Amootsi 1 - Kafa Linguistics Project

¹ Uziyaahi Yihudee taatoo, Yehoꞌashi bushoo Yeroboꞌamiyoo Israꞌeelee taatoo tuneꞌi boonoshi beehooba, ebiyoo showee qewoyee gutte natoyee aaf, Teqoꞌa beeti qiddeenaꞌo daggoochee ikkoo tuneti Amootsich Doono Yeeri yaaꞌoona Israꞌeeleenaꞌochon bekkiihe.

² Amootsiyoo ishichiye: “Doono Yeeri Tsiyooni guudi toommoochaa daaheroochoommon ciddii beetone; Yerusaalemaa gigeebee bi qaaroon waayii beetone. Gijjoo quyeebeeti gaddeexi mocoo shoollitone; Qermeloosi guudi toommeexi mocoo shuuqqitone” iye.

Bare Taatee Showeenaꞌo Toommooch Kindemmi Nalloo

³ Doono Yeeri ishichiye: “Damaasiqi asheenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo asho maayi buchi qiicoona maayoon bi bushoommon Gilaadee asheenaꞌon boonoshi buchitoyichiye.

⁴ Ebich Hazaheeli kexooch qaaqqoon geddemmo taane; Been Hadaadichi taatee kexinaꞌonoo michi aalliyemmone.

⁵ Damaasiqi katemee uxeree kellee tuggoon tiichemmo taane; Aweeni bamboochee taatoon, Beet Edenee taatee gumbo yechiton aalliyemmo taane. Sooriyeenaꞌo Qiiree showooch kecaa hammemminaꞌone” iye Doono Yeeri.

⁶ Doono Yeeri ishichiye: “Gaazi asheenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo asheenaꞌo bullin keccii daammiꞌi Edoomee showooch boonoshi kemmitoyichiye.

⁷ Ebich Gaazi katemee xaqqee uxerooch qaaqqoon geddemmo taane; bi taatee kexinaꞌonoo michi aalliyemmone.

⁸ Ashidoodi taatoon, Ashiqeloonee taatee gumbo yechiton, aalliyemmo taane. Eqirooni toommooch ta mochoon tiijjemmo taane; Filsixeemee cureenaꞌoo qiti ciiremminaꞌone” iye Nuggishoo Doono Yeeri.

⁹ Doono Yeeri ishichiye: “Xiroosi asheenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo manaamanittinee wogoon biichiꞌi, kecceti asho bullin Edoomee showooch boonoshi kemmitoyichiye.

¹⁰ Ebich Xiroosi katemee xaqqee uxerooch qaaqqoon geddemmo taane; bi taatee kexinaꞌonoo michi aalliyemmone” iye.

¹¹ Doono Yeeri ishichiye: “Edoomee asheenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo goraadoon yechiꞌi boonoshi maneenaꞌon boonoshi yookkii dabbitoyichiye. Boonoshichoo ariqqemmon qajjitinaꞌone. Boonoshi toommooch ippeechii wotteyaache iitinaꞌone.

¹² Ebich Temaani katemooch qaaqqoon geddemmo taane; Botsira beeti taatee kexinaꞌonoo michi aalliyemmone” iye.

¹³ Doono Yeeri ishichiye: “Amoonee asheenaꞌo wochii wochii boonoshi shuuneti axaaxoyich, boonoshin naxeyaanoon qayaachemmo taane. Ebiyoo boonoshi showee danoon gamichoyich koyaabee, Gilaad beeti yeqqefechi maacheenaꞌochi maacoon boonoshi gohii kichitoyichiye.

¹⁴ Ebich Raabi katemee xaqqee uxerooch qaaqqoon geddemmo taane; bi taatee kexinaꞌonoo michi aalliyemmone. Aroochee koyooba cookoonaa dulloona woddemmone; koyoo yubee yongo afaafinoommon afaafinemmone.

¹⁵ Boonoshi taatoo iraasheenaꞌona tookki kecaa hammemmone” iye Doono Yeeri.