2 Taateenaꞌo 25 - Kafa Linguistics Project

¹ Sedeqiyaasi taateti yiixiyinnee natooba, aashirinnee agenee aashirinnee qemooba, Baabloonee taatoo Nabukadinatsori bi ginee naayo bullina tookkii waaꞌi, Yerusaalemin kocha giichiye. Bi ginee naayinaꞌoo katemee guudoona showoon gutiyeete.

² Ebina Sedeqiyaasi taateti aaraa ikkinnee natooch beddaahaa katemoo giicheehe.

³ Aroobee natooch, awuddinnee agenee yiixiyinnee qemooba, shaacoo katemooch bi kupphetoyich, are katemee asheenaꞌo maayemmi maayo amolla aallehe.

⁴ Katemee uxeroo gaakkeehe; Baabloonee ginee naayinaꞌo katemee guudoona boonoshi beetaa, taatoo bi ginee naayo bullina tookkii xumoona muricciꞌi, gutte uxeree danooch beeti kelloona taatoochi bechee mixo beeto waan daammiibeeti gommona, Yoordaanoosi bamboo waan hammiye.

⁵ Tunebaani Baabloonee ginee naayinaꞌo taatoo Sedeqiyaasin yookkii dabbiꞌi, Yaariki gaꞌooch beeti gaddoochaa yechiyeete. Bi ginee naayinaꞌo biin duppiichii shaceheete.

⁶ Aroochee taatoon yechiꞌi, Baabloonee taatoo beeti Ribila deebiyeete. Aroochaa Nabukadinatsori bi toommooch nalliye.

⁷ Sedeqiyaasi ciinnii beetaa, bi bushiisheenaꞌon wuxiyeete; Sedeqiyaasichi aafoonoo qoqenee kichiyeete; qoqqaannoona cuchiꞌi Baabloonee showooch daammiyeete.

Yaafee Kexo Happeyoo

⁸ Baabloonee showooch Nabukadinatsori taateti aaraa yiixiyinnee natooba, uuchinnee agenee shabaattinnee qemooba, Nabukadinatsori naayonaa taatoo quyee naayinaꞌochi iraashoona tuneti Naabuzaridaani Yerusaalem waahe.

⁹ Aroochee Doono Yeerichi yaafee kexonaa taatee kexonon michiye. Yerusaalem beeti ogoogeenaꞌo kexo bullinaa bare kexo bullinon michiye.

¹⁰ Taatoo quyee naayinaꞌochi iraashoona tookkii beeti, Baabloonee ginee naayinaꞌo bulli Yerusaalemi guudoona beeti uxeroon happiyeete.

¹¹ Aroochee taatoo quyee naayinaꞌochi iraashoo Naabuzaridaani Yerusaalem echeti asheenaꞌo bullin, koyoon qajjiꞌi Baabloonee taatoo waan wottetinaꞌonaa eche dofee asheenaꞌonon keccii Baabloonee showooch daammiye.

¹² Tunebaani girechi ikkikke asheenaꞌon, woyinee bechechinaꞌonaa goyee gochechinaꞌona boonoshi tunemmoyich echiihe.

¹³ Baabloonee asheenaꞌo Doono Yeerichi yaafee kexooch beeti gooshee giimbeenaꞌon, gengechi goonee koteenaꞌonaa gooshoochee shuuneeti, aaco kiceebeeti, ooge gamini goonoonon tiichiꞌi, gooshoon Baabloonee showooch daammiyeete.

¹⁴ Gubeenaꞌon, tulloo ucheebeeti maankeenaꞌon, qafeteenaꞌon, ixaanee qiiceenaꞌon, yaafee kechi maddooch heechiibeeti gooshee qiico bullin,

¹⁵ taatoo quyee naayinaꞌochi iraashoo aachee qiico bullinaa birewee qiico bullinon, qaaqqee buno yecheebeeti qiiceenaꞌonaa saaneenaꞌonooch beddaahaa daammiye.

¹⁶ Doono Yeerichi yaafee kexooch beeti, ebiyoo taatoo Solomooni shuuniiti gutte giimbeechi gooshoon, gengechi goonee koteenaꞌon, aaco kiceebeeti ooge gamini goonoonochi gooshoonoo daammiye. Ebi qiiceenaꞌochi gooshoo maggee naboona, machoona qoco hakkeyaanoone.

