2 Taateenaꞌo 3 - Kafa Linguistics Project

Israꞌeeleenaꞌonaa Moꞌabeenaꞌona Koyo

¹ Yihudee taatoo Yoshafaaxi taateti aaraa shimittinnee natooba, Akaabi bushoo Yoraami Israꞌeeleenaꞌo toommooch taatehe; Shamaara beechii, aaraa gutte naton qeejjiye.

² Yoraami Doono Yeeri aafooch gonde mooyon shuunehe. Tunebaani bi tuniiti gonde mooyo bi nihoonaa bi indeena tuniitoommo toonoone. Asheenaꞌo goyinneebeeti, ebiyoo bi nihoo shuuniiti, Baꞌaalee xaqqee giimboon waaxxii aalliitone.

³ Tunebaani Israꞌeeleenaꞌon axaaxoo shuuniiti, Nebaaxi bushoo Yeroboꞌami shuuneti axaaxoon dabbiye; aroocheenoo wohaanoone.

⁴ Ebiyooba Moꞌabee taatoo Meeshi bagoon shiijjii beetone. Biyoo balle hume gishiishi bagee baaddoonaa balle hume ogooge bagee baaddoonochi huushoon Israꞌeelee taatoyich giijjii beehe.

⁵ Tunebaani taatoo Akaabi qititoyee gubb, Moꞌabee taatoo Israꞌeelee taatoo toommooch hukkoon shuunehe.

⁶ Ebich ebiyooba taatoo Yoraami Shamaaree kechii hammii, Israꞌeelee asho bullin kiciye.

⁷ Yihudee taatoo Yoshafaax waan wocheyechon daachiiꞌi, “Moꞌabee taatoo ta toommooch hukkoon bi shuunetoyich, taanna tookki Moꞌabeenaꞌon koyoyich hammenne?” iye. Biyoo, “Hammemmo taane; tawoo neenoommo taane; ta asheenaꞌoo ne asheenaꞌoomminaꞌone; ta haresheenaꞌoo ne haresheenaꞌoomminaꞌone” iye.

⁸ Aroochee Yoshafaaxi, “No hammemmo aabinane?” iꞌi echehe. Yoraami, “Edoomi baraheexi gommonane” iꞌi wochiye.

⁹ Ebich Israꞌeelee taatoo Yihudee taatoonaa Edoomee taatoona tookkii hammiye. Shabaatte qemi gommon boonoshi guudditoyee gubb, ginee naayinaꞌonaa boonoshi hillooch beeti gijjeenaꞌonoyich aaco aallehe.

¹⁰ Israꞌeelee taatoo, “Yeeh, Doono Yeeri ebi keejje taatoo noon bi ceeggito, Moꞌabee taatoo kishooch beshii imoyichiye?” iye.

¹¹ Aroochee Yoshafaaxi, “Doono Yeerin biinna no echemmi, Doono Yeerichi keemecho hiniich aalle?” iꞌi echehe. Israꞌeelee taatoochi ginee iraasheenaꞌoochee ikkoo, “Eliyaasi kishooch aacon hakketi, Shafaaxi bushoo Elisayi hiniich beetone” iꞌi wochiye.

¹² Yoshafaaxiyoo, “Doono Yeerichi qaaro bi waanee danemmone” iye. Ebich Israꞌeelee taatoo, Yoshafaaxinaa Edoomee taatoona dugilla bi waan hammiyeete.

¹³ Elisayiyoo Israꞌeelee taatoyich, “Neennaa taannon daniyemmi amee mooyolla aalloone. Ne nihoonaa ne indeenochi keemechinaꞌo beetooch hambe” iye. Tunebaani Israꞌeelee taatoo biich, “Ebi toonoone; keejje taatoo noon Moꞌabee taatoo kishooch beshiiꞌi imoyich ceeggito, Doono Yeerine” iye.

