammemmo ittoshine.

³ Ittoshiyoo uxeree tiishee aahoona geechaa hamiree Harmoon waan duppeyemmo ittoshine” iye Doono Yeeri.

Israꞌeeleenaꞌo Getaa Waayeyaaneenaꞌo Tuno

⁴ Doono Yeeri ishichiye: “Israꞌeeleenaꞌote, akehe, cikki Beeteel beeti goyinnee xaaꞌooch hamiree axaaxoon shuune beebote! Galigal hamiree ittoshi hakkimmi wottoon axaaxoon shuune beebote! Maaddi maaddoona deejjee gijjoon, keejj keejje qemona asraatoon giddii beebote!

⁵ Koshon galletee deejjoyich giddii beebote! Ittoshi mullee daaggoona ebin ittoshi giddii beetoyich naadee beebote! Ittoshi qaawiibeeto ebin tuniyooniye, iye Nuggishoo Doono Yeeri.

⁶ “Katemoo bulliich manjeyemmi maayo aallemmoyich tuniyaꞌa, ittoshi gammo gawemmoyich tuniito, ta qelloona taane. Tunebaani ittoshi, ta waan wotteyaano ittoshine, iye Doono Yeeri.

⁷ “Ittoshi maayo qecceyoyich batt keejje ageno echeechaa, amiyo dihaachemmoyich tuniihoye. Ikke katemooch bi dihemmoyich tuniichaa bare katemoochee aalliihoye. Ikke showooch dihiye; tunebaani dihaanoon bi qajjiti showoo shuuqqiye.

⁸ Meeti katemeexi asheenaꞌo shacheweꞌi, aachi qaawooch ikke katemooch hammiyeete; tunetaa bede aacon daneꞌi boonoshi shachewoon kuxaaneenaꞌone. Tunebaani ittoshi, ta waan wotteyaano ittoshine, iye Doono Yeeri.

⁹ “Wooqoonaa cindoonon deejjaꞌa ittoshi maayoon aalliihoye. Ittoshi daaddee goyoonaa woyinee goyoonon, balaasee mixonaa zayitee mixonon gechoo aalliihe. Tunebaani ta waan wotteyaano ittoshine, iye Doono Yeeri.

¹⁰ “Gibitsee showoon ta yexoommon, biiyoona ittoshi showoon yexxehoye. Ittoshi gurimaasheenaꞌo ginoochaa qitemmoyich, ittoshi haresheenaꞌoo kecaa hammemmoyich tuniihoye. Ittoshi kaamboochaa qititi asheenaꞌochi dubeno ittoshi muddooch bi shaaqqemmoyich tuniihoye. Tunebaani ta waan wotteyaano ittoshine, iye Doono Yeeri.

¹¹ “Sodoominaa Gomoorinon ta aalliyoommon ittoshi daggoochee ikkikkeenaꞌon aalliihoye; ebi aroochee muricciꞌi ittoshi kechito, ciifo qaaqqee daggoochee keyoommoniye. Tunebaani ta waan wotteyaano ittoshine, iye Doono Yeeri.

¹² “Israꞌeeleenaꞌote, ittoshin naxeya ii beeto taane; ittoshin naxeya ta ii beetoyich, ittoshi Nuggishoo taanna daneya qannibote” iye.

¹³ Guudinaꞌon shuuneto, yongoon hallito, bi gaboo amo gaata ashich arichiibeeto, hariton xumiibeeto, showee toommeexi tukki xaaꞌoona shaꞌeebeeto, bi shigoo, Beshe Mawe Nuggishoo Doono Yeerine.