2 Taateenaꞌo 21 - Kafa Linguistics Project

Yihudee Taatoo Minaasi Mooyo

¹ Minaasi bi taatehooba, bi eeno aaraa gutte natone. Yerusaalem beechii aachaa uuche naton qeejjiye. Bi indeyoo Hefizibaahi getteehan.

² Minaasiyoo Doono Yeeri Israꞌeeleenaꞌo aafoochee yookkii bi aalliiti aageteenaꞌochi, ciigiiti doyoon dabboona Doono Yeeri aafooch gonde mooyon tuniihe.

³ Bi nihoo Hiziqiyaasi happii aalliiti, guudi toommeexi goyinnee xaaꞌeenaꞌon wochinnoon shuunehe. Israꞌeelee taatoo Akaabi tuniitoommon, Baꞌaaloyich deejjee gudoon shuunehe; nuggishee Asheeri misiloonoo neechiye; shimaajji xojjeno bullichoo goyinnee maddehe.

⁴ Doono Yeeri, “Ta shigo Yerusaalem bi beeyemmoyich tuniyemmo taane” bi iti, Doono Yeerichi yaafee kechi daggooch aageteenaꞌo nuggisheenaꞌoyich deejjee gudeenaꞌon shuunehe.

⁵ Yaafee kechi gutte addibaabooch xojjeneenaꞌo bullich goyinneyemmi deejjee gudeenaꞌon shuunehe.

⁶ Bi hajjee bushoon goggiꞌi deejjoo giddiihe. Biyoo kaayechonaa iicechonon tunehe. Qititi ashoona tookkii yibbaatee beetinaꞌonaa allaameenaꞌona waanee keemmii waayee beehe. Wodde gonde mooyon shuunoona Doono Yeerin ippii beehe.

^7-8 Doono Yeeri Daawitinaa bi bushoo Solomooninoyich, “Hini yaafee kexo, hini Yerusaalemi ta shigo bulli yemeenoon bi beeyemmoyich, Israꞌeelee yoodeenaꞌo showoo bulliichee ta kaacceti xaaꞌoone. Israꞌeeleenaꞌo boonoshich ta getteti mooyo bullin boonoshi quyegaata, ta guuno Muusi boonoshich gettiti sheeroo bullin boonoshi ceechi gaatoo, boonoshi qaabbechinaꞌoyich ta immeti hini showoochee waaxeree boonoshi yallyallimemmoyich tuniyaachemmo taane” iꞌi bi gettiti yaafee kexooch, nuggishee Asheeri misiloon qiicii shuuneꞌi, deebii neechiye.

⁹ Asheenaꞌoo Doono Yeerichi getoon waayeyaaneenaꞌone. Doono Yeeri Israꞌeeleenaꞌo aafoochee yookkii bi aalliiti aageteenaꞌo shuunetoyee beshe wodde gonde mooyon boonoshi shuunemmoyich, Minaasi boonoshin muriciihe.

¹⁰ Doono Yeeriyoo bi guuninaꞌo tuneti keemechinaꞌona ishichiye:

¹¹ “Yihudee taatoo Minaasi ebi ciigiiti mooyon tuniitone. Biyee shiichiꞌi beebee echeti Amooree asheenaꞌo tuniitoyee beshe gondoon tuniihe. Bi shuuneti shahalleenaꞌona Yihudee asheenaꞌon axaaxoo shuuniihe.

¹² Ebich Israꞌeelee Nuggishoo Doono Yeeri ishichiye: Waayemmo bullin keqqichemmi gonde mooyon Yerusaaleminaa Yihudee showoonooch deebemmo taane.

¹³ Shamaarin, Israꞌeelee taatoo Akaabi kechi asheenaꞌonoo ta naxoommon, Yerusaalemin naxemmo taane. Asho shaatoon hidiichii, bi guufoommon, Yerusaalemin hidemmo taane;

¹⁴ curo tuneꞌi echemmi ta asheenaꞌon qajjemmo taane; boonoshi etteenaꞌo kishooch boonoshin beshiiree immemmo taane. Boonoshi etteenaꞌo boonoshin bogi keccemminaꞌone.

¹⁵ Ebiyoo boonoshi qaabbechinaꞌo Gibitsee boonoshi kechiti aaboochee tiijjiꞌi hanaach beddaahaa, ta aafooch gondoon boonoshi shuunetonaa taan boonoshi ippiitonoyichiye” iye.

¹⁶ Minaasi Yihudee asheenaꞌon axaaxoo bi shuuniitaa Doono Yeeri aafooch gonde mooyon boonoshi shuunetoyee baroo wotta, dofee xalle ashi damoon ukkoona Yerusaalemin hachi gocoochee okki gocooch beddaahaa, tajjitone.

¹⁷ Minaasi shuuneti eche shuunoo, bi tuniiti mooyo bullinaa bi shuuneti axaaxoona Yihudee taateenaꞌo kiinee macaafooch kooreetone.

¹⁸ Minaasi qitiꞌi bi qaabbechinaꞌo waan xaꞌeehe. Bi taatee kechi uxeree daggooch beeti, Uzayichi bechee xaaꞌooch duukkehe. Bi bushoo Amooni bi xaaꞌooch kereeꞌi taatehe.

Yihudee Taatoo Amooni Mooyo

¹⁹ Amooni bi taatehooba, bi eeno hiyaa gutte natone. Yerusaalem beechii gutte naton qeejjiye. Bi indee Meshulemeti getteehan; biyoo Yoxibaahi katemee asho Haruusi busheene.

²⁰ Amooniyoo bi nihoo Minaasi tuniitoommon, Doono Yeeri aafooch gonde mooyon tuniihe;

²¹ bi nihoochi gonde doyoo bullin dabbiye. Bi nihoo goyinneebee echeti, shahalleenaꞌoyich maddehe; goyinneenoo iye.

²² Bi qaabbechinaꞌochi Nuggishoo Doono Yeerin qajjiye; Doono Yeerichi gommona hamon qajjiye.

²³ Amooni naayinaꞌo bi toommooch koceeꞌi, taatoon bi taatee kexoochaa wuxiyeete.

²⁴ Tunebaani Yihudee asheenaꞌo taatoo Amoonin wuxitinaꞌo bullin wuxiyeete; bi bushoo Yosiyaasin bi xaaꞌooch keriꞌi taatiiheete.

²⁵ Amooni shuuneti eche shuunoo Yihudee taateenaꞌo kiinee macaafooch kooreetone.

²⁶ Amooni Uzayichi bechee xaaꞌeexi bi maashooch duukkehe. Bi bushoo Yosiyaasi bi xaaꞌooch kereeꞌi taatehe.