2 Taateenaꞌo 24 - Kafa Linguistics Project

¹ Yoyaqiimi taatee yemeenooch, Baabloonee taatoo Nabukadinatsori Yihudee showoon kochii yechiye. Yoyaqiimi keejje naton biich bi hajjeetoyee gubb, wochinnoon bi toommooch hukkoon tiijjiye.

² Doono Yeeri Baabloonee ginee naayinaꞌon, Sooriyee ginee naayinaꞌon, Moꞌabee ginee naayinaꞌonaa Amoonee ginee naayinaꞌonon Yoyaqiiminaa Yihudee asheenaꞌonon boonoshi aalliyemmoyich daachiihe. Bi daachiito, bi guuninaꞌo tuneti keemechinaꞌona Yihudee showoon aalliyeechon bi gettiti keemo ceennemmoyichiye.

³ Ebi bulli tuneto, taatoo Minaasi shuuneti axaaxoonaa bi tuniiti mooyo bullinochi naboona Yihudee asheenaꞌon bi aafoochee wokkiyoyich Doono Yeeri gettitoommoniye.

⁴ Ebiyee baroo wotta, Minaasi xalle ashi damoon bi ukkee naboonane; Yerusaalemin xalle ashi damoona tajjitone. Ebich Doono Yeeri biin maaroyich daaggaanoone.

⁵ Yoyaqiimi shuuneti eche shuunoonaa bi tuniiti mooyo bullina Yihudee taateenaꞌo kiinee macaafooch kooreetone.

⁶ Aroochee Yoyaqiimi qitiꞌi bi qaabbechinaꞌo waan xaꞌeehe. Bi bushoo Yoyakiini bi xaaꞌooch kereeꞌi taatehe.

⁷ Baabloonee taatoo Efiraaxisi aacoochee tiijjii Gibitsee aachi gashooch beddaahaa beeti Gibitsee taatoo qeejjiibeeti showoo bullin bi yechitoyich, Gibitsee taatoonaa bi ginee naayinaꞌona ebiyee gubb Gibitsee showoyee maach koyooch keyaaneenaꞌone.

Yihudee Taatoo Yoyakiini Mooyo

⁸ Yoyakiini bi taatehooba, bi eeno aaraa shimitte natone. Yerusaalem beechii keejje agenoon qeejjiye. Bi indee Nehushiti getteehan; biyoo Yerusaalemi asho Elinaataani busheene.

⁹ Yoyakiini bi nihoo tuniitoommon, Doono Yeeri aafooch gonde mooyon tuniihe.

¹⁰ Ebiyooba Baabloonee taatoo Nabukadinatsorichi ginee naayinaꞌo Yerusaalem waaꞌi, katemoon giichiyeete.

¹¹ Katemoon boonoshi giishiyooba, Baabloonee taatoo Nabukadinatsori Yerusaalem waahe.

¹² Yihudee taatoo Yoyakiini bi indeena, bi iraasheenaꞌona, bi woraaferasheenaꞌonaa bi taatee kechi ukkireenaꞌona tookkii waaꞌi, Baabloonee taatoyich kishoon immiye. Baabloonee taatoo bi taateti shimittinnee natooba, Yoyakiinin keccii daammiye.

¹³ Taatee kexonaa yaafee kexonooch beeti gaanno bullin Baabloonee showooch daammiye. Shiichiꞌi Doono Yeeri gettiti qaaroommon, Doono Yeerichi yaafee kexooch beeti, ebiyoo taatoo Solomooni shuuniiti aachee qiico bullin daammiye.

¹⁴ Nabukadinatsori Yerusaalemi asheenaꞌo bullin, woraaferasheenaꞌo bullinaa ginee anaaminaꞌo tuneti asheenaꞌo bullinon, aashire hume asheenaꞌon kecciꞌi daammiye. Boonoshina tookkii qoppechinaꞌonaa qemminaꞌo bullinon daammiye. Girechi showee asheenaꞌoyee besh koniyoona echeyaanoone.

¹⁵ Nabukadinatsori Yoyakiinin keccii, Baabloonee showooch daammiye. Taatoochi indeen, taatoochi mecheenaꞌon, bi taatee kechi ukkireenaꞌonaa Yihudee showee qaabbeenaꞌonon kecciꞌi, Yerusaalemee Baabloonee showooch daammiye.

¹⁶ Baabloonee taatoo, ginee anaaminaꞌo tuneti shabaatte hume asheenaꞌon, shuuna ariyechinaꞌonaa gooshukkeenaꞌona tuneti hume asheenaꞌon kecciꞌi, Baabloonee showooch daammiye; eboshi bulliyoo kuppheenaꞌonaa koyoyich qannitinaꞌonane.

¹⁷ Nabukadinatsori Yoyakiinichi keroon bi niheeshoo Mataniyin Yihudee showooch taatiihe; bi shigoonoo Sedeqiyaasi iꞌi shaddiye.

Yihudee Taatoo Sedeqiyaasi Mooyo

¹⁸ Sedeqiyaasi bi taatehooba, bi eeno hiyaa ikke natone. Yerusaalem beechii aaraa ikke naton qeejjiye. Bi indee Hamuxaali getteehan; biyoo Libini katemee asho Erimiyaasi busheene.

¹⁹ Sedeqiyaasi Yoyaqiimi tuniitoommi gonde mooyo bullin Doono Yeeri aafooch tuniihe.

²⁰ Doono Yeeri kaaro cufii cufii hammiye. Ebich biyoo Yerusaaleminaa Yihudee showoonooch beeti asheenaꞌon bi aafoochee yookkiye. Aroochee Sedeqiyaasi Baabloonee taatoo toommooch hukkoon tiijjiye.