2 Taateenaꞌo 5 - Kafa Linguistics Project

Qeddee Shaddee Biiyoochee Naꞌimaani Wodoo

¹ Sooriyee taatoochi ginee iraashoo Naꞌimaani Doono Yeeri biinna wudoon Sooriyeenaꞌoyich bi daniitoyich, bi doono aafoochaa gidoon daneti ashoone; wottoo kupphoonaa ginee anaamonane. Tunebaani qeddee shaddee biiyechone.

² Ikke areddoon Sooriyeenaꞌo Israꞌeelee showoon boonoshi koyiyooba, giisheche busheen keccii daammitinaꞌone. Biyoo Naꞌimaani mecheyich maddaa beehan.

³ Bi genneyichoo, “Ta doono Shamaara beeti keemecho waan bi hammito gaata, bi qeddee shaddee biiyoochee biin wodiyeshone” iyan.

⁴ Ebina Naꞌimaani hammiꞌi taatoyich, “Israꞌeelee showoochee waati bushee ishichaa ishichitine” iꞌi gettiye.

⁵ Sooriyee taatoo biich, “And tiyiree hambe; Israꞌeelee taatoyich koorichoon kooremmo taane” iye. Ebich Naꞌimaani keejje ballaa aabbe kiilo giraam bede birewoon, shabe kiilo giraam bede aachoonaa aashire shaddee tahoonon yechiꞌi hammiye.

⁶ Israꞌeelee taatoyich bi deebiti koorichoo: “Qeddee shaddee biiyoochee biin ne wodiyemmoyich, koorichoon biich yechiyaꞌa, ta guuno Naꞌimaanin ne waan daachiito taane” ii beetone.

⁷ Israꞌeelee taatoo koorichoon shemmee bi tahoon keexxiꞌi, “Ashoon qeddee shaddee biiyoochee ta wodiyemmoyich, hini uroon ta waan bi deejjito, iberoochaa wuxoonaa wodiyoonon hakkiibeeti Nuggishoo ta tunetenane? Taanna kaaree bi qaawoon ebin beegote” iye.

⁸ Yeer asho Elisayi Israꞌeelee taatoo bi tahoon keexon waayeꞌi, “Ne tahoon amoyich keexxenne? Uro ta waan wobe. Israꞌeelee showooch keemecho beemon ariyemmone” iꞌi wochoon daachiihe.

⁹ Naꞌimaaniyoo bi haresheenaꞌonaa bi gaarinaꞌona waaꞌi, Elisayi kechi kellooch, maach neexehe.

¹⁰ Elisayiyoo, “Hamiree Yoordaanoosi aacoochaa shabaatte wottoon machebe; ne biiyoochee wodemmo neene; newoo xallemmo neene” iꞌi bi waan wocheyechon daachiihe.

¹¹ Tunebaani Naꞌimaani kaarehe; ishichiibeenoo hammiye: “Ta waan waa neexe, bi Nuggishoo Doono Yeerichi shigoon ceegi, ta qeddee shaddee biiyee toommoochoo bi kishoon yaggiree taan wodiyemmoniye taach bi shaahito.

¹² Damaasiqee showee aacinaꞌo Abaaninaa Faarfaarina Israꞌeelee showooch beeti aacinaꞌo bulliyee beshaacheete? Eboshina macheꞌi xalloon hakkaacheshote?” iye. Ebich kaareꞌi wottee hammiye.

¹³ Tunebaani bi naayinaꞌo bi gaꞌooch waaꞌi, “Ta doonocho, keemecho ebiyee beshe magge mooyon bi gettito gaatoona, tuniyaachesho neene? Ishigaata, ‘Macheree xallebe’ bi ito neen maggehe, amoone?” iyeete.

¹⁴ Ebich Naꞌimaani Yoordaanoosi aacooch kindiye. Doono Yeer asho gettitoommon, shabaatte wottoon aacooch giyii kechiye. Bi qeddo wodiꞌi gaggere bushoochi qeddoon shaahiye; xalleenoo iye.

