2 Taateenaꞌo 9 - Kafa Linguistics Project

Yehi Huutteꞌi Israꞌeelee Showooch Taato

¹ Keemechi Elisayi keemechinaꞌochi guuphi daggoochee ikkoon ceeggiꞌi ishichiye: “Ne shimetoon cuyebe; hini qiicooch beeti zayitoon yeshiree, Gilaadee showooch beeti Ramoot hambe.

² Arooch shagiree, Nimishi bushoo Yoshafaaxi bushoo Yehin qaawibe; maac giyi bi nuucheenaꞌo daggoochee biin tiijjiree gat giijjibe.

³ Aroochee qiicoon daami zayitoon bi shimbooch ukkiichi, ‘Doono Yeeri, “Israꞌeelee taatoo ne tunemmoyich neen huutteto taane” itone’ gete. Aroochee kelloon qechiree woce; arooch yagiyaahine” iye.

⁴ Ebich keemechi gurimaashoo Gilaadee showooch beeti Ramoot hammiye.

⁵ Arooch bi shaggaahaa, ginee iraasheenaꞌo boyee beeteete; biyoo “Ta doonocho, ne waan wocheeto taane” iye. Aroochee Yehi, “No daggoochee koni waaniye?” iye. Biyoo, “Ta doonocho, ne waaniye” iye.

⁶ Ebich tiyiꞌi kexooch hammiye. Ebi gurimaashoo zayitoon Yehichi shimbooch ukkiichii biich, “Israꞌeelee Nuggishoo Doono Yeeri ishichiye: ‘Doono Yeeri, ta asheenaꞌo tuneti Israꞌeeleenaꞌo toommooch ne taatemmoyich neen huutteto taane.

⁷ Keemechi ta guuninaꞌochi damee kaalloonaa Doono Yeeri ta guuninaꞌo bullichi damee kaalloonon Elizabeeli toommooch ta wochemmoyich, ne doono Akaabi kechi ashoon wuxemmo neene.

⁸ Akaabi kechi asho bulli aallemmone. Israꞌeelee showooch beeti, anaamo tuneti bi kechi ashoon, guuno tuneba doonon, bullin aalliyemmo taane.

⁹ Nebaaxi bushoo Yeroboꞌami kexonaa Akiyi bushoo Baꞌaashi kexonooch ta tuniitoommon, Akaabi kexooch tuniyemmo taane.

¹⁰ Elizabeelinoo Yezireelaa kunaaneenaꞌo maayemminaꞌone. Biin duukkemmon daneyaachemmine’ itone” iichii, shaaqqoon qechiꞌi wocciye.

¹¹ Aroochee Yehi, ginee iraashoo tuneti bi nuucheenaꞌo waan wotteꞌi bi waammona, boonoshiyoo biich, “Mooyo bulli diggoone? Ebi geyecho ne waan bi waato, aakkiyane?” iꞌi echeheete. Biyoo, “Ebi uroon, bi yibbaatoonoo ariibeeto ittoshine” iye.

¹² Boonoshiyoo, “No ariyaano noone. Bi gettito amo gaata nooch gete” iyeete. Biyoo keemecho gettiton boonoshich gettiye: “ ‘Doono Yeeri: “Israꞌeelee taatoo ne tunemmoyich neen huutteto taane” itone’ iꞌi taach gettitone” iye.

¹³ Aroochee boonoshi bulliyona afaafinoona boonoshi iddimoon daammii, bi shaaddeebeeti daqqellooch yaggiyeete; tiroonoo huggiꞌi, “Yehi taatetone” iꞌi awaajjiyeete.

Yehi Yoraaminaa Akaziyaasinon Wuxoo

¹⁴ Aroochee Nimishi bushoo Yoshafaaxi bushoo Yehi Yoraami toommooch gondoon shuunoyich koceehe. Yoraaminaa Israꞌeelee ginee naayo bullina Gilaadee showooch beeti Ramootin Sooriyee taatoo Hazaheeli yeshaachemmoyich koyee beeheete.

¹⁵ Tunebaani taatoo Yoraami Sooriyee taatoo Hazaheelina tookkii bi koyehooba, biin boonoshi mayiiti mayochee wodoyich, Yezireel wottetone. Ebich Yehi bi nuucheenaꞌoyich, “Ittoshi mulloo taanna tookkii bi tunegaata, Yezireel hamiree bi getaachemmoyich, koniyoona katemoochee bi keyaachemmon tuniibote” iye.

¹⁶ Aroochee, Yehi bi gaariich kechii koteꞌi, Yezireel hammiye. Ebiyoo Yoraami biiyeꞌi bi qeyito arooch bi tunetoyichiye; wotta Yihudee taatoo Akaziyaasiyoo biin cacheya arooch waatone.

¹⁷ Yezireelee xaqqee dilaalee toommooch neexeꞌi beeti qayecho Yehichi ginee naayinaꞌo womon beeggiꞌi, “Ginee naayinaꞌon beeggaabeete” iye. Yoraamiyoo, “Hareshee yookkechon boonoshina bi danemmoyich daachiibote; biyoo, ‘Ittoshi waato, diggoochiye?’ getiree echebe” iye.

¹⁸ Hareshee yookkechoo biinna danoyich hammiꞌi, “Taatoo, ‘Ne waato, diggoyichiye?’ itone” iye. Aroochee Yehiyoo, “Diggoonaa neennon amo daniihe? Gubb besheree ta hillooch dabbibe” iye. Aroochee qayecho, “Wocheyecho boonoshi waan shaggitone; tunebaani wotteyaanoone” iꞌi gettiye.