¹⁷ Ikke giimbee neexo aaraa shimitte hiroone. Ebi giimbee kallaachoo shuuneeto gooshoocheenane. Ebi kallaachee neexo keejje hiroone. Ebi kallaachee guudoona tookkaa gooshoochee shuuneeti romaanee aafoommi qecaaqeconaa dabboommi mooyona beetone; wotta ohe giimboo ebiyoommone.

Yihudee Asheenaꞌo Baabloonee Showooch Kecaa Hamo

¹⁸ Taatoo quyee naayinaꞌochi iraashoo Naabuzaridaani qeeshee guudo Seraayin, bi gaachoo Sofoniyaasinaa Yeerichi yaafee kechi kelloon quyeebeeti keejje iraasheenaꞌonon yechii daammiye.

¹⁹ Katemoochee, ginee iraashoo tuneti ikke uroon, taatoochi mikkirechinaꞌo tuneti uuche asheenaꞌon, showee asheenaꞌon ginooch kaacciibeeti, ginee iraashoochi koorechonaa showee asho tuneti shicheenaꞌonon daammiye.

²⁰ Taatoo quyee naayinaꞌochi iraashoo Naabuzaridaani Ribila beeti Baabloonee taatoo waan boonoshin yechii daammiye.

²¹ Baabloonee taatoo boonoshin yexxiihe; Hamaatee showooch beeti Ribilaa boonoshin wuxiihe. Ebiyoommon Yihudee asheenaꞌo boonoshi showoochee kecaa hammiyeete.

Gedaliyi Yihudee Showooch Iraashoo Tuno

²² Baabloonee taatoo Nabukadinatsori Shafaani bushoo, Ahiqaami bushoo Gedaliyin kecaanoon, Yihudee showooch echeti asheenaꞌo toommooch iraashiihe.

²³ Kishoo imaanee, Yihudee ginee iraasheenaꞌonaa ginee naayinaꞌona, Gedaliyin Baabloonee taatoo iraashiyoon waayee, Mitsiphi katemooch Gedaliy waan waaheete. Ebi ginee iraasheenaꞌo Netaani bushoo Ishmaꞌeeli, Qareehi bushoo Yohanaani, Nexoofi katemee asho Tanihumeti bushoo Seraayinaa Maꞌakee ashoochi bushoo Yazaniyinane.

²⁴ Gedaliyi boonoshinaa boonoshi ginee naayinaꞌonoyich ishichiꞌi wogoon giyiye: “Baabloonee ukkireenaꞌoyich shattaahote; hini showooch kotebote. Baabloonee taatoyich maddebote. Ebin ittoshi tuniigaata, ittoshich diggoo tunemmone” iye.

²⁵ Tunebaani aroobee natoobee shabaattinnee agenooba, taatee yaroochee tuneti Elishami bushoo Netaani bushoo Ishmaꞌeeli aashire asheenaꞌona tookkii waaꞌi, Gedaliyin, biinna tookkii Mitsiphi gafooch beeti Ayihudeenaꞌonaa Baabloonee asheenaꞌonon wuxiye.

²⁶ Ebichi naboona Baabloonee asheenaꞌoyich boonoshi shattitoyich, giishoochee oogooch beddaahaa beeti asheenaꞌo bulli ginee iraasheenaꞌona tookkii tiyiꞌi, Gibits hammiyeete.

Yoyakiini Cuyoochee Biicho

²⁷ Yihudee taatoo Yoyakiini kecceti shaashaa shabaattinnee natooba, aaraa guttinnee agenee hiyaa shabaattinnee qemooba, Baabloonee taatoo Ebil Merodaaki bi taateti batti batti natooch, ariqqeꞌi Yihudee taatoo Yoyakiinin cuyee kexoochee kichiye.

²⁸ Ebil Merodaaki Yoyakiinin kaamoona yibbaatiihe; biichoommon kecaa hammiꞌi, Baabloonee showooch beeti taateenaꞌo bullichoyee beshe oogee qeenon biich immiye.

²⁹ Cuyee kexoochaa Yoyakiini taheebeeti tahoonoo shaddiye. Aroochee Yoyakiini bi qitimmi wottoon taatoochi madoochee maa beehe.

³⁰ Kashoona bi beeti yemeeno bulliich, taatoo qemi qemona biich qaawiibeeti mooyon immii beehe.