2 Taateenaꞌo 23 - Kafa Linguistics Project

Yosiyaasi Aageteenaꞌochi Shahalleenaꞌon Aalliyoo

¹ Taatoo Yosiyaasi Yihudee showee geeneenaꞌo bullinaa Yerusaalemi geeneenaꞌo bullinon bi waan kiciye.

² Aroochee taatoo damba Doono Yeerichi yaafee kexooch hammiye. Biinna tookkii Yihudee asheenaꞌo bullinaa Yerusaalemi asheenaꞌo bullina, qeesheenaꞌo, keemechinaꞌo, asheenaꞌo bulli giishoochee oogooch beddaahaa hammiyeete. Biyoo Doono Yeerichi yaafee kexoochee daneti wogee macaafeexi qaaro bullin boonoshich waayiiꞌi shemmehe.

³ Taatoo giimbee gaꞌooch neexeechii, ceeni bi mulloonaa ceeni bi kashoona Doono Yeerin dabboyich, bi getoon, bi qociyoonaa bi sheeroonon quyoyich, ebi macaafooch kooreeti wogoon ceechoyich, Doono Yeeri aafooch wogoon giyiye. Asheenaꞌo bulliyoo wogoon giyiyeete.

⁴ Aroochee Yosiyaasi qeeshee guudo Hiliqiyin, biyee desheenaꞌo tuneti qeesheenaꞌonaa yaafee kechi kelloon quyeebeeti kellechinaꞌonon ceeggiꞌi, Baꞌaaloyich, nuggishee Asheerinaa shimaajji xojjeno bullinochi maddooch heechiibeeti qiico bullin yaafee kexoochee boonoshi kichemmoyich gettiye. Aroochee taatoo ebi qiiceenaꞌo bullin Yerusaalemiyee maach beeti Qedirooni bambee gaddoochaa qaaqqoona michiꞌi bi tulloon Beeteel daammiye.

⁵ Yihudee katemeenaꞌonaa Yerusaalemi guudoonooch beeti guudi toommeexi goyinnee xaaꞌeenaꞌooch ixaanoon boonoshi shookkemmoyich, Yihudee taateenaꞌo ukkiriiti, qeesheenaꞌo bullin shuunoochee yookkiye. Wotta Baꞌaaloyich, aabeyich, ageneyich, xojjeneenaꞌo bullinaa shimaayooch beeti halleenaꞌonoyich ixaanoon shoohona maddeebeeti qeesheenaꞌo bullin kindiihe.

⁶ Nuggishee Asheeri misiloon Doono Yeerichi yaafee kexoochee waaxxii, katemoochee kichii, Qedirooni bambooch daammiꞌi michiye; buttee qaddochii qacichiꞌi, asheenaꞌochi maashee toommooch shakkiye.

⁷ Doono Yeerichi yaafee kechi daggooch beeti, yahechi anaaminaꞌochi kechi kuxinaꞌon happiye; ebi aroochaa maacheenaꞌo nuggishee Asheerich maccillaatoon yokkee beetinaꞌone.

⁸ Qeesheenaꞌo bullin Yihudee katemeenaꞌoochee Yerusaalem deebiye. Geebee tiijjii Beershaab beddaahaa beeti, qeesheenaꞌo ixaanoon shookkiibeeti guudi toommeexi goyinnee xaaꞌeenaꞌo bullin eeꞌiihe; katemee iraashoo Yaasi shuuniiti katemee kellee gaꞌooch, ebi kellee yooche badd, beeti goyinnee xaaꞌeenaꞌon happiye.

⁹ Guudi toommeexi goyinnee xaaꞌeenaꞌochi qeesheenaꞌo Yerusaalem beeti, Doono Yeerichi deejjee gudooch boonoshi maddemmoyich daaggeyaanoone. Tunebaani boonoshi maneenaꞌo tuneti, qeesheenaꞌona tookkii shittoo giyaani koshon maa beeheete.

¹⁰ Hinoomi bushoochi bambooch beeti, Tofeeti goyinnee xaaꞌoon eeꞌiihe; ebiyoo koniyoona Molookich bi bushoon woyee bi busheen bi deejjaachemmoyichiye.

¹¹ Yihudee taateenaꞌo Doono Yeerichi yaafee kexooch giyeebeeti kelloochaa aabeyich goyinnoyich boonoshi kichiti haresheenaꞌon aroochee tiijjiye. Ebi haresheenaꞌo beeto, ukkiroo Naataan Meleeki kechi gaꞌooch beeti addibaaboochiye. Aroocheenoo Yosiyaasi aabeyich kechiti gaarinaꞌon qaaqqoona michiye.

