2 Ximootiyoosi 1 - Kafa Linguistics Project

Diggiyoo

¹ Kiristoos Yesuusina daneti kasheechi gibenee wochoon bechiya, Yeeri daaggaa Kiristoos Yesuusichi mishiraachecho tuneti Phawuloosi waanee,

² Ta shunnaabeeti ta bushoo Ximootiyoosich: Nihoo Yeerinaa no Doono Kiristoos Yesuusina waanee wojjoo, ariqqoonaa diggoona neech tunebe.

Gibeneeto Bi Tunemmoyich Ximootiyoosin Phawuloosi Kupphiyoo

³ Ta qaabbechinaꞌochoommon axaaxoon tiyaareebeeti xalle mulloona ta goyinnaabeeti Yeerin ne naboyich galletaabee, xumoonaa areddoonon ta qollaa beegaata kuxaanoon neen gabaabeeto taane.

⁴ Ne acimoon gabaabee, oogichi ta emiremmoyich, ne aafoon beegoyich sharaataabeeto taane.

⁵ Kiristoosi toommooch ibere ne mullee tooꞌiyoon gabaabeeto taane; shiichiꞌi ne indinde Loyidinaa ne indee Ewuniqina boonoshi mulloon Kiristoosi toommooch tooꞌiitinaꞌone; and ne wotta ebiyoommon Kiristoosi toommooch ne mulloon ne tooꞌiyoonoo xiishito taane.

⁶ Ebich neech ta shalligichaabeeto, ta kishoon ne toommooch ta kotiihooba ne daneti Yeerichi wojjoon qaaqqoon shoohoommon ne shookkemmoyichiye.

⁷ Yeeri nooch bi immiti Ayaano giideechonaa shuneechona, qellee quyeechoonalli, shatti ayaano toonoone.

⁸ Illa no Doonochi qaaroon miixoyich woyee bi mishiraachee qaaroon ta getona cucheti ta naboyich yeelleyaahine. Tunebaani Yeer waanee danemmi giidoona kuppheree taanna tookki xuuxoon beege.

⁹ Noon wodiito, biichoo diireeto no tunemmoyich noon ceeggito Yeerine. Noonoo bi ceeggito bi hajjee gaboonaa bi wojjoonalli, no shuuneti gaawe no shuunee naboona toonoone. Ebi bi wojjoo bulli yemeenoyee aaf Kiristoos Yesuusina nooch ichetone.

¹⁰ Andoo hini wojjoo, noon Wodiyechi Kiristoos Yesuusi hini showee toommooch bi womona bekketone. Biyoo qitee giidoon aalliitone; bulli yemeenoon kashoona no beeyemmi gommonoo mishiraachee qaaroona gaxxii xalliiꞌi bekkiitone.

¹¹ Ebichoo ceegee bechecho, mishiraachechonaa Yeerichi qaaree dojjechona ta tunemmoyich Yeeri taan kaaccitone.

¹² Ebichi naboyichiye hini xuuxo bullin ta beeggaabeeto; tunebaani ta mulloon bi toommooch ta tooꞌiiti Kiristoosin ta arii beetoyich, wotta biich ta aderaton ciireexi aabooch beddaahaa quyoon hakkemmo bi tunoon ta xiishitoyich, yeelleyaache.

¹³ Kiristoos Yesuusina daneebeeti mullee tooꞌiyoonaa shunoona manjiree beebe. Ta waanee ne waayeti gaawe qaaroon tachiꞌi getonaa dojjoona taan shaahibe.

¹⁴ No mullooch beeti Yaafe Ayaanee giidoona neech icheti gaawe aderoon quyebe.

¹⁵ Isiyee showooch beeti kittinneenaꞌo bulli ta waanee boonoshi shokoon ariibeeto neene; Fugeloosinaa Herimogeneesina are shokitinaꞌo daggeexinaꞌone.

¹⁶ Doono Yesuusi Honesifoori kechi asheenaꞌoyich deꞌoon wojjibe. Bi, meeti aaboonoo taan kupphiitone; ta cuchoyichoo yeelleyaanoone.

¹⁷ Room bi waahooba, bulli xaaꞌoon guuddiibee taan qaawii danetone.

¹⁸ Ciiree aabooba Doono Yeeri maaroon biich imbe. Efesoon ta beetaa, am shaahoon taan bi gaacheto gaata gaawichaꞌa ariibeeto neene.