2 Taateenaꞌo 7 - Kafa Linguistics Project

¹ Tunebaani Elisayi ishichiye: “Doono Yeerichi qaaroon waayebe! Doono Yeeri ishichitone: ‘Yaach ebi goora, Shamaari kellooch ikke qunnee gaawe buddino ikke sheqeelee birewoona, gutte qunnee sheqoo ikke sheqeelee birewoona kechemmone’ itone” iye.

² Taatoochi baatoon deggiibeeti iraashoo Yeer ashoyich wochiꞌi, “Doono Yeeri shimaajji mallee kelloon bi qechitaanona, ebi mooyo tunoon hakkaache” iye. Tunebaani Elisayi, “Ne hajjee aafoona ebin beeggemmo neene; tunebaani aroochee shaacaachemmo neene” iye.

Sooriyee Ginechinaꞌo Shaco

³ Ebiyooba qeddee shaddee biiyechi awudde asheenaꞌo katemee uxeree kelloyee maach beetinaꞌone. Boonoshina boonoshinoo ishichiyeete: “No qitimmi wottoon hiniich kote no beeyemmo amoyichiye?

⁴ ‘Katemooch gibone’ no getaachemmoyich, katemooch shaacoo giyitone; aroochaa qitemmo noone. Hiniich no kotetaanoo wotta, qitecho noone. Ebich tibote; Sooriyeenaꞌo kaambooch hambone. Kashoona noon boonoshi gedeenoo, beeyemmo noone; boonoshi wuxeenoo, qitemmo noone” iyeete.

⁵ Aroochee showee shimmishimmooch tiyiꞌi Sooriyeenaꞌochi kaambooch hammiyeete. Kaambee gashooch boonoshi shaggimmona, ikke asholla arooch aallehe.

⁶ Ebiyoo Yeeri Sooriyee ginee naayinaꞌo haresheenaꞌonaa gaarinaꞌonochi, wotta meeti ginee naayinaꞌochi qaaroommi qaaroon boonoshi waayemmoyich bi tuniitoyich, boonoshinaa boonoshina, “Israꞌeelee taatoo, noon boonoshi kochemmoyich, Hiteenaꞌonaa Gibitseenaꞌonochi taateenaꞌon gijjoona kemee no toommooch deebitone” iyeete.

⁷ Aroochee showee shimmishimmooch tiyii woceheete. Boonoshi duukkaaneenaꞌon, boonoshi haresheenaꞌonaa boonoshi kureenaꞌonon duppiichii, kaamboonoo bi beetooch qixeechii, boonoshi kasheen wodiyoyich wocee aalleheete.

⁸ Ebi qeddee shaddee biiyechinaꞌo kaambooch shaggii, duukkaanoochee ikkooch giyiꞌi maa uchiyeete. Aroochee aachoon, birewoonaa tahoonon tiijjiyeete; daammiinoo aachiyeete. Aroocheenoo wotteꞌi, bare duukkaanooch giyiyeete; wotta aroocheenoo baribare qiiceenaꞌon daammiꞌi aachiyeete.

⁹ Ebiyee gubb, boonoshinaa boonoshina, “No tuniito, gaawe mooyo toonoone. Hanaach gaawe mishiraachee aaboone. Nowoo cikkito noone. Harimmi wottoon no yagigaata, sheereyemmo noone. Ebich wobote, hambone. Hamiree taatoochi kechi asheenaꞌoyich getone” iyeete.

¹⁰ Ebich hammii katemee kellechinaꞌon ceeggiꞌi, “Sooriyeenaꞌochi kaambooch hammeto noone. Aroochoo tippeti kureenaꞌonaa haresheenaꞌonoyee besh, ikke asholla aalloone; koni qaarona waayeyaanoone. Duukkaaneenaꞌoo boonoshi xogeetoochiye boonoshi beeto” iyeete.

¹¹ Kellechinaꞌoo asheenaꞌoyich ceeggii gettiyeete; ebi woroo taatee kexoochaa getteehe.

¹² Taatoo xumoona tiyiꞌi bi ginee iraasheenaꞌoyich, “Sooriyeenaꞌo nooch boonoshi gabiton ittoshich getona. Shaaceto no tunoon boonoshi ariitoyich, ‘Katemoochee boonoshi kechimmona, kashoona boonoshi beetaa yechemmo noone; katemoochoo giyemmo noone’ iꞌi kaamboochee kechiꞌi, kubbooch aasheya hammitinaꞌone” iye.

¹³ Bi ginee iraashoochee ikkoo ishichiye: “Hini katemooch echeti asho ebiyee aaf ciiretinaꞌo bullichoommon qitishalli bi gettemmo, echemmo aalloone. Ebich giisheche asheenaꞌo katemooch echeti haresheenaꞌoochee uuchoon yeshi hambeete. Ebina mooyon xiishibone” iye.

¹⁴ Ebich giisheche asheenaꞌon kaacciyeete. Taatoo boonoshich, “Hamiree tuneti mooyon beegote” iꞌi gutte gaarina Sooriyee ginee naayinaꞌochi hillooch boonoshi hammemmoyich tuniihe.

¹⁵ Ebich boonoshiyoo Yoordaanoosi aacooch beddaahaa hammiyeete. Ebiyoche, Sooriyeenaꞌo woceebee, boonoshi holliiti tahoonaa qiicoona gommo bulliich ceenniꞌi beehe. Wocheyechinaꞌo wotteꞌi, ebin taatoyich gettiyeete.

¹⁶ Aroochee asheenaꞌo hammiꞌi, Sooriyeenaꞌochi kaamboon hoolleheete. Ebich Doono Yeeri gettitoommon, keejje kiilo giraamee gaawe buddino ikke sheqeelee birewoona, shiritte kiilo giraamee sheqoo ikke sheqeelee birewoona kechehe.

¹⁷ Ebiyooba taatoo bi baatoon deggiibeeti iraashoon uxeree kellee ukkiroo tuniihe. Tunebaani asheenaꞌo kelloochaa biin neexxii wuxiyeete. Ebiyoo Elisayin yibbaatiiya taatoo waahooba, Yeer asho gettitoommon, tunehe.

¹⁸ Yeer ashoo taatoyich, “Yaach ebi goora, Shamaari kellooch keejje kiilo giraamee gaawe buddino ikke sheqeelee birewoona, shiritte kiilo giraamee sheqoo ikke sheqeelee birewoona kechemmone” bi iyooba,

¹⁹ are iraashoo Yeer ashoyich, “Doono Yeeri shimaajji mallee kelloon bi qechitaanona, ebi mooyo tuno hakkaache” iꞌi wochitone. Yeer ashoo, “Ne hajjee aafoona ebin beeggemmo neene; tunebaani aroochee shaacaachemmo neene” itone.

²⁰ Ebiyoo bi toommooch shaggiye; kelloochaa asheenaꞌo biin neexaa qitiye.