2 Yowannisi 1 - Kafa Linguistics Project

Diggiyoo

^1-2 Geeno ta waanee, No daggooch iberee qaaro bi beetoyich, bulli yemeenoonoo noonna tookki beeyemmo bi tunetoyich, iberoon ta shunnaabeeti, ta ikkeeto baach tuneyaanoon iberoon arii beetinaꞌo bulli wotta shunniibeeti, Yeeri kaacciti indeenaa bi bushiisheenaꞌonoyich:

³ Nihoo Yeerinaa bi Bushoo Yesuus Kiristoosina waanee wojjoo, ariqqoonaa diggoona, iberoonaa shunoona tookki nooch tunemmone.

Iberoona Shaꞌoonaa Noonnaa Noonna Shunoona

⁴ Nihoo Yeeri nooch gettitoommon ne bushiisheenaꞌo daggoochee ikkikkeenaꞌo iberoona shaꞌee beetinaꞌon ta danetoyich, oogichaa emirito taane.

⁵ Andoo genneene! Noonnaa noonna no shunemmoyich qollehoye. Ta hinin neech ta kooraabeeto, shiichoochee tiijjiꞌi Yeeri nooch bi gettiti getoonalli, andire getoon toonoone.

⁶ Shuno geto, Yeerichi getoon ceechoona beemo getone; shiichoochee tiijjiꞌi ittoshi waayetoommon, Yeerichi geto “Shunoona beebote” ii beetone.

⁷ “Yesuus Kiristoosi asho tuneꞌi waataanoone” ii beeti meeti muricciyechinaꞌo hini alemooch kechitinaꞌone. Ebiyoommi asho Kiristoosina koyechonaa muricciyechonane.

⁸ Illa Yeeri ittoshich bi qanniiti wojjoo bullin ittoshi deqqemmoyichalli, aayiree ittoshi mucceyaachemmoyich ittoshi qelloon quyebote!

⁹ Kiristoosi dojjiti doyoochee kechiꞌi baroo waan hammii beetonaa manjaanoonoyich Yeeri aalloone; Kiristoosi dojjiti doyoona manjii beetoyich Nihoo Yeerinaa bi Bushoona beetinaꞌone.

¹⁰ Ittoshi waan waammo koniyoona bi tunegaata, ebiyoommi doyoon yechiꞌi bi womo qayigaata, ittoshi kexooch giijjiyaahote; biin diggiyaahote.

¹¹ Ebiyoo, biin diggiibeeto are gondoon shuunee beetona tookkii ikkottee bi beetoyichiye.

Ciireexi Diggiyoo

¹² Ittoshich kooriya ta qaawiti meeti mooyo beetone; tunebaani woraqatee toommooch qalemoona kooroon qaawaache. Oogichi no emiremmoyich, ittoshi waan waaree aafoona ciineeree no yibbaatemmoyich gibenaabeeto taane.

¹³ Yeeri kaacciti ne maneechi bushiisheenaꞌo neen diggii beetinaꞌone.