2 Ximootiyoosi 2 - Kafa Linguistics Project

Kiristoos Yesuusich Gibeneeti Ginee Naayon Tuno

¹ Illa ta bushoochoo, Kiristoos Yesuusina daneebeeti wojjoona kupphebe.

² Meeti miixeenaꞌo aafoochaa ta getaa ne waayeti mooyo bullin, bareenaꞌoyich dojjoon hakkemmi gibeneeti asheenaꞌoyich wotta guudiibe.

³ Kiristoos Yesuusich gibeneeti ginee naayon tuneree taanna tookki xuuxoon beege.

⁴ Koyooch ceegaa hammiibeeti asho bulli ginee iraashoon emirikkoyich gabiyalli, bare shuunooch giyiꞌi xandeyaache.

⁵ Wotta qiiccee kaachiibeeto koniyoona qiiccee doyoon quyeꞌi qiicco bi qayigaata, naadee wojjoon daneyaache.

⁶ Ebiyoommon wotta goyecho aajjiꞌi bi gochiti maayoon shiichiꞌi bi mamo bede mooyone.

⁷ Doono Yeeri mooyo bullich shalligee mulloon neech immemmone; ebich ebi neech ta getteti mooyon gabibe.

⁸ Mishiraachee qaaroona ta gettaa beetoommon, qitoochee tiyiti, Daawiti yaroochee shiijjeti Yesuus Kiristoosin shalligibe.

⁹ Hini mishiraachee qaaroon ashich ta gettetoyich gondoon shuunetochoommon ta cuchemmi wottoon xuuxoon beeggaabeeto taane; tunebaani Yeerichi qaaro cucheyaachemmone.

¹⁰ Ebiyeenoo Kiristoos Yesuusi waanee wodoonaa bulli yemeenee oogee yiiroonon boonoshi danemmoyich kaachetinaꞌoyicha iyaꞌa hini xuuxo bullin haaꞌiibeeto taane.

¹¹ “Biinna tookkaꞌa no qitigaata, biinna tookkiree wotta kashoona beeyemmo noone.

¹² Wotta xuuxoonaa duꞌoonon no haaꞌiigaata, biinna tookkiree taatemmo noone; biin no nookkegaata, bi wotta noon nookkemmone.

¹³ Gibeneeto tuno no qayigaata, bi qelloon nookkeyaachemmo bi tunetoyich, bi gibeneeto tuneree beeyemmone” getteeti yibbaatoo iberoone.

Kiristoos Yesuusich Diireeti Maddechon Tuno

¹⁴ Ebi mooyinaꞌon shalligichoon qajjaahine; qaareenaꞌochi naboona boonoshi hayeyaachemmoyich, Yeeri aafoochaa boyebe; ebi waayee beetinaꞌon aalliishalli bi gettemmo, amoonolla gaacaachemmone.

¹⁵ Iberee mishiraachee qaaroon tachiꞌi gettiibeeti, bi shuuneti shuunoona yeelleyaani shuunechon tuneree, Yeer waanee galletoon danoyich kupphebe.

¹⁶ Yeerin oogiyaani, moochaalli yibbaatoochee wohe. Ebiyoommi yibbaatoo asheenaꞌon beshoon Yeer waanee wokkiyemmone;

¹⁷ boonoshi yibbaatoo wodaani mayochoommon hoocciiniye bi beeto. Hemanoosinaa Filixoosina ebiyoommon yibbaatee beetinaꞌo daggeexinaꞌone.

¹⁸ Boonoshiyoo “Qitoochee timo ebiyee aaf ceennii beshetone” iibee iberoochee muricciꞌi, ikkikkeenaꞌoyich beeti Kiristoosichi toommeexi mullee tooꞌiyoon shuurikkii beetinaꞌone.

¹⁹ Tunebaani koniyoona shuurikkoo hakkaani kechi giimboon Yeeri neechitone; are giimboo “Yeeri biichinaꞌon arii beetone”, wotta “ ‘Ta, Doono Yeericho taane’ ii beeto bulli gondoochee wohe” ii beeti maatemechone.

²⁰ Ikke ooge kexooch beeti qiiceenaꞌo boonoshi shuuneeto aachoonaa birewoonoochee baach toonoone; arooch mixonaa nuuqqoonoochee shuuneetinaꞌo beetinaꞌone; aroochee ikkikkeenaꞌo aaxxe shuunoyich, ikkikkeenaꞌoo qallayeeti shuunoyich heechii beetinaꞌone.

²¹ Illa asho koniyoona ebi gonde mooyinaꞌoochee bi qelloon bi xalliigaata, aaxxe qiicoon tunemmone; bi Doonoyich diireeꞌi bi Doono biinna shuun bedo, gaawe shuunoo bullich qanniti qiicoon tunemmone.

²² Ebich gonde gurimaashittinee qaatoochee wohe; xalle mulloona Doono Yeerin qollee beetinaꞌona tookkiree cadiqoon, Kiristoosi toommooch mullee tooꞌiyoon, maneenaꞌon shunon, asho bullina tookkii diggoona beemonoo kupphiiree dabbibe.

²³ Wotta kaaroon deebemmo bi tunoon ariiree gaacaalli duube gajjiteyoochee wohe.

²⁴ Doono Yeerichi guuno, asho bullin shiimecho, Yeerichi qaaroon dojjoon hakkitonaa haaꞌiyechonalli, kaarechon tunaaye.

²⁵ Bi dojjiibeeti mooyon happiya qiiccee beetinaꞌon shiimoona dojjibee ciice. Diqq Yeeri iberoon boonoshi ariyemmoyich, axaaxee gommoocheenoo bi waan boonoshi wottemmoyich bi daaggigaata,

²⁶ boonoshi mullo yeshaa, daabiloosichi daaggoon ceechiya kashoona beechii boonoshi yecheti bi olloochee muriccemminaꞌone.