2 Tasaloonqi 3 - Kafa Linguistics Project

Corootee Gaachoon Phawuloosi Echo

¹ Illa no maneenaꞌote! Ittoshi waan bi tunetoommon, Doonochi qaaro kaateree bi gaminnemmonaa bi oogemmonoyich nooch corootibote.

² Wotta asho bulli no gettaabeeti qaaroon iberiibeeto toonoone; ebich hukkechinaꞌonaa gonde asheenaꞌonochi kishoochee no wodemmoyich qollebote.

³ No Doono gibeneetone; biyoo ittoshin kupphiyemmone; gondoochi nihoo kishoocheenoo ittoshin quyemmone.

⁴ Ittoshich no gettaabeeti mooyinaꞌon and tuniibeeto ittoshi tunoon, gubboo tuniyemmo ittoshi tunoon Doono Yesuusina ittoshin gibenaabeeto noone.

⁵ Doono ittoshi mulloon Yeerichi shunoonaa Kiristoosichi haaꞌiyoonooch wochibe!

“Shuune Qebote” Iꞌi Phawuloosi Geto

⁶ No maneenaꞌote! Shuuna biisheenaꞌonaa ittoshich no dojjiti doyoona hamaani maneenaꞌona waanee ittoshi wokkemmoyich, no Doono Yesuus Kiristoosichi yakkirecho tunaꞌa ittoshich gettaabeeto noone.

⁷ Ittoshina tookkaa no beehooba, shuuna biisho toono noone. Ebich noon shaahoo ittoshich bede mooyo bi tunoon ittoshi qelloona ariibeeto ittoshine.

⁸ Ittoshi daggoochee ikke ashi toommoocholla shaagoon no tuneyaachemmoyich, xumoonaa areddoonon aajjaa yullaa shuunaabeenalli, koni waaneenona baad cikkii koshon maataano noone.

⁹ Ebin no tuniito, no shaahiyoon ittoshi dabbemmoyichalli, nooch qaawiibeeti mooyon ittoshi waanee danoyich aalloo nooch aalletaa toonoone.

¹⁰ Wotta ittoshina tookkaa no beehoobolla, “Shuunee shuunoon shunaano maayaaye” iyaꞌa getteto noone.

¹¹ Ishichaa no iti naboo, ittoshi daggooch ikkikke shuuna biisheenaꞌo beemon no waayetoyichiye; eboshi boonoshin gedaani mooyooch giyiibee baad cikkii guuddii beetinaꞌone.

¹² Eboshiyoommi asheenaꞌo yiti shuuneree boonoshi hajjee koshon boonoshi maayemmoyich, no Doono Yesuus Kiristoosichi yakkirecho tunaꞌa gettaabeeto noone; manjiiꞌaanoo ciiccaabeeto noone.

¹³ Illa no maneenaꞌote! Gaawe shuunoon shuunoyich taahiyaahote.

¹⁴ Hini wochooch kooraꞌa no daachiiti qaaroyich deꞌa getaani ashoon ariibote; bi yeellemmoyich biinna tookki ikkotteyaahote.

¹⁵ Tunebaani manoochoommon kaare ciicotalli, shixechon shaahiiree ciinnaahote.

Ciireexi Diggiyoo

¹⁶ Diggoon immiibeeti Doono Yesuus Kiristoosi bi qelloona bulli gommona bulli aaboon diggoon ittoshich imbe. Doono Yesuus Kiristoosi ittoshi bullina tookki tunebe!

¹⁷ Hini diggiyoon ta hajjee kishoona ittoshich koorito, ta Phawuloosi taane; ta kooraa beeti wocho bullin ittoshi xiishemmo ebinane; ta kooraa beetoo eechaꞌaaniye.

¹⁸ No Doono Yesuus Kiristoosichi wojjoo ittoshi bullina tookki tunebe.