2 Taateenaꞌo 22 - Kafa Linguistics Project

Yihudee Taatoo Yosiyaasi Mooyo

¹ Yosiyaasi bi taatehooba, bi eeno shimitte natone. Yerusaalem beechii shaashaa ikke naton qeejjiye. Bi indee Yedidaahi getteehan; biyoo Botsiqaati katemee asho Adaayi busheene.

² Biyoo Doono Yeeri aafooch kaame mooyon tuniihe. Bi qaabbechi Daawitichi gommon dabboochee qanna yoocha getaanoone.

Doono Yeerichi Sheeree Macaafo Dano

³ Taatoo Yosiyaasi bi taateti aaraa shimittinnee natooba, Meshulaami bushoo Atsaliyaahi bushoo, taatoochi koorechi Shafaanin Doono Yeerichi yaafee kexooch ishichiꞌi wochee daachiihe:

⁴ “Qeeshee guudo Hiliqiy waan hambe; asheenaꞌo waanee kellechinaꞌo kicaa Doono Yeerichi yaafee kexooch giyiti gijjoo ambicho gaata bi haddeyemmon tuniibe.

⁵ Ebinoo yaafee kexon ciini boonoshi shuuniyemmoyich ukkireti ukkireenaꞌoyich imbe. Boonoshiyoo Doono Yeerichi yaafee kexon wochinnoon shuunee beetinaꞌoyich qoceete.

⁶ Boonoshi qoccemmo, anaaxeenaꞌoyich, gimbenyeenaꞌonaa xaqqoon baddee beetinaꞌonoyichiye. Ebiyoommon wotta yaafee kexon wochinnoon shuunoyich booree xareeti mixonaa xareeti xaqqeenaꞌonon kemebeete.

⁷ Shuunee ukkireenaꞌo gibeneetinaꞌo boonoshi tunetoyich, boonoshich icheti gijjoon amooch boonoshi heechiito gaata, boonoshin echo qaawiyaache” iye.

⁸ Aroochee qeeshee guudo Hiliqiyi koorechi Shafaanich: “Sheeree Macaafoon Doono Yeerichi yaafee kexoochee daneto taane” iye. Hiliqiyi macaafoon Shafaanich immiye. Shafaaniyoo ebi macaafoon shemmehe.

⁹ Aroochee koorechi Shafaani taatoo waan waaꞌi, taatoyich, “Ne guuninaꞌo yaafee kexooch beeti gijjoon deqqiꞌi, Doono Yeerichi yaafee kexon ciini boonoshi shuuniyemmoyich ukkireti ukkireenaꞌoyich immitinaꞌone” iye.

¹⁰ Daakkiꞌinoo taatoyich, “Qeeshoo Hiliqiyi taach immiti macaafo, ebiyoche” iꞌi taatoyich shemmehe.

¹¹ Taatoo Sheeree Macaafo shemmeetaa waayee, ayiniꞌi bi tahoon keexxiye.

¹² Biyoo qeeshoo Hiliqiyich, Shafaani bushoo Ahiqaamich, Mikiyaasi bushoo Akiboorich, koorechi Shafaaninaa bi naayo Asayaahinoyich ishichiꞌi gettiye:

¹³ “Hamiree taach, asheenaꞌonaa Yihudee showooch beeto bullinochon, hini daneti macaafooch kooreeti mooyon Doono Yeerin echebote. Noon ciinnii beetona ebi macaafooch kooreeti qaaroyich no qaabbechinaꞌo deꞌa geton boonoshi qajjitoyich, Doono Yeerichi kaaree shiixxoo no toommooch cufitone” iye.

¹⁴ Ebich qeeshoo Hiliqiyi, Ahiqaami, Akiboori, Shafaaninaa Asayaahina Yerusaalemichi guttinnee kuxooch beeti, keemechi Hulidaah waan echeya hammiyeete. Bi keno, Harihaasi bushoo Tiqiwaahi bushoo tuneti Shaluumi yaafee kechi tahee ukkiroone. Boonoshiyoo ebi mooyon keemechich gettiyeete.

¹⁵ Keemechiyoo boonoshich ishichiyan: “Israꞌeelee Nuggishoo Doono Yeeri ishichiye: ‘Ta waan ittoshin wocheti uroyich, ishichi getote!

¹⁶ Doono Yeeri ishichiye: Yihudee taatoo shemmeti macaafooch bi kooreetoommon, gonde mooyon hini xaaꞌoonaa arooch beetinaꞌonochi toommooch deebemmo taane.

¹⁷ Boonoshi taan qajjiichii, bare nuggisheenaꞌoyich ixaanoon shookkitinaꞌone; boonoshi kishoona boonoshi shuuneti, nuggisheenaꞌona taan ippiitinaꞌone. Ebich ta kaaree shiixxoo hini xaaꞌooch kindiree aaxxeshalli bi gettemmo, aqqeyaachemmone.

¹⁸ Doono Yeeri taan echoyich ittoshin wocheti Yihudee taatoyich ishichibote! Israꞌeelee Nuggishoo Doono Yeeri ishichiye: Hini macaafooch getteeti qaaroon,

¹⁹ hini xaaꞌoon uppeton, ashaalli xafoonoo tuniyemmo ta tunoon, ta getteti qaaroon waayaꞌa, ne mullo tiishetoyich, Doono Yeeri ta aafooch ne qelloon ne giishiitoyich, ne tahoon ne keexxetoyich, ta aafooch ne eeppetoyich, ne corootoon waayeto taane.

²⁰ Ebich hini xaaꞌooch ta deebemmi gonde mooyon ne aafoona beegaanoon ne qaabbechinaꞌo waan ne xaꞌeyemmoyich tuniyemmo taane; diggoona beeree maash hammemmo neene’ itone” iyan. Boonoshiyoo ebin yechiꞌi, taatoo waan wotteheete.