¹⁴ Aroochee Elisayi, “Biich ta maddaabeeti, Beshe Mawe Doono Yeeri beege! Yihudee taatoo Yoshafaaxicha ta getaanegaata, neen ciini beegaachesho taane.

¹⁵ Andoo ooge ximboon yexxii beeton taach deebote” iye. Ooge ximboon yexxiibeeto bi yexximmona, Doono Yeerichi giidoo Elisayi toommooch kindiye.

¹⁶ Aroochee ishichiye: “Doono Yeeri ishichiye: ‘Hini bamboo bulliich oppoon iiyote.

¹⁷ Yongoon woyee amiyon beegaachemmo ittoshine. Tunebaani hini bambooch aaco ceennemmone. Ebich ittoshi, ittoshi miiminaꞌonaa ittoshi gijjeenaꞌona uchemmo ittoshine.

¹⁸ Ebiyoo Doono Yeerich kette mooyone. Moꞌabeenaꞌonoo ittoshi kishooch beshiiree immemmone.

¹⁹ Xaqqee uxerechi boonoshi katemoonaa gaawe katemoonon bullin yexxemmo ittoshine; boonoshi gaawe mixo bullin dichemmo ittoshine; boonoshi aachi xuupho bullin dookkemmo ittoshine; gaawe boonoshi goyee budoochoo xaqqoon ceechiree duubiyemmo ittoshine’ itone” iye.

²⁰ Bi dechara, maaddee deejjoo giddeebeeti saatooch, Edoom waanee aaco bubiibee waaꞌi, showoon bullehe.

²¹ Ebiyooba taateenaꞌo boonoshin kocha womon Moꞌabee asho bulli waayeꞌi, giishoochee oogooch beddaahaa ginee qiicoon cuyoon hakkito bulli ceegaa kechiyeete; showee daaroochoo kechii quyeheete.

²² Maadda yaaꞌoona boonoshi tiyaahaa ebiyoche, aachi toommooch aabe aaxxemmona, aaco waariye. Moꞌabee asheenaꞌo boonoshi ciinoochaa aaco damoochoommon ceelletaa beeggiꞌi,

²³ “Hini damoani am! Iberoochaa taateenaꞌo boonoshinaa boonoshina koyee, ciiretinaꞌone. Illa Moꞌabee asheenaꞌote, ittoshi tiyaa hamiree boonoshi kaamboochee qiicoon macibone” iyeete.

²⁴ Tunebaani Israꞌeeleenaꞌo kaambooch boonoshi waataa, Israꞌeeleenaꞌo tiyiꞌi boonoshin kochiyeete. Moꞌabee asheenaꞌoo boonoshi aafoochee woceheete. Moꞌabee asheenaꞌon kochiibee yookkii dabbiyeete.

²⁵ Boonoshi katemeenaꞌonoo happiyeete; gaawe boonoshi goyee budo bulliich bi keeshimmi wottoon, asho bi ikkikkoona ikkikke xaqqoon duppii beehe. Aachi xuupho bullin dookkiyeete; gaawe mixo bullin dichiyeete. Ciiroochaa Qiir Hareseti katemoo baach bi xaqqee uxeroona tookkii echehe. Tunebaani xeppello duppii beetinaꞌo giichiꞌi, ebi katemoonoo yexxiyeete.

²⁶ Moꞌabee taatoo koyo kupphee hamon beeggiꞌi, goraadoon cuyeti shabaatte balle asheenaꞌon yechiꞌi, Edoomee taatoo beetona kuxi besheya qiiccehe; tunebaani beshoon hakkaanoone.

²⁷ Ebiyooba bi xaaꞌooch kereeree taatemmi bi gutenee bushoon daammii, katemee uxeree toommoochaa micciibeeti deejjoo tuniiꞌi deejjiye. Israꞌeeleenaꞌo toommoochoo ooge kaaro waahe. Aroochee qajjii wotteꞌi, boonoshi hajjee showooch hammiyeete.