Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Ximootiyoosi 4 - Kafa Linguistics Project

1 Kiristoos Yesuusi hini showooch wotteree taatemmo bi tunetoyich, Yeeri aafoochaa, kashechinaꞌonaa qititinaꞌonochi toommooch nallemmi Doono Yesuus Kiristoosi aafoochaanoo hini mooyon neech adereto taane:

2 Yeerichi qaaroon awaajjibe; yemeeno mashaamitaa, mashaamoo bi qajjitaa, kuppheree ebin tuniibe; ittibatebee, kaare ciicibeeshoo, oogeti haaꞌiyoona dojjibe.

3 Ebin ta gettaabeeto, asho hini gaawe kittinnittinee doyoon qajje bi gettemmi yemeeno woyemmo bi tunetoyichiye. Baribare ariyoon waayeya waamon qaacheree boonoshi qaatoon ceechemmi dofee dojjechinaꞌon boonoshi waan ceegi kicemminaꞌone

4 Ebich iberoon waayoochee boonoshi waamon bajjemminaꞌone; aroochee tochoon waayoyich shokemminaꞌone.

5 Tunebaani ne, bulli mooyona ne qelloon quyebe; xuuxo shagiyooba kupphebe; mishiraachee qaaroon getonoo kuxxaaye. Kiristoosich maddoyich ne waanee qaaweemmi mooyo bullin ceechiree maddebe.

6 Uyee deejjoochoommon ta kasho deejjeya ii beetone; Yeer waan ta hammemmi aabo katinnitone.

7 Gaaweti qiiccoon qiicceto taane; ciirooch beddaahaa dihaanoon wocceto taane; Kiristoosi toommooch mullee tooꞌiyee doyoonoo manjiiꞌa quyeto taane.

8 Illa echeto, Yeeri taach wojjiya bi qanniiti cadiqee gubbichoone; aroonoo kaachii nallechi Doono Yesuus Kiristoosi nallee aabooba taach immemmone; bi immemmo, ta ikkeetoyich baach toonoone; bi womon sharaatee beetinaꞌo bullichiye.


Bi Qellichon Phawuloosi Geto

9 Kaateree ta waan ne woyemmoyich kupphebe.

10 Deemaasi hini alemoon shunniꞌi taan qajjii Tasaloonqa hammitone; wotta Qerqiisiyoo Galaatee showooch, Titoosiyoo Dalimaatee showooch boonoshi hammiichaa,

11 Luqaasi baachiye taanna tookkii beeto. Maariqoosi shuunoona taan gaachaabeeto bi tunetoyich, biinoo yeshi wobe.

12 Tikiqoosin Efesoon wocheto taane.

13 Hach waabee Xiroꞌadi katemeexi Kaariphoosi kexooch ta geddeti kobboritoonaa macaafeenaꞌonon, ebiyeenoo gooqqooch kooreetinaꞌon yeshiree wobe.

14 Gooshukkoo Iskindiroosi oogichii taan xuqqitone; Doono bi shuunoon wochiree biich gaaccemmone.

15 No gettaabeeti mooyon happiya oogichii bi qiiccetoyich, ne wotta bi waanee ne qelloon quyebe.

16 Batti batti ta taggoyich ikkolla taan gaacheyaanoon bulla qajjitinaꞌone; Yeeri ebi xuꞌoon boonoshi toommooch haddaaye.

17 Tunebaani mishiraachee qaaroon bechee shuunoo taanna bi ceennemmonaa Aageteenaꞌo bulli waayemmonoyich, Doono Yesuusi ta gaꞌooch neexeꞌi taan kupphiihe; daaheree gammoocheenoo taan wodiihe.

18 Doono Yesuus Kiristoosi gonde mooyo bulliichee taan echiyemmone; wodiiree shimaajji bi taatittineech taan giijjemmone; bulli yemeenoon oogee yiiroo biich tunebe. Ameena.


Ciireexi Diggiyoo

19 Phirisqilinaa Aqilinoyich, Honesifoorichi kechi asheenaꞌonoyichoo ta diggiyoon beechibe.

20 Erasxoosi Qorontoosiye bi echeto; Xirofimoosiyoo biiyee bi getaa, Miliixi katemooch echiito taane.

21 Yooyo giyaan beetaa, ta waan ne woyemmoyich kupphebe. Ebuloosi, Phuudeesi, Linoosi, Qelawudinaa hiniich beeti kittinnee maneenaꞌo bullina neen diggii beetinaꞌone.

22 Doono Yesuus Kiristoosi neenna tookki tunebe. Yeerichi wojjoo ittoshi bullina tookki tunebe.

SIM International, 2020.

ကြှနျုပျတို့နောကျလိုကျပါ:



ကြော်ငြာတွေ