¹⁹ Ebiyee gubb, taatoo hareshee yookkechi baroon daachiihe. Biyoo boonoshi waan hammiꞌi, “Taatoo: ‘Ne waato, diggoyichiye?’ itone” iye. Aroochee Yehi, “Diggoonaa neennon amo daniihe? Gubb besheree ta hillooch dabbibe” iye.

²⁰ Qayecho wochinnoon, “Wocheyecho boonoshi waan shaggitone; tunebaani wotteꞌi waataanoone” bi itoyee gubb, daakkiꞌi, “Gaarin bi gasheebeeto, Nimishi bushoo Yehi gashoommoniye. Bi gasheebeetoo, geyechochoommoniye” iꞌi gettiye.

²¹ Yoraamiyoo, “Gaarin qanniibote” iye. Boonoshiyoo gaarin qanniiheete. Israꞌeelee taatoo Yoraaminaa Yihudee taatoo Akaziyaasina boonoshi gaari gaariich kechiꞌi, Yehina danoyich hammiyeete; Yezireelee asho Nabootichi goyee budoochaa daneheete.

²² Yoraami Yehin, “Yeho, ne waato, diggoochiye?” iye. Biyoo, “Ne indee Elizabeelichi shahalloonaa qaaxoona wodde beetaa, amee diggoo beete?” iꞌi wochiye.

²³ Aroochee Yoraami gaarin guudiiꞌi wocciibee, Akaziyaasich, “Akaziyaaso, ebi hukkoani amoone” iye.

²⁴ Yehiyoo ceeni bi giidoona maꞌoon geechii xuuphiiꞌi, Yoraamin gubbooch kochiye; shangoo bi mullooch beddaahaa giyiye. Ebich gaari maacooch dihiye.

²⁵ Aroochee Yehi bi naayo Bidiqaarich, “Bi dubenoon tiijjiree, Yezireelee asho Nabootichi goyee budooch dufe. Neennaa taanna qarooch hareshoon yookkaꞌa bi nihoo Akaabin no dabbiyooba, Doono Yeeri ishichiꞌi gettiton shalligibe.

²⁶ Ebiyoo ‘Iberoo yiich Nabootinaa bi bushiisheenaꞌochi damoon beeggeto taane. Ebinoo hini goyoochaa ne toommooch wochemmo taane’ itone Doono Yeeri. Ebich Doono Yeeri gettitoommon, daamiree are goyee budooch dufe” iye.

²⁷ Yihudee taatoo Akaziyaasi ebin beeggiꞌi, Beet Hagaani katemee gommona bi gaarin yookkiꞌi wocciye. Yehiyoo, “Hini aroonoo wotta koyote” iibee yookkii dabbiye. Ibilaami katemee gaꞌooch beeti Guuri qaalloochaa bi gaariich bi beetaa, kochiyeete. Biyoo Megidi katemooch beddaahaa hammiꞌi, aroochaa qitiye.

²⁸ Bi naayinaꞌoo bi dubenoon gaarina Yerusaalem daammiyeete; Daawiti Katemooch bi qaabbechinaꞌo maashooch duukkiyeete.

²⁹ Akaziyaasi Yihudee showooch bi taateto, Akaabi bushoo Yoraami taateti aaraa ikkinnee natoobane.

Elizabeeli Qitoo

³⁰ Aroochee Yehi Yezireel hammiye. Elizabeeliyoo ebin waayaꞌa, bi aafooch huutoon huutahan. Bi qelloonoo kaaccaa mashaamiiꞌa, mallee kelloona ciinnaa beehan.

³¹ Aroochee Yehi uxeree kelloon bi giyimmona ure, “Ne doonon wuxiti Zimiro, ne waato, diggoochiye?” iyan.

³² Yehiyoo kaama mallee kello waan ciinniꞌi, “Taanna guuphemmo, konine?” iye. Aroochee taatee kexooch beeti, gutta woyee keejj bede ukkireenaꞌo bi waan ciinniyeete.

³³ Biyoo, “Ureen dugilla dufote” iye. Boonoshiyoo biin dugilla duppiyeete. Bi damoo daabboonaa haresheenaꞌonochi toommooch wuceehe. Haresheenaꞌoo biin neexxiyeete.

³⁴ Ebiyee gubb, Yehi taatee kexooch giyiꞌi maahe; uchiye. Aroocheenoo, “Taatoochi bushee bi tunetoyich, hini uppeti ureen tiijji daamiree duuhote” iye.

³⁵ Tunebaani duukka boonoshi hammaahaa, bi qelli koofoo, bi baatoonaa bi kishoonoyee besh, amoonolla daneyaaneenaꞌone.

³⁶ Ebinoo wotteꞌi biich boonoshi gettimmona Yehi, “Doono Yeeri bi guuno tuneti Tishibee asho Eliyaasina ‘Yezireelaa Elizabeelichi meenon kunaaneenaꞌo maayemminaꞌone;

³⁷ bi meeno Yezireeli katemee daggooch iboochoommon shacemmo bi tunetoyich, koniyoona, “Hini Elizabeeline” getiree bariyoon hakkaachemmone’ iꞌi bi gettiti qaaro hinine” iye.