Amootsi 2 - Kafa Linguistics Project

¹ Doono Yeeri ishichiye: “Moꞌabee asheenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo Edoomee taatoochi shaawushoon michiꞌi tulloo boonoshi tuniitoyichiye.

² Ebich Moꞌabee showooch qaaqqoon geddemmo taane; Qiriyooti katemeexi taatee kexinaꞌonoo michi aalliyemmone. Moꞌabee asheenaꞌo ginee koyeexi dulloon, cookoonaa tiree qaaroonon waayebee qiti ciiremminaꞌone.

³ Boonoshin qeejjii beetonaa iraasheenaꞌo bullinon wuxi ciichemmo taane” iye Doono Yeeri.

Yihudee Asheenaꞌo Toommooch Kindemmi Nalloo

⁴ Doono Yeeri ishichiye: “Yihudee asheenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo ta sheeroon boonoshi qallayitoyich, ta qociyoonoo quyo boonoshi qajjitoyichiye. Boonoshi qaabbechinaꞌo goyinnee maddeti nuggisheenaꞌo boonoshin muriciitinaꞌone.

⁵ Ebich Yihudee showooch qaaqqoon geddemmo taane; Yerusaalem beeti taatee kexinaꞌonoo michi aalliyemmone” iye.

Israꞌeeleenaꞌo Toommooch Kindemmi Nalloo

⁶ Doono Yeeri ishichiye: “Israꞌeeleenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo cadiqe asheenaꞌon boonoshi hiishoyich, girechinaꞌonoo caammoyicha iꞌi, guuchittinooch boonoshi kemmitoyichiye.

⁷ Girechinaꞌon buttooch dichiichii boonoshi qellooch qappiyeete; gitteenaꞌonoo gommoochee xuqqii wochiyeete. Bushoonaa nihoona ikke gonneen qeyiyeete; ebich yaafe ta shigo eeꞌehe.

⁸ Deejjee gudo bullichi gaꞌooch hammiꞌi, yechiyoo boonoshi deqqiti tahoon yaggiꞌi tokketeheete. Boonoshi Nuggishoo ta yaafee kexoochaa, qocoo boonoshi deqqiti woyinee uyoon uchiyeete.

⁹ “Ta asheenaꞌote, ittoshicha iyaꞌa yigoommi genjeenaꞌo, uxeree mixoommi manjeenaꞌo tuneti Amooree asheenaꞌon cammona waaxeree boonoshi aallemmoyich tuniihoye.

¹⁰ Boonoshi showoon ittoshi woraashemmoyich, Gibitsee ittoshin kichaꞌa aabbe naton barahoona yaabiyoye.

¹¹ Ittoshi anaami bushiisheenaꞌo daggoochee ikkikkeenaꞌon keemechinaꞌo, ittoshi gurimaasheenaꞌo daggoocheenoo ikkikkeenaꞌon Naazireenaꞌo tuniihoye. Israꞌeeleenaꞌote, ebi iberoo toone?” iye Doono Yeeri.

¹² “Tunebaani ittoshi Naazireenaꞌoyich woyinee uyoon uchiyote; keemechinaꞌonoo ‘Ciroona keemmaahote’ iꞌi bajjiyote.

¹³ Illa and maayo xaaneeti gaari neexxii pharixoommon ittoshin neexi pharixxemmo taane.

¹⁴ Kupphe woccecholla murici wodaachemmone; giidechoo giidoo muccemmone; ginee anaamolla bi qelloon wodiyoon hakkaachemmone.

¹⁵ Shangoona koyeebeeto gubb shokemmone; baata kettolla woci wodaachemmone; hareshechoo bi kashoon wodiyoon hakkaachemmone.

¹⁶ Ebi arooba mulli kuppho tuneti ginee naayolla bi ginee qiicoon dufiichi woccemmone” iye Doono Yeeri.