2 Taateenaꞌo 4 - Kafa Linguistics Project

Xuume Ureen Elisayi Gaacho

¹ Ikke areddoon keemechinaꞌochi guuphi daggoochee ikkoochi mechee Elisayi waan hammaꞌa, “Ne guuno tuneti ta keno qititone. Ne guunoo Doono Yeerin shattiibeeto bi tunoon ne ariyaabeeto neene. Tunebaani hiishecho ta gutte anaami bushiishoon guuno tuniiree daamma waatone” iyaꞌa cookiyan.

² Elisayiyoo, “Neech ta tuniyemmoyich ne qaawiibeeto, amooniye? Ne kexooch beeton taach gete” iye. Ureyoo, “Ne gonnee taach qulleech beeti zayitoyee besh, amolla aalloone” iyan.

³ Aroochee Elisayi biich, “Hamiree, ne giyeenaꞌo waanee baade baaretoon tawushebe; giishiyaahine.

⁴ Kexooch giyiichi, neennaa ne bushiishoonochi toommooch shaaqqoon hice; ebi baaretoo bulliich zayitoon kite; ceennii ceenniton ikke badd hododdiibe” iye.

⁵ Ebich bi waanee hammaꞌa, biinnaa bi bushiishoonochi toommooch shaaqqoon hiccahan. Boonoshiyoo baaretoon bi waan giddiitaa, arooch woniyaa beehan.

⁶ Baareteenaꞌo ceennitoyee gubb, bi bushoon, “Bare baaretoon taach deebe” iyan. Biyoo, “Bare baaretoo aalloone” iye. Aroochee zayito neexehe.

⁷ Ureyoo hammaꞌa, ebin Yeer ashoyich gettahan. Aroo, “Daamiree kembe; hiishechoyichoo qoce; aroocheenoo echeto neennaa ne bushiishoonoyich tunebe” iye.

Shuneemee Ureechi Bushoo Qitoochee Wodoo

⁸ Ikke areddoon Elisayi Shuneem hammiye. Aroochoo ikke gaannechi ure beetine. Areyoo Elisayi maayoon bi maayemmoyich kupphiyaa ataalliyan. Aroona bi besheebeeti aabo bulliich, maayoon mamoyich bi kexooch giyii beehe.

⁹ Ureyoo bi kenoyich, “Ebi wochii wochii no maaxona besheebeeti uro yaafeeti, Yeer asho bi tunoon ariiti taane.

¹⁰ Ebich kechi toommooch giisheche kexon shuuneree, arooch qeenon, madelloon, gabberoonaa ceechoonon gedone; no waan bi waammi aabo bulliich, arooch kashebe” iyan.

¹¹ Ikke areddoon Elisayi arooch waaꞌi, kechi toommooch beeti kuxooch kechii arooch kashehe.

¹² Bi aafee bushoo Giyaazich, “Ebi Shuneemee ureen ceege” iye. Bi ceegaa waaꞌa, bi aafooch neexahan.

¹³ Elisayiyoo Giyaazich, “ ‘Noocha iyaꞌa ebi shaahoon yulleti neene. Amo neech tunemmoyichiye ne qaawaabeeto? Taatoyich woyee bi ginee iraashoyich ta gettemmi ne mooyo beete?’ getiree echebe” iye. Ureyoo wochaꞌa, “Ame iritolla taach aalloone. Ta beeto, ta xibeenaꞌo daggoochiye” iyan.

¹⁴ Elisayiyoo, “Ishigaata, amoon biich tuniibona?” iye. Giyaazi wochiꞌi, “Bushoo biich aalloone. Bi kenoo geenetone” iye.

¹⁵ Elisayiyoo, “Ishigaata, biin ceege” iye. Bi ceegaa waaꞌa, kellooch neexahan.

¹⁶ Elisayiyoo ureyich, “Waabeeti natooch, ebi goora anaami bushoon shiyiree tiqqemmi neene” iye. Ureyoo, “Ebi toonoone, Yeer ashoocho, ta doonocho, ne gonnee taach koottaahine” iyan.

¹⁷ Ureyoo xifahan; Elisayi gettitoommon, are goorooch, gubbi natooch anaami bushoon shiyahan.

¹⁸ Bushoo dicciye; ikke areddoon maayoon qeccii beetinaꞌo beetooch, bi nihoo waan hammiye.

¹⁹ Diqqoona bi nihoyich, “Ta qello; ta qello!” iye. Bi nihoo bi aafee bushoyich, “Ebi bushoon tiqqeree bi indee waan dambe” iye.

²⁰ Bi aafee bushoo tiqqeꞌi, bi indee waan daammiye. Bushoo aabe tukk beddaahaa, bi indee doshee toommooch kotehe; aroocheenoo qitiye.

²¹ Ureyoo damba kichaꞌa, Yeer ashoochi qeenooch qeejjiyan; kexoochee kechaachaa, shaaqqoon bi toommooch hiccahan.

²² Aroochee bi kenoon ceeggaꞌa, “Yeer asho waan kaate hami shagi ta woyemmoyich, ikke aafee bushoonaa ikke kuroonon taach deejjibe” iyan.

²³ Biyoo, “Hanaach agenee keyi baaroo woyee shambetoo toone; bi waan ne hammemmo amoyichiye?” iye. Ureyoo “Diggoyichiye” iyan.

