2 Tasaloonqi 1 - Kafa Linguistics Project

¹ Phawuloosi, Sillaasinaa Ximootiyoosina waanee, No Nihoo Yeerichonaa Doono Yesuus Kiristoosichona tuneti Tasaloonqi kittinnee guuphoyich:

² Nihoo Yeerinaa Doono Yesuus Kiristoosinochi wojjoonaa diggoona ittoshich tunebe.

Kiristoosi Wotteꞌi Waahooba Tunemmi Nalloo

³ No maneenaꞌote! Yeeri toommooch mullee tooꞌiyoona oogichii ittoshi diccii beetoyich, ittoshi ikkikkoyich ittoshinaa ittoshina shuneebeeti shuno woddee woddee bi qeyii beetoyich, bulli aaboon ittoshi naboyich Yeerin galleto nooch qaawiibeeti mooyone; wotta ebiyoo no tuniiya bede mooyone.

⁴ Ebich ittoshi toommooch shaggiibeeti duꞌoonaa xuuxoonon haaꞌiibee, and beddaahaa Yeeri toommooch mulloon tooꞌiyoona ittoshi manjii beetoyich Yeerichi kittinnee guuphinaꞌo daggooch no qelloona no, ittoshichon geecoona yibbaataabeeto noone.

⁵ Ebi bulli Yeerichi kaame nalloo bi tunooniye bi bekkiibeeto. Wotta biicha iꞌi xuuxoon ittoshi beeggiibeeti, Yeerichi taatittinee shimaajji kexooch gimoyich bedditon tune haddeyemmo ittoshine.

⁶ Yeeri nallemmi nalloo kaamoone; ittoshin xuuxii beetinaꞌo toommooch xuuxoon wochi gaaccemmone;

⁷ and xuuxoon beeggiibeeti ittoshin ebi xuuxoochee kichiree noonna tookki kashiyemmone. Ebin bi tuniyemmo, Doono Yesuusi giidechi bi maraakeenaꞌona tookkii shimaayoochee bi waahoobane.

⁸ Arooba qaaqqee aaxxoona waaree, Yeerin ariyoo qaawaaneenaꞌonaa no Doono Yesuusichi mishiraachee qaaroyich deꞌa getaaneenaꞌonochi toommooch nichoon kichemmone.

⁹ Ebiyoommi asheenaꞌo Doono Yesuusi aafoochee, bi giidee oogee yiiroocheenoo bariree bulli yemeenee aalloona xuuxemminaꞌone.

¹⁰ Ebi arooba bi yaafeenaꞌo, eboshiyoo boonoshi mulloon bi toommooch tooꞌiiti asheenaꞌo bulli, biin oogiyemminaꞌone; bi oogee yiiroona worganemminaꞌone. Ittoshi wotta ittoshich no miixeton ittoshi iberiitoyich, ebi are yaafeenaꞌona tookki tunemmo ittoshine.

¹¹ Ebich wotta no Nuggishoo bi ceeggiti gaboyich bedditon ittoshin bi tuniyemmoyich, tuniyoyich ittoshi gabiibeeti gaawe gaboon bi giidoona ceechiree, Kiristoosi toommooch mullee tooꞌiyoona ittoshi tuniibeeti shuunoyich ittoshin bi gaachemmoyich, bulli aaboon ittoshich corootaabeeto noone.

¹² Ebiyoommi gommona no Nuggishoonaa Doono Yesuus Kiristoosinochi wojjoommon no Doono Yesuusichi shigo ittoshi waanaa oogemmone; ittoshiyoo bi waanaa oogemmo ittoshine.