2 Taateenaꞌo 6 - Kafa Linguistics Project

Qofichi Aafo Aachi Toommooch Yariyaro

¹ Ikke areddoon keemechinaꞌochi guupho Elisayich, “Ebiyoche, ne aafooch no kotemmi xaaꞌoo nooch giishetone.

² Yoordaanoos hami, no ikkikkoona aroochee mixon kuxiree, no beeyemmi kexon arooch no haggemmoyich, nooch daaggibe” iyeete. Biyoo, “Hambote” iye.

³ Boonoshi daggoochee ikkoo, “Newoo, ne guuno noonna tookki hammenne?” iye. Elisayiyoo, “Eeha, hammemmo taane” iye.

⁴ Aroochee boonoshina tookkii hammiye. Yoordaanoos shaggiꞌi mixon kuxxiyeete.

⁵ Boonoshi daggoochee ikkoo mixon kuxxii bi beetaa, diqqoona qofichi aafo aacooch holliye. “Yeeh, ta doonocho, tawushaꞌa ta deebetoani am” iꞌi cookiye.

⁶ Yeer ashoo, “Bi hollito, aabiichiye?” iye. Uroo xaaꞌoon Elisayich bi bekkiitaa, Elisayi mixon kuxxii arooch duppiꞌi, xuuroo yariyariyemmoyich tuniihe.

⁷ Elisayiyoo, “Tiijji daambe” iye. Uroo ciixeꞌi tiijjiye.

Elisayi Sooriyeenaꞌo Aafoon Daayiyoo

⁸ Sooriyee taatoo Israꞌeeleenaꞌona koyee beehe. Bi ginee iraasheenaꞌona tookkii echeeꞌi, “Ebi, ebi xaaꞌooch ta kaamboon gedi kotemmo taane” iye.

⁹ Israꞌeelee taatoyich Yeer asho “Sooriyeenaꞌo desh ebi aroona boonoshi kindii beetoyich, aroo waan besheyaahine; ne qelloon ariibe” iꞌi wochiihe.

¹⁰ Ebich Israꞌeelee taatoo Yeer asho gettiti xaaꞌooch ginee naayinaꞌon daachiihe. Ebiyoommi xaaꞌeenaꞌoochee taatoo bi qelloon bi quyemmoyich, Elisayi wochii wochii gettii beehe.

¹¹ Ebich Sooriyee taatoo oogichii ippehe. Bi ginee iraasheenaꞌon ceeggiꞌi boonoshich, “No daggoochee Israꞌeelee taatoona tookkii xibeto konigaata, amoyich taach getaachote?” iye.

¹² Bi ginee iraasheenaꞌoochee ikkoo, “Taatoo ta doonocho, no daggoochee koniyoona toonoone. Tunebaani ne, ne gatooch beechaa ne yibbaatetonona, Israꞌeelee taatoyich gettiibeeto, Israꞌeelee showooch beeti keemechi Elisayine” iye.

¹³ Biyoo, “Ginee naayinaꞌon daachiiree ta yechemmoyich, aabiich bi beeto gaata hamiree beegote” iye. Aroochee Dotaani katemooch bi beemo taatoyich getteehe.

¹⁴ Biyoo arooch hareshoona, gaarinoo tuneꞌi koyee beetinaꞌonaa meeti ginee naayinaꞌonon daachiihe. Boonoshiyoo xumoona hammiꞌi katemoon giichiyeete.

¹⁵ Yeer ashoochi aafee bushoo harooch tiyiꞌi maach bi kechaahaa, ebiyoche, ginee naayinaꞌo haresheenaꞌonaa gaarinaꞌona tookkii katemee guudoona giichiꞌi beeteete. Aroochee Elisayi waan wotteꞌi, “Aalleto nowoche! Ta doonocho, aabichishiye no gettemmo?” iye.

¹⁶ Elisayiyoo, “Shattaahine; boonoshina tookkii beetoyee, noonna tookkii beeto beshoone” iye.

¹⁷ Aroochee Elisayi ishichiꞌi corootiye: “Ta Doono Yeero, bi ciinnemmoyich bi aafoon gaxxibe” iꞌi qollehe. Ebina Doono Yeeri bi aafee bushoochi aafoon gaxxiye. Biyoo qaaqqee haresheenaꞌonaa gaarinaꞌona guudi toommooch ceenniꞌi, Elisayi guudoona beetinaꞌon beeggiye.

