2 Ximootiyoosi 3 - Kafa Linguistics Project

Ciiree Aabooba Tunemmi Mooyo

¹ Ebin ariibe! Ciiree aabo katiniyooba, xuuxiyemmi yemeeno woyemmone.

² Asheenaꞌo boonoshi qelloon shunnii beetinaꞌo tunemminaꞌone; gijje shuneenaꞌo, naadeyechinaꞌo, geecechinaꞌo, naagechinaꞌo, boonoshi nihoonaa indeenoyich deꞌa getaaneenaꞌo, galleteyaaneenaꞌo, yaafe mooyon eeꞌii beetinaꞌo,

³ ashoon shunaaneenaꞌo, ashich maaroon imon shunaaneenaꞌo, oonechinaꞌo, boonoshi qelloon quyeyaaneenaꞌo, maacmanjeenaꞌo, deꞌe mooyon shunaaneenaꞌo,

⁴ ashoon beshii immechinaꞌo, afaafinechinaꞌo, geecechinaꞌo, Yeeriyee beshiiꞌi boonoshi qaatee ceechoon shunnii beetinaꞌo tunemminaꞌone.

⁵ Boonoshiyoo Yeerich goyinnee beetinaꞌon shaahibeetani, goyinneechi giidoon nookketinaꞌone; eboshi waanee wohe.

⁶ Eboshi daggoochee ikkikkeenaꞌo ashi kexooch shokii giyiibee, boonoshi yibbaatoona mullaalli maacheenaꞌon ollee beetinaꞌone; ebi are maacheenaꞌo meeti baribare qaatoyich boonoshi hajjeetaa, dofee axaaxoo boonoshi toommooch kiceetone.

⁷ Bulli aaboon waayee beeheetalli, iberoon xiishoon cir hakkaaneenaꞌone.

⁸ Yaaneesinaa Yambareesina Muusichi mooyon happiya qiiccoommon, ebi asheenaꞌo tachii gaboon hakkaaneenaꞌo tuneꞌi dacheebee, Kiristoosi toommooch mullee tooꞌiyoochee dihitinaꞌo tuneꞌi, iberoon happiya qiiccee beetinaꞌone.

⁹ Tunebaani Yaaneesinaa Yambareesinochi mullee mucco xalla bi arichoommon hinoshichoo wotta bullich xalla bekkemmo bi tunetoyich, boonoshich kaameyaachemmone.

Phawuloosi Ximootiyoosich Adereti Mooyo

¹⁰ Tunebaani ne ta dojjaabeeti doyoonaa ta qocoonon, ta gaboonoo, Kiristoosi toommooch taach beeti mullee tooꞌiyoonoo, ta haaꞌiyoonoo, maneenaꞌon ta shunonoo, eboshi bullina ta kupphoonoo,

¹¹ ta duꞌoonoo, ta xuuxoonoo gaawichaꞌa beeggeto neene. Antsookaa, Iqooniyooninaa Lisxirinoochaa ta toommooch shaggiti duꞌoon ta haaꞌiyoon ariibeeto neene; Doono Yesuusiyoo ebi bulliichee taan wodiitone.

¹² Iberoon Kiristoos Yesuusina tuneꞌi Yeerin oogiibeeti beemon beeya qaawii beetinaꞌo bulli duꞌemminaꞌone.

¹³ Tunebaani gondeenaꞌonaa dawushechinaꞌona boonoshi qelloona dawusheebee, ashoonoo dawushibee, gonde mooyona beshi beshiree hammemminaꞌone.

¹⁴ Tunetaa ne, ne doyitonaa xiishaa ne iberiitona kupphebe; koni koni waanee ne doyito gaata ariibeeto neene.

¹⁵ Kiristoos Yesuusi toommooch mullee tooꞌiyoona wodoo daneebeeti shalligoon neech imon hakkiibeeti Yaafe Macaafeenaꞌon ne bushittinoochee tiijjaꞌa ariito neene.

¹⁶ Yaafe Macaafooch kooreeto bulli Yeerichi kashechone; dojjoyich, ciicoyich, mullee kaachoonaa ashich cadiqee gommi dojjoonoyich gaaccemmone.

¹⁷ Ebina Yeerich maddeebeeti asho deꞌe shuunoo bullin shuunoyich bedditonaa qannitonon tunemmone.