¹⁵ Aroochee Naꞌimaani bi naayinaꞌo bullina tookkii Yeer asho waan wottehe. Waaꞌinoo bi aafooch neexeechii, “Ebiyoche, Israꞌeelee showoyee besh, showoo bulliich Nuggishoo aallo bi tunoon ariito taane. Andoo ne guuno ta waanee wojjoon ne deqqemmoyich neen qollehoye” iye.

¹⁶ Tunebaani keemecho, “Biich ta maddaabeeti, beeyechi Doono Yeeri beege; amoonolla deꞌaache” iye. Bi deqqemmoyich Naꞌimaani qollee xuuxiihe; tunebaani Elisayi qajjiye.

¹⁷ Naꞌimaaniyoo biich, “Ne guuno ta ebiyee damba Doono Yeeriyee besh, bare nuggisheenaꞌoyich micciibeeti deejjoon woyee bare deejjoon deejjaachemmo taane. Ebich gutte xaanee showoon ta daammemmoyich, taach ne daaggemmon neen qollehoye.

¹⁸ Tunebaani Doono Yeeri ikke mooyoyich baach ne guuno taach maaroon gede. Ebiyoo taatoo ta doono aroochaa goyinnoyich, Rimoonichi yaafee kexooch bi giyigaata, tawoo bi baatoon deggaa giyaꞌa Rimoonichi yaafee kexoochaa ta goyinnegaata, Doono Yeeri ebi mooyoyich taach maaroon gede” iye.

¹⁹ Elisayiyoo biich, “Diggoona hambe” iye. Tunebaani Naꞌimaani giishechoon bi wokkimmona,

²⁰ Yeer asho Elisayichi aafee bushoo Giyaazi, “Ta doono ebi Sooriyee asho Naꞌimaanin maariye. Bi deebiti mooyoochee amoonolla deꞌaanoone. Beeyechi Doono Yeeri beege; bi hillooch woci hamiree, bi waanee ikke mooyon deqqemmo taane” iꞌi gabiye.

²¹ Ebina Giyaazi Naꞌimaanin dabbiye. Naꞌimaaniyoo ikke asho bi hillooch woccii beeton beeggii, biinna daneya gaariichee kindiꞌi, “Bulli mooyo diggoone?” iꞌi echehe.

²² Aroochee Giyaazi wochiꞌi, “Diggoone; ta doono, ‘And keemechinaꞌochi guuphoochee gutte gurimaasheenaꞌo geppechi Efreemee showoochee ta waan waatinaꞌone. Shaashaa awudde kiilo giraamee birewoonaa gutte shaddee tahoonon boonoshich ne immemmoyich neen qollehoye’ iꞌi taan wochetone” iye.

²³ Aroochee Naꞌimaani “Shichaa shimitte kiilo giraamee birewoonona ta imaa daambe” iꞌi qollee xuuxiihe. Aroochee shichaa shimitte kiilo giraamee birewoon gutte mollexxooch geddii cuchii, gutte shaddee tahoona tookkii bi naayinaꞌoyich shaakkiihe. Boonoshiyoo shaaggiꞌi Giyaazi aafooch shiichiyeete.

²⁴ Geppooch waachii, ebi qiiceenaꞌon boonoshi kishoochee deqqiꞌi, kexooch kotiichii, asheenaꞌon daachiihe. Boonoshiyoo hammiyeete.

²⁵ Tunebaani Giyaazi giyiꞌi, bi doono aafooch neexehe. Elisayiyoo, “Giyaazo, amoocheeniye ne waabeeto?” iye. Biyoo, “Ta, ne guuno amoochona hamaano taane” iye.

²⁶ Tunebaani Elisayi biich, “Neenna daneya uro gaariichee kindii bi beegaata, ayaanoona neenna tookkii beetaachote? Hini, birewoonaa tahoona, bageenaꞌonaa gatteenaꞌona, guuninaꞌonaa gonneenaꞌona, zayitee michi budonaa woyinee budona deqqeyemmi yemeenoone?

²⁷ Ebich Naꞌimaanichi qeddee shaddee biiyo neenna yeshemmone. Bulli yemeenoon ne yaraa yarooch beshemmone” iye. Ebina Giyaazi qeddee shaddee biiyoona xooppee kecho naccoommon nacceꞌi, Elisayi aafoochee kechiye.