2 Taateenaꞌo 8 - Kafa Linguistics Project

Shuneemee Ureechi Showoo Wotto

¹ Bi bushoon qitoochee bi wodiiti ureyich Elisayi, “Doono Yeeri showee toommooch shabaatte nati shaacoon deeba bi maaccitoyich, tiyiree ne kechi asheenaꞌona tookki bare xaaꞌoo aabiichona hamiree kotebe” iye.

² Ebina ureyoo tiyaꞌa, Yeer asho gettitoommon tuniihan. Bi kechi asheenaꞌona tookkaa Filsixeemee showooch hammaꞌa, shabaatte naton kotahan.

³ Shabaatte nati ciirooch, Filsixeemee wottaa waaꞌa, bi kexonaa bi showoonon taggee wochiyoyich, taatoo waan hammahan.

⁴ Ebiyooba taatoo, Yeer ashoochi aafee bushoo Giyaazich, “Elisayi tuniiti gaakkechi shuunoo bullin eke taach gete” ii beehe.

⁵ Giyaaziyoo Elisayi qititi bushoon aabichiꞌi bi wodiito gaata taatoyich getooch bi beetaa, bi bushoon qitoochee Elisayi wodiiti ure bi kexochonaa bi showoochonon taatoyich cookiyan. Giyaaziyoo, “Taatoo ta doonocho, ure hinine. Elisayi qitoochee wodiiti bi bushoo hinine” iye.

⁶ Taatoo ebi mooyon ureen bi echetaa, biyoo taatoyich gettahan. Aroochee taatoo ikke ukkiroon ceeggiꞌi, “Biich beeto bullin, showoon duppaa bi hammetoochee tiijjiꞌi bi wottetooch beddaahaa beeti, bi showoochee daneti maayo bullichi gatiyoona tookki biich bi wottemmoyich tuniibe” iye.

Hazaheeli Been Hadaadin Wuxoo

⁷ Elisayi Damaasiqa hammiye. Ebiyooba Sooriyee taatoo Been Hadaadi biiyetone. Taatoyichoo, “Yeer asho hiniich waatone” iꞌi gettiyeete.

⁸ Taatoo, Hazaheelich, “Wojjoon yeshi hamiree, Yeer ashoona danebe. ‘Hini biiyoochee wodehote?’ getiree biinna Doono Yeerin taach echebe” iye.

⁹ Ebich Hazaheeliyoo Elisayina danoyich hammiye. Damaasiqee daneti gaawe mooyo bullin aabbe gaaleenaꞌona xaaniꞌi, wojjoon daammiye. Hammii bi aafooch neexeechii, “Sooriyee taatoo tuneti ne bushoo Been Hadaadi, ‘Hini biiyoochee wodehote?’ iꞌi neen ta echemmoyich, taan wochetone” iye.

¹⁰ Elisayiyoo biich, “Hamiree biich, ‘Wodemmo neene’ gete. Tunebaani iberoon qitemmo bi tunoon Doono Yeeri taach bekkiitone” iye.

¹¹ Hazaheeli yeellemmi wottoon, koyikoyaayiꞌi Elisayi biin ciinniye. Aroocheenoo Yeer asho girgittii eeppiye.

¹² Hazaheeliyoo, “Ta doonocho, amoyichiye ne eeppaabeeto?” iye. Elisayiyoo, “Israꞌeeleenaꞌo toommooch ne shuunemmi gonde mooyon ta ariitoyichiye. Boonoshi mishigoon qaaqqoona michemmo neene; boonoshi gurimaasheenaꞌonoo goraadoona wuxemmo neene; boonoshi bushiisheenaꞌon ceqqe wuxemmo neene; yeqqefechi boonoshi gennoonoo gohemmo neene” iye.

¹³ Aroochee Hazaheeli, “Hini kunaanoommi ne guuno ta ebi shaahe mooyon tuniyoyich, koni taane?” iye. Elisayiyoo, “Sooriyee taatoo tunemmo ne tunoon Doono Yeeri taach bekkiitone” iye.

¹⁴ Aroochee Hazaheeli Elisayi waanee wotteꞌi, bi doono waan hammiye. Been Hadaadiyoo, “Elisayi ama iye?” iꞌi echehe. “Iberoon wodemmo ne tunoon taach gettitone” iye.