¹⁸ Sooriyeenaꞌo bi waan boonoshi kindimmona Elisayi, “Hini asheenaꞌo aafoon ne daayiyemmoyich neen qollehoye” iꞌi Doono Yeer waan corootiye. Ebich Elisayi echetoommon, Doono Yeeri boonoshi aafoon daayiihe.

¹⁹ Aroochee Elisayi boonoshich, “Gommo hinina toonoone; katemoo hini toonoone. Ittoshi qaawiibeeti ashoon ittoshich ta bekkiyemmoyich, taan dabbibote” iye. Aroochee boonoshin yaabii Shamaara daammiye.

²⁰ Shamaara boonoshi giyimmona, “Doono Yeero, boonoshi ciinnemmoyich, boonoshi aafoon gaxxibe” iꞌi Elisayi qollehe. Doono Yeeriyoo boonoshi aafoon gaxxiye. Boonoshiyoo ciinniyeete; Shamaari katemee daggooch boonoshi beemon beeggiyeete.

²¹ Israꞌeelee taatoo boonoshin beeggiꞌi Elisayich, “Ta nihoocho, boonoshin wuxibote? Boonoshin wuxibote?” iye.

²² Elisayiyoo, “Boonoshin wuxiyaahine; hinoshin qayee, ne goraadoonaa ne maꞌoona ne keccetonolla, wuxoo neech qaawiyaache. Boonoshi maayemmonaa boonoshi uchemmonon boonoshich giddiibe; maa uyiree, boonoshi doono waan hambeete” iye.

²³ Ebich ooge gifiroon qanniihe. Boonoshi maa uchitoyee gubb, daachiihe. Boonoshiyoo boonoshi taatoo waan hammiyeete. Ebiyee gubb, Sooriyeenaꞌo Israꞌeelee showoon koyoyich wochinnoon waataaneenaꞌone.

Giicheꞌi Beeti Shamaara Shaacoo Gimo

²⁴ Ebiyee gubb, Sooriyee taatoo Been Hadaadi bi ginee naayo bullin kiciye. Kechiꞌinoo Shamaarin giichiye.

²⁵ Ebiyooba Shamaara shaacoo giyitone. Kuree qello shinne sheqeelee birewoona, kobbaayee heeca bede uggee ciqqilloo uuche sheqeelee birewoona kechemmi wottoon, katemoon giichiyeete.

²⁶ Ikke areddoon Israꞌeelee taatoo xaqqee uxeree toommona shaꞌee bi beetaa, ikke ure, “Taatoo ta doonocho, taan gaachebe” iyaꞌa bi waan cookiyan.

²⁷ Biyoo, “Doono Yeeri neen gaacheyaanoon, ta aabichiree gaachehote? Maayi buchi xaaꞌoocheeniye, woyinee hiicci oppoocheeniye neen ta gaachemmo?” iye.

²⁸ Aroochee taatoo, “Ne iritochi, amoone?” iye. Areyoo, “Hini ure, ‘Hanaach no maayemmoyich, ne bushoon deebe; yaach wotta ta bushoon maayemmo noone’ iyan.

²⁹ Ebich ta bushoon kiijjaa maahone. Bi dechara, ‘No maayemmoyich, ne bushoon deebe’ iyo. Tunebaani aree bi bushoon aachiyane” iyan.

³⁰ Taatoo ure getteton waayeꞌi, bi tahoon keexxiye; xaqqee uxeree toommona shaꞌee bi beetaa, bi tahee maac dookoon bi tahoon asheenaꞌo beeggiyeete.

³¹ Taatoo ishichiye: “Shafaaxi bushoo Elisayichi qettoo kucheyaanoon qeyigaata, Yeeri taan eechibe; ta toommoochoo ebin daakkibe” iꞌi miichehe.

³² Ebiyooba Elisayi bi kexooch koteꞌiniye bi beeto; geeneenaꞌoo biinna tookkii koteꞌi beetinaꞌone. Aroochee taatoo wocheyechon daachiihe. Tunebaani wocheyecho shagoyee shiichiꞌi, Elisayi geeneenaꞌoyich, “Ebi kashee aalliyecho ta qettoon kuxoyich, ashoon bi deejjoon beeggii beetote? Illa wocheyecho waammona, kelloon hicote; bi giyaachemmoyichoo bayote; bi doono bi hillooch waa beetone” iye.

³³ Ebin boonoshich batt bi gettaaha, wocheyecho shaggiye. Bi hillooch taatoo waaꞌi, “Ebi xuuxo waato, Doono Yeer waaneeniye. Ishigaata, Doono Yeeri ikke mooyon bi tuniyemmoyich ta quyemmo, aati wottooniye?” iye.