2 Tasaloonqi 2 - Kafa Linguistics Project

Hukkechi Uro

¹ Andoo no maneenaꞌote! No Doono Yesuus Kiristoosi wottee womichonaa bi waan no kiceyeechonon ittoshin no qollaabeeto,

² ikkikkeenaꞌo “Doonochi aabo waatone” getaa, kaate ittoshi shaddeyaachemmonaa ittoshi keqqaachemmonoyichiye. Nooch bekketi keemoona woyee no getteti qaaroona woyee koorii no wocheti wochoona ishichii getteto shaahiitaa ittoshich getteeto tunemmone.

³ Tunebaani asho koniyoona amee gommonolla ittoshin muriciyaaye; shiichiree meetinaꞌo Yeeri toommooch tiyiree hukkoon boonoshi shuunemmi wottoon, hukkechi uro, aalloyich kaacheti are uro, bekkemmi wottoon, ebi are aabo tuneyaachemmone.

⁴ Hini are hukkecho nuggisheenaꞌo getteetinaꞌo bulliyee, asheenaꞌo goyinneebeeti mooyo bulliyee bi qelloon besho tuniiree, boonoshin qeexxee kiin bechaachemmone. Yaafee kexooch giyi koteree, “Taane Yeeri” getooch beddaahaa beddemmone.

⁵ Ittoshina tookkaa ta beehooba, ebi mooyo tunemmo bi tunoon ittoshich ta geton shalligaachote?

⁶ And bi tuneyaachemmoyich bajjiibeeto amo gaata ariibeeto ittoshine; ebi hukkechi uro biich daaggeeti aabooba bekkemmone.

⁷ Tunebaani ebi aashoona shuuneebeeti hukkee shuunoo and shuunee beetone; xalla bi shuneyaachemmoyich bajjii beeton Yeeri wokkiimmi wottoon ebi are mooyo tuneyaachemmone.

⁸ Aroyee gubb, Doono Yesuusi bi waahooba bi kookkeexi hiinnoona hidemmi, bi oogee yiiree waccoonoo bi aalliyemmi hukkechi uro bekkemmone.

⁹ Ebi hukkechi uro bi woyemmo, Sheexaanoochi shuunoommon baribare giidoona koote worganikkiti malletoonaa gaakkechi shuunoonon shuunoonane.

¹⁰ Ebiyoommon wotta, boonoshi wodemmi iberee qaaroon shunniꞌi deꞌon qayona aallemminaꞌon dachemmi baribare gonde shuunoon shuunoonane.

¹¹ Ebichi naboona koote mooyon boonoshi iberiyemmoyich, Yeeri muriciibeeti giidoon boonoshi toommooch deejjii beetone.

¹² Yeeri ebin bi tuniibeeto, iberee qaaroon iberiyaaneenaꞌonaa axaaxoon shuunoona emirii beetinaꞌo bullinochi toommooch bi nallemmoyichiye.

Wodoyich Asheenaꞌon Yeeri Kaaco

¹³ Tunebaani Doonona shucheti no maneenaꞌote! Bulli aaboon ittoshi naboyich Yeerin galletehone; ebiyoo Yeeri bi Yaafe Ayaanoona ittoshin yaafiꞌi, iberee qaaroon iberiiree ittoshi wodemmoyich shiichiꞌi ittoshin bi kaaccitoyichiye.

¹⁴ Yeeri no Doono Yesuus Kiristoosichi oogee yiiroochee ittoshi qoodeyemmoyich, no getteti mishiraachee qaaroona ittoshin ceeggitone.

¹⁵ Illa no maneenaꞌote! Manjiree neexebote. Noonoona no getteton tunetaa woyee no kooriti wochoona ittoshich no beshiiti doyoon manjiiree yeshote.

^16-17 Bi qelloona no Doono Yesuus Kiristoosinaa noon shunniti, bi wojjoona bulli yemeenee goggoonaa manje gibenoonon nooch immiti no Nihoo Yeerina ittoshi mulloon goggiibeete; gaawe mooyo bullin ittoshi shuunemmonaa yibbaatemmonoyich ittoshin kupphiibeete.