²⁴ Kurooch koroon haxxiyaꞌa aafee bushoon, “Kaatii kaatii gashebe; ta getaanoon, taacha getiree nibbeyaahine” iyan.

²⁵ Ebina tiyaꞌa, Yeer asho beeti, Qermeloosi guudooch hammahan. Yeer asho wohoochaa biin beeggiꞌi, bi aafee bushoo Giyaazich, “Ciine; bekk ebeege, Shuneemee ure!

²⁶ Bi waan woci hamiree, diggee bi tunoon, bi kenoonaa bi bushoona diggoo boonoshi tunoon echebe” iye. Areyoo bulli mooyo diggoo bi tunoon gettahan.

²⁷ Aroochee Yeer asho beeti guudi toommooch shaggaa dihiichaa, bi baatoon gaappaa yechahan. Giyaazi biin wokkiiya waahe. Tunebaani Yeer asho biich, “Qaye; bi kashe caammetine. Doono Yeeri ebin taach aachitone. Taachoo getaanoone” iye.

²⁸ Ebiyee gubb aree, “Ta doonocho, bushoon taach ne immemmoyich echeti taane? ‘Taan dachiyaahine’ getaane taane?” iyan.

²⁹ Elisayiyoo Giyaazich, “Ne shimetoon cuyebe; ta gumboonoo ne kishooch yeshiree hambe; ashoona ne danegaata, diggiyaahine; asho neen diggii gaatoo, biich wochiyaahine; ta gumboonoo bushoo toommooch qeejjibe” iye.

³⁰ Tunebaani bushoochi indee, “Beeyechi Doono Yeeri beege! Beeyechi ne kashoonoo wogehoye. Ciroona neen dufi hamaache” iyan. Ebich tiyiꞌi biin dabbiye.

³¹ Giyaaziyoo boonoshiyee shiichii hammiꞌi, gumboon bushoo toommooch qeejjiye. Tunebaani qaaremmon, woyee kachemmon qajjiye. Ebich wottee hammiꞌi, Elisayich, “Bushoo tiyaanoone” iye.

³² Elisayi kexooch giyaahaa, ebiyoche, bushoo qitiꞌi bi qeenoochoo qeyiꞌi beehe.

³³ Giyiꞌinoo shaaqqoon boonoshi gutti toommooch hicciye; Doono Yeer waan corootiye.

³⁴ Waaꞌi bushoo toommooch yappimiichii, bi noonoon bushoochi noonooch, bi aafoon bi aafee toommooch, bi kishoon bi kishee toommooch geddiye. Bushoo toommooch bi yappimaa, bushoochi achoo qeecciye.

³⁵ Aroochee Elisayi tiyiꞌi, kechi daggooch ikke wottoon okk hach shaꞌehe. Aroochee wochinnoon bushoo toommooch yappimmiye. Bushoo shabaatte wottoon hexxijjiichii, bi aafoon gaxxiye.

³⁶ Aroochee Elisayi Giyaazin ceeggii, “Shuneemee ureen ceege” iye. Giyaaziyoo ceeggiye. Waaꞌa bi giyemmona, “Ne bushoon tiijjiree daambe” iye.

³⁷ Areyoo giyaꞌa bi baatooch gugummiihan; bi bushoonoo tiijjaꞌa kechaa hammahan.

Wuxiibeeti Attechi Woxo

³⁸ Elisayi wochinnoon Galigali hammiye. Are showooch shaacoo giyitone. Ikke guuphi keemechinaꞌo bi aafooch koteꞌi beetaa, bi aafee bushoyich, “Ooge shexxoon gemmooch kotiiree, ebi asheenaꞌoyich woxoon woxebe” iye.

³⁹ Boonoshi daggoochee ikkoo kubbi waamon deeboyich, gaddooch hammiꞌi, arooch colleti qomboon danehe. Ebi qomboochee botoon macii bi tahoona ceechiꞌi waahe. Kappheꞌinoo woxee shexxooch geddiye. Tunebaani amo gaata ariyaaneenaꞌone.

⁴⁰ Aroochee keemechinaꞌo, boonoshi maayemmoyich kechiti woxoon maaya boonoshi kookkooch bechiꞌi, “Yeer ashoocho, ashoon wuxiibeeti xuppatto shexxooch beetone” iꞌi cookiyeete; mamonoo hakkaaneenaꞌone.

⁴¹ Biyoo, “Buddinoon taach deebote” iye. Buddinoonoo shexxooch geddiichii, “Asheenaꞌo maayemmoyich kichibote” iye. Ebina shexxoochee gonde mooyo wokkiye.

Balle Asheenaꞌo Maayoon Mamo

⁴² Ikke areddoon ikke uro Baꞌaal Shalishee qaabbe maayoochee kachiti, hiye xekee sheqee koshonaa maayi moochoonon bi mollexxoona yechii, Yeer asho waan waahe. Elisayiyoo bi aafee bushoyich, “Boonoshi maayemmoyich, asheenaꞌoyich imbe” iye.

⁴³ Tunebaani bi aafee bushoo, “Ebin balle ashoyich ta giddiyemmo, aabichireeshiye?” iye. Elisayiyoo, “ ‘Maaree echiyemminaꞌone’ iꞌi Doono Yeeri gettitone. Ebich boonoshi maayemmoyich asheenaꞌoyich imbe” iye.

⁴⁴ Aroochee asheenaꞌoyich giddiihe. Doono Yeeri gettitoommon, boonoshi maataa echehe.