3 Yowannisi 1 - Kafa Linguistics Project

Diggiyoo

¹ Geeno ta waanee, Iberoon ta shunnaabeeti ta shunechi Gaayoosich.

² Ta shunechocho! Kiristoosi toommooch mullee tooꞌiyoona ne kupphaa beetoommon, ebiyoommon wotta bulli mooyo neech kaamemmonaa achee diggoo neech bi tunemmonoyich corootaabeeto taane.

³ Ne beetoochee waati maneenaꞌo iberoona ne shaꞌoonaa gibeneeto tunaꞌa iberee qaaroyich ne qanaatoonon taach boonoshi getaa waayaꞌa oogichaa emirito taane.

⁴ Ta bushiisheenaꞌo iberoona boonoshi shaꞌoon waayoyee beshe emiroo taach aalloone.

Galleto

⁵ Ta shunechocho! Neech dallaaweenaꞌo boonoshi tunetaanoona, maneenaꞌoyich ne tuniibeeti mooyo bullina gibeneeto neene.

⁶ Boonoshiyoo hiniich kiceeti kittinnee guuphi asheenaꞌo aafooch neexeꞌi boonoshin ne shunon miixetinaꞌone. Andoo Yeerin ne emirikkemmoyich, boonoshi gommoyich shoho tunee ne gaachegaata, gaawe shuunoon shuunemmo neene.

⁷ Ebiyoo, aageteenaꞌo waanee amoonolla deꞌaanoon, Kiristoosi shigoyich boonoshi kechitoyichiye.

⁸ Ebich iberee shuunoon qoodeyecho no tunemmoyich, ebiyoommi asheenaꞌon no iibbiyoo bede mooyone.

Diyotrofesi Ittibateyoonaa Demexiroosi Naadeyoona

⁹ Ebiyee aaf ne beetooch beeti kittinnee guuphi asheenaꞌoyich koorito taane; tunebaani bi qelloon ukkiriyoon qaawiibeeti Diyotrofesi no gaboon deꞌaache itone.

¹⁰ Ebich, ittoshi waan ta waahooba, noon oonniibee no toommooch bi shuuneebeeti gonde shuunoon ittoshich bekkiyemmo taane. Ebi ikkeeto baach toonoone. Aroo bi qelloona kittinnee maneenaꞌon iibbiyaache; iibbii beetinaꞌon bajjiꞌi kittinnee guuphi daggoochee kichii yookkiye.

¹¹ Ta shunechocho! Deꞌeenaꞌon shaahiballi gondeenaꞌon shaahiyaahine. Deꞌoon shuuneebeeto Yeer magechone; gondoon shuuneebeeto Yeerin beegaanoone.

¹² Demexiroosich ashoo bulli miixee beetone; iberoo bi qelloona miixee beetone. Nowoo wotta miixaabeeto noone; no miixeti miixoo iberoo bi tunoon ariibeeto neene.

Ciireexi Diggiyoo

¹³ Neech ta kooreshi meeti mooyo beete; tunebaani koorichoon koorii geton qaawaache.

¹⁴ Tunetaa katinoon aafoona ciineeree no yibbaatemmoyich gibenaabeeto taane.

¹⁵ Diggebe! No shunechinaꞌo neen diggii beetinaꞌone. Ne beetooch beeti no shunechinaꞌon boonoshi shigi shigoona ceegiree no keroon diggiibe.