¹² Yihudee taateenaꞌo shuuniiti, ebiyoo Akaazi kechi toommeexi kexooch beeti deejjee gudeenaꞌon, wotta Minaasi shuuniiti, ebiyoo Doono Yeerichi yaafee kechi gutte addibaabooch beeti deejjee gudeenaꞌon Yosiyaasi happiye. Ebi deejjee gudeenaꞌon tiichii yiikkiyiikkaayiꞌi, Qedirooni bambooch daammii duppiye.

¹³ Ebiyoommon wotta Yerusaalemaa, aabi-keyo waan, ebiyoo Eeꞌee guudoochaa, deshi-waan beeti, Sidooneenaꞌochi ciigiiti nuggishee Ashitarootich, Moꞌabeenaꞌochi, ciigiiti nuggishoo Kemooshinaa Amooneenaꞌochi, ciigiiti nuggishoo Milikoominoyich taatoo Solomooni shuuniiti, guudi toommeexi goyinnee xaaꞌeenaꞌon eeꞌiihe.

¹⁴ Aroochee taatoo Yosiyaasi goyinnee xaqqee giimboo bullin tiichiye; wotta Asheeri misileenaꞌon kuxxiꞌi duppiye. Ebi misileenaꞌo neexeti xaaꞌoochoo ashi shaawushoon ceechiye.

¹⁵ Ebiyee wotta Israꞌeeleenaꞌon axaaxoo shuuniiti, Nebaaxi bushoo Yeroboꞌami Beeteel shuuniiti, guudi toommeexi goyinnee xaaꞌoon Yosiyaasi happiye; deejjee gudoonoo waaxxiꞌi bi shuuneeti xaqqoon tiichiye; buttee qaddochii qacichiye; Asheeri misileenaꞌonoo qaaqqoona michiye.

¹⁶ Yosiyaasi bi guudoon ciinnii, guudi toommeexi, maashee oppeenaꞌon beeggiye. Aroyee aaf, Yeer asho ebi shuuneeti mooyinaꞌochon bi keemmiti, Doono Yeerichi qaaroommon, ashi shaawushoon oppeenaꞌoochee kichiihe; deejjee gudee toommoochaa qaaqqoona michiye; ebi deejjee gudoon eeꞌiihe.

¹⁷ Aroochee Yosiyaasi, “Okk ebi ta beeggaabeeti, haawulito konichone?” iꞌi echehe. Beeteeli katemeexi asheenaꞌo, “Yihudee showoochee waaꞌi, hini deejjee gudee toommooch ebi ne tuniito bullichon keemmiti keemechochi oppoone” iꞌi wochiyeete.

¹⁸ Aroochee Yosiyaasi, “Qayote; koniyoona bi shaawushoon shuurikkaaye” iye. Ebich boonoshiyoo bi shaawushoon kichaanoon, Shamaarechi keemechochona tookkii echiiheete.

¹⁹ Taatoo Yosiyaasi Israꞌeelee katemeenaꞌo aabiichona Israꞌeelee taateenaꞌo shuuniiti, Doono Yeeri ippemmoyich naboo tuneti, guudi toommeexi goyinnee xaaꞌeenaꞌo bullin happiye. Beeteel bi tuniitoommon, ebi goyinnee xaaꞌeenaꞌo toommooch tuniihe.

²⁰ Ebi guudi toommeexi goyinnee xaaꞌeenaꞌooch maddeebee echeti qeesheenaꞌo bullin deejjee gudoochaa wuxiye; boonoshi deejjee gudeenaꞌo toommoochaa ashi shaawushoon michiye. Ebi bullin bi tuniitoyee gubb, Yerusaalem wottehe.

Beshee Baaroon Yosiyaasi Baaroo

²¹ Taatoo Yosiyaasi wogee macaafooch bi kooreetoommon, boonoshi Nuggishoo Doono Yeerich Beshee Baaroon boonoshi baaremmoyich asheenaꞌo bullich gettiye.

²² Woraaferasheenaꞌo asheenaꞌon qeejjiibee echeti yemeenoyee gubb, Israꞌeelee taateenaꞌochi woyee Yihudee taateenaꞌochi taatee yemeenooch, ebiyoommi Beshee Baaroo ciroona baaree ariyaanoone.

