Amootsi 3 - Kafa Linguistics Project

¹ Israꞌeeleenaꞌote, Gibitsee bi kichiti asho ittoshi bulli toommooch Doono Yeeri gettiibeeti mooyon waayebote:

² “Showee toommooch beeti aagetee asheenaꞌo bulli daggoochee kaaccaꞌa shiimaa ta yecheto ittoshin baachiye. Ittoshi gondoyich ittoshin ta sheeraabeeto ebichiye” itone.

Keemecho Yeer Waanee Waayeꞌi Keemmiibeeto Bi Tuno

³ Taajjeꞌi daneyaanoon, gutte asheenaꞌo tookkii hamon hakkeheete?

⁴ Daaheroo bi yechemmi mooyo aalloon baad cikki kubbi daggoochaa gigehe? More daaheroo bi maayemmi mooyon yeshaanoon bi beeyi xaaꞌoochaa baad cikki cookehe?

⁵ Kafee shaacheyaani ollooch giyi yecheyehane? Ollo biin shuurikkiti mooyo aalloon hacinnehe?

⁶ Katemee daggooch tiroo (waaringo) hukketaa waayeechi, asheenaꞌo keqqaacheheete? Doono Yeeri daaggaanoon, gonde mooyo katemee daggooch tunehe?

⁷ Iberoochaa Nuggishoo Doono Yeeri bi maacee mooyon, bi guuninaꞌo tuneti keemechinaꞌoyich getaanoon amoonolla tuniyaache.

⁸ Daaheroo ciddiye; keqqaachemmo konine? Nuggishoo Doono Yeeri yibbaatehe; keemo keemaachemmo konine?

Shamaari Dihoo

⁹ Ashidoodee showoonaa Gibitsinooch beeti taatee kexinaꞌooch beetinaꞌoyich awaajjibote; boonoshich ishichibote: “Shamaari geppeenaꞌooch waaree, katemee daggooch beeti xuꞌoonaa oogeti dulloonon beegote” getote!

¹⁰ Doono Yeeri ishichiye: “Ebi asheenaꞌo ashoon xuqqii, boggiꞌi boonoshi deebiti qiicoona boonoshi taatee kexinaꞌooch ceechitinaꞌone; deꞌe mooyon tuniyoon ciroona ariyaaneenaꞌone.

¹¹ Illa ebich, etto ittoshi showoon giishi yechemmone; ittoshi mishigoon happemmone; ittoshi kexonoo boshemmone” iye Nuggishoo Doono Yeeri.

¹² Doono Yeeri ishichiye: “Shamaara beeti Israꞌeeleenaꞌochi wodoo bi tunemmo, qiddoo daaheroochi kookkoochee bi bagoochi gutte baatee shaawushoon woyee waamon dichiiꞌi bi deeboommoniye. Boonoshi qeechi degoonaa teeqqonoyee besh boonoshich echemmi mooyo amolla daneyaachemmone.

¹³ Illa ebin waayeree Yaaqobi shiijjereenaꞌo toommooch miixebote” iye Beshe Mawe Nuggishoo Doono Yeeri.

¹⁴ “Israꞌeeleenaꞌon boonoshi axaaxoyich ta naxehooba, Beeteeli beeti deejjee gudoon happi aalliyemmo taane; deejjee gudee qareenaꞌo tiisheree showooch hollemminaꞌone.

¹⁵ Qaawoon boonoshi beshiibeeti boonoshi kexonaa yooyon boonoshi beshiibeeti kexonon happi aalliyemmo taane; dangeyi gashoona gaawicheeti boonoshi kexo happeyemmone; meeti kexo bulli happaa aallemmone” iye Doono Yeeri.