Abidiyi 1 - Kafa Linguistics Project

Edoomeenaꞌo Toommooch Shaggemmi Naxo

¹ Edoomee asheenaꞌochon Nuggishoo Doono Yeeri Abidiyich bekkiiti yaaꞌoo: Wochoon Doono Yeer waanee waayeto noone. Aageteenaꞌo waan wocheyechon bi daachiitaa, “Tibote, Edoomeenaꞌon keyi koyone” itone.

² Doono Yeeri Edoomich ishichiye: “Aageteenaꞌo daggooch neen giishiyemmo taane; oogeton hoxeeto tunemmo neene.

³ Ne geecoo neen dawushitone. Ne inde katemoo manje xaqqoona uxereetone; ne beeyi xaaꞌoo guudi cullullooch shuuneetone; ebich newoo ne mulloona ‘Hiniichee taan geechi kindiyemmo konine?’ ii gabiibeeto neene.

⁴ Tunebaani booyochoommon tukkoona ne yoobbetaanona; ne kexon xojjeneenaꞌo daggooch ne tuniitaanona, ta, aroochee neen geechi kindiyemmo taane, iye Doono Yeeri.

⁵ Gaayeenaꞌo woyee bokkeenaꞌo xumoona boonoshi waagaata, boonoshi daammemmo, boonoshi qaawiton baachiye. Woyinee aafoon macii beetinaꞌo, butteyemmon echii beetinaꞌone. Tunebaani am shaahe aallo neen quyeebeete!

⁶ Esayichi shiijjereenaꞌote, am shaahoon bokkehote! Ittoshi qiiceenaꞌo am shaahoon bosheeheete!

⁷ Ne yeshechinaꞌo bulli neen dachemminaꞌone; ne showoochee neen yoohi kichemminaꞌone; ne shunechinaꞌo neen koyi wochemminaꞌone; ne maayoon maatinaꞌo neech olloon ollemminaꞌone; boonoshiyoo neen, ‘Bi ariyoo aaye?’ gettemminaꞌone.

⁸ “Edoomeenaꞌon ta naxehooba, ariyechinaꞌon Edoomee showoochee, shalligechinaꞌonoo Esayichi guudi toommoochee aalliyemmo taane, iye Doono Yeeri.

⁹ Temaani katemeexi ginee anaaminaꞌo keqqemminaꞌone; asho bulli Esayichi guudi toommoochee wuxaa aallemmone.

Edoomeenaꞌo Naxeyemmi Naboo

¹⁰ “Ne manoo Yaaqobichi shiijjereenaꞌon ne xuqqetoyich, oogichi yeellemmo neene; bulli yemeenoonoo aallemmo neene.

¹¹ Etteenaꞌo boonoshi kelloon tiichiꞌi giyiyooba, Yerusaalemi gaannoon ixoona boonoshi qoodeehooba, ebi arooba wokkaꞌa neexeto neene; newoo boonoshi etteenaꞌoochee ikkoon tuneto neene.

¹² Gonde mooyo ne maneenaꞌo toommooch shagiyooba, diiga bedaano neene; boonoshi aallee aabooba, Yihudee asheenaꞌo toommooch emira bedaano neene; boonoshi duꞌee aabooba geeca bedaano neene.

¹³ Boonoshi iritee aabooba, ta asheenaꞌochi uxeree kelloona giyi bedaano neene; boonoshi iritee aabooba, boonoshin diiga bedaano neene; boonoshi iritee aabooba, boonoshi hajjiton bogg bedaano neene.

¹⁴ Aroochee muriccitinaꞌon yecha, gommi kaattooch neex bedaano neene; boonoshi duꞌee aabooba, ebi muriccitinaꞌon boonoshi etteenaꞌoyich beshii imm bedaano neene.

Aageteenaꞌo Toommooch Yeeri Nallemmo Tuno

¹⁵ “Aageteenaꞌo bulli toommooch, Doono Yeeri ta, nallemmi aabo shaggitone; ne shuuneto ne toommooch shuuneyemmone; ne shuunetoommon danemmo neene.

¹⁶ Yaafeeti ta guudi toommoochaa, ta asheenaꞌo xuuxee xoofoochee uyoommon, guudoona beeti aageteenaꞌo bulli aaboon uchemminaꞌone; uchemminaꞌone; yiifemminaꞌone; aroocheenoo ciroona aallemminaꞌone.

Israꞌeeleenaꞌo Wudoon Danemminaꞌo Tuno

¹⁷ “Tunebaani Tsiyooni guudi toommooch, aalloochee muriccitinaꞌo danemminaꞌone; ebi xaaꞌoo yaafe xaaꞌoo tunemmone; boonoshi hajjoo tuneti showoon Yaaqobichi asheenaꞌo wochinnoon woraashemminaꞌone.

¹⁸ Yaaqobichi kechi asheenaꞌo qaaqqoon, Yooseefichi kechi asheenaꞌo qaaqqee aaxxoon tunemminaꞌone. Esayichi kechi asheenaꞌo galloon tunemminaꞌone; galloon michoommon boonoshin michi aalliyemminaꞌone. Esayichi kechi asheenaꞌo daggoochee murici wodemmo daneyaachemmone” itone Doono Yeeri.

¹⁹ Negeebee asheenaꞌo Esayichi guudinaꞌon, Shefeeli worebe showeexinaꞌoo Filsixeemee showoon yechemminaꞌone; Efreemee showoonaa Shamaaree showoonon yechemminaꞌone; Biiniyaamee asheenaꞌoo Gilaadee showoon yechemminaꞌone.

²⁰ Dambi-waani Israꞌeelee showoochee kecaa hammitinaꞌo, Tsarefaati katemooch beddaahaa beeti Kanaanee showoon yechemminaꞌone; Yerusaalemee Sefaraad kecaa hammitinaꞌo, Negeeb beeti katemeenaꞌon yechemminaꞌone.

²¹ Esayichi guudon hajjoyich, kochii wochechinaꞌo tuneti asheenaꞌo Tsiyooni guudi toommooch kechemminaꞌone; taatittinoo Doono Yeericho tunemmone.