²³ Ebi Beshee Baaroo Yosiyaasi taateti aaraa shimittinnee natooba, Yerusaalemaa Doono Yeerich baareehe.

Yosiyaasi Tuniiti Bare Mooyo

²⁴ Wotta qeeshoo Hiliqiyi yaafee kexoochee daneti macaafooch kooreeton ceechoyich, Yerusaaleminaa Yihudee showee bare katemeenaꞌonooch beeti, ciigiiti mooyo bullin, qititi ashoona yibbaatee beetinaꞌon, allaameenaꞌon, terafimeenaꞌonaa shahalleenaꞌonon taatoo Yosiyaasi aalliihe.

²⁵ Muusichi Sheerooch kooreeton ceechoona Yosiyaasichoommon ceeni bi mulloona, ceeni bi kashoonaa ceeni bi hakkoona Doono Yeerich maddeti taatoo, biyee aafoo tuneba biyee gubb, aalloone.

²⁶ Tunebaani Yihudee taatoo Minaasi biin ippiyoyich tuniiti gonde mooyo bullichi naboona Yihudee showee toommooch cufiti, Doono Yeerichi shattiiti kaaro aqqeyaanoone.

²⁷ Ebich Doono Yeeri ishichiye: “Israꞌeeleenaꞌon ta aafoochee ta wokkiitoommon, Yihudee asheenaꞌonoo ta aafoochee wokkiyemmo taane. Ta kaacceti katemoo Yerusaaleminaa ‘Ta shigo arooch beeyemmone’ ta iti yaafee kexonon qajjemmo taane” iye.

Yosiyaasi Taatittinee Ciiree Yemeeneexi Mooyo

²⁸ Yosiyaasi shuuneti eche shuunoonaa bi tuniiti mooyo bullina Yihudee taateenaꞌo kiinee macaafooch kooreetone.

²⁹ Bi taatee yemeenooba, Gibitsee taatoo Neki Asooree taatoon gaacheya Efiraaxisi aacooch hammiye. Taatoo Yosiyaasi Gibitsee ginee naayinaꞌon kocha hammiye. Gibitsee taatoo Farooni biinna daneꞌi, Megidi katemoochaa biin wuxiye.

³⁰ Bi naayinaꞌo bi dubenoon gaarina Yerusaalem deebiyeete; bi maashoochoo duukkiyeete. Yihudee asheenaꞌo Yosiyaasi bushoo Yoꞌakaazin daammii huuttiꞌi, bi nihoochi keroon taatiiheete.

Yihudee Taatoo Yoꞌakaazi Mooyo

³¹ Yoꞌakaazi bi taatehooba, bi eeno hiyaa keejje natone. Yerusaalem beechii keejje agenoon qeejjiye. Bi indee Hamuxaali getteehan; biyoo Libini katemee asho Erimiyaasi busheene.

³² Yoꞌakaaziyoo bi qaabbechinaꞌo tuniitoommon, Doono Yeeri aafooch gonde mooyo bullin tuniihe.

³³ Yerusaalem bi taateyaachemmoyich, Gibitsee taatoo Neki Hamaatee showooch beeti Ribili katemee cuyee kexooch biin giijjiye. Yihudee showoo keejje humaa awudde balle kiilo giraamee birewoonaa shaashaa awudde kiilo giraamee aachoonon gibiro bi qoccemmoyich tuniihe.

³⁴ Aroochee Gibitsee taatoo Neki Yosiyaasi bushoo Eliyaqimin bi nihoo Yosiyaasichi keroon taatiihe; bi shigoonoo Yoyaqiimi iꞌi shaddiye. Yoꞌakaazinoo Gibits daammiye. Yoꞌakaaziyoo aroochaa qitiye.

Yihudee Taatoo Yoyaqiimi Mooyo

³⁵ Yoyaqiimi birewoonaa aachoonon Faroonich immiye. Farooni Neki gettitoommon tuniyoyich gibiroon qochiihe; asheenaꞌo bulli boonoshi hakki hakkoommona birewoonaa aachoonon boonoshi qoccemmon tuniihe.

³⁶ Yoyaqiimi bi taatehooba, bi eeno hiyaa uuche natone. Yerusaalem beechii aaraa ikke naton qeejjiye. Bi indee Zebidaahi getteehan; biyoo Rumaahi katemee asho Fedayi busheene.

³⁷ Yoyaqiimiyoo bi qaabbechinaꞌo tuniitoommon, Doono Yeeri aafooch gonde mooyo bullin tuniihe.