¹⁵ Tunebaani bi dechara maaddoona Hazaheeli bullikkoon aacooch tuupphiꞌi, aroona taatoon hippinnii wuxiye. Aroochee Hazaheeli bi xaaꞌooch kereeꞌi taatehe.

Yihudee Taatoo Yehoraami Mooyo

¹⁶ Israꞌeelee taatoo Akaabi bushoo Yoraami taateti uuchinnee natooba, Yihudee taatoo Yoshafaaxi bushoo Yehoraami taatehe.

¹⁷ Yehoraami bi taatehooba, bi eeno shaashaa gutte natone; Yerusaalem beechii, shimitte naton qeejjiye.

¹⁸ Akaabi busheen bi shaaggitoyich, Akaabi yareenaꞌo tuniitoommon tuniyoona, Israꞌeelee taateenaꞌochi gommon dabbiye; Doono Yeeri aafoochoo gonde mooyon tuniihe.

¹⁹ Tunebaani Doono Yeeri bi guuno Daawiticha iꞌi, Yihudee taatittinoon aalliyoon qaawaanoone. Ebiyoo Daawitinaa bi yaroonochi ceechoon bulli yemeenoon takkaachemmo bi tunoon Daawitich bi gibenikkitoyichiye.

²⁰ Yehoraami taatee yemeenooch, Edoomeenaꞌo Yihudee asheenaꞌo toommooch hukkoon tiijjiꞌi, boonoshi qellich taatoon taatiiheete.

²¹ Ebich Yehoraami bi gaari bullin yechiꞌi, Tsaꞌiiri katemooch koyoyich kechiye. Edoomee ginee naayinaꞌo boonoshin giichiyeete. Biinnaa gaarinaꞌochi ukkireenaꞌona xumoona tiyiꞌi boonoshin yexxiyeete; tunebaani bi ginee naayinaꞌo boonoshi kexi kexooch woceheete.

²² Ebina Edoomeenaꞌo hanaach beddaahaa Yihudee asheenaꞌo toommooch hukkeꞌiniye boonoshi beeto. Ebiyooba wotta Libini katemee asheenaꞌoo hukkoon tiijjiyeete.

²³ Yehoraami shuuneti eche shuunoonaa bi tuniiti mooyo bullina Yihudee taatee kiinee macaafooch kooreetone.

²⁴ Yehoraamiyoo qitiꞌi, bi qaabbechinaꞌo waan xaꞌeehe; Daawiti Katemooch beeti bi qaabbechinaꞌo maashooch duukkehe. Bi bushoo Akaziyaasi bi xaaꞌooch kereeꞌi taatehe.

Yihudee Taatoo Akaziyaasi Mooyo

²⁵ Israꞌeelee taatoo, Akaabi bushoo Yoraami taateti aaraa guttinnee natooba, Yehoraami bushoo Yihudee taatoo Akaziyaasi Yihudee showooch taatehe.

²⁶ Akaziyaasi bi taatehooba, bi eeno hiyaa gutte natone; Yerusaalem beechii ikke naton qeejjiye. Bi indee Ataaliyi getteehan; biyoo Israꞌeelee taatoo Omiri bushoochi busheene.

²⁷ Akaziyaasiyoo Akaabi shiijjereenaꞌona bi naachetoyich, Akaabi shiijjereenaꞌochi gommon dabbiꞌi, Doono Yeeri aafooch gonde mooyon tuniihe.

²⁸ Akaziyaasi Akaabi bushoo Yoraamina tookkii Sooriyee taatoo Hazaheelin kocha Gilaadee showooch beeti Ramoot hammiye. Sooriyeenaꞌo aroochaa Yoraamin kochii mayiiheete.

²⁹ Aroochee taatoo Yoraami Sooriyee taatoo Hazaheelina tookkii bi koyehooba, Sooriyeenaꞌo Ramootaa biin boonoshi kochii mayiiti mayochee wodoyich Yezireel wottehe. Yehoraami bushoo Yihudee taatoo Akaziyaasi ebi biiyeti, Akaabi bushoo Yoraamin cacheya Yezireel hammiye.