2 Taateenaꞌo 20 - Kafa Linguistics Project

Hiziqiyaasi Biiyee Wodoo

¹ Ebiyooba Hiziqiyaasi biiyee mawiiꞌi qitooch beddiye. Amootsi bushoo keemechi Isiyaasi biin beegga waaꞌi, “Doono Yeeri: ‘Hini biiyoochee wodaachemmo neene; qitemmo neene. Ebich ne kexon tachibe’ itone” iye.

² Hiziqiyaasiyoo bi aafoon daabbo waan wochiichii, Doono Yeer waan ishichiꞌi corootiye:

³ “Doono Yeero, gibeneeto ta tunoon, ceeni ta mulloona neech ta maddoon, ne aafooch gaawe mooyon ta tuniyoonoo and ne shalligemmoyich neen qollehoye” iye; girgittiinoo eeppiye.

⁴ Isiyaasi taatoo aafoochee kechii hammiye; hammiꞌi taatee kechi daggi addibaaboon bi beshoyee shiichiꞌi, Doono Yeeri biich ishichiye:

⁵ “Wotte hamiree, ta asheenaꞌon yaabii qeejjiibeeti taatoo Hiziqiyaasich ishichibe: ‘Ne qaabbechi Daawitichi Nuggishoo Doono Yeeri ishichiye: “Ne corootoon waayeto taane; ne acimoon beeggeto taane; neen woddiyemmo taane; keejjinnee qemooba, damba Doono Yeeri ta yaafee kexooch hammemmo neene.

⁶ Ne eeni toommooch aaraa uuche naton daakkito taane; neennaa hini katemoonon Asooree taatoo kishoochee gaache wodiyemmo taane; ta oogoonaa ta guuno Daawitinoyicha getiree, hini katemoon wodiyoyich deeboon tunemmo taane” itone’ gete” iye.

⁷ Isiyaasiyoo, “Balaasee aafee nuuphon deebote; bi wodemmoyich bi mayee toommooch xafebote” iye.

⁸ Aroochee Hiziqiyaasi Isiyaasich, “Doono Yeeri taan wodiyemmo bi tunoonaa keejjinnee qemooba Doono Yeerichi yaafee kexooch hammemmo ta tunoonochi malletoo amoone?” iye.

⁹ Isiyaasiyoo, “Doono Yeeri gibenikkiti gibeno ceennemmo bi tunoyich, Doono Yeer waanee malleto ebine: And ne qaawaabeeto, yiiritto aashire daqqoon aaf bi hammemmoyichiye, woyee aashire daqqoon gubb bi wottemmoyichiye?” iye.

¹⁰ Aroochee Hiziqiyaasi, “Yiiritto aashire daqqoon aaf bi hammemmoyich tuniyoo kettoone. Ebich aashire daqqoon gubb bi wottemmoyich tuniibe” iye.

¹¹ Aroochee keemechi Isiyaasi Doono Yeerin qollehe. Doono Yeeriyoo Akaazi shuuneti daqqee toommooch beeti yiiritto aashire daqqoon gubb bi wottemmoyich tuniihe.

Baabloonee Showoochee Wocheyechinaꞌo Womo

¹² Ebiyooba Baabloonee taatoo, Balidaanichi bushoo Merodaak Balidaani Hiziqiyaasi biiyeꞌi wodoon bi waayetoyich, bi wocheyechinaꞌo kishoona wojjoonaa koorichoonon Hiziqiyaasich deejjiye.

¹³ Hiziqiyaasiyoo wocheyechinaꞌon emiroona iibbiihe; bi taatee kechi ginjabeetooch beeto bullin, ebiyoo aachoon, birewoon, qimaamoon, shittoonaa ginee qiicoonon boonoshich bekkiihe. Bi taatee kexoochee tuneba, bi showee daggooch beeti gaannoochee boonoshich bi bekkiyaani amee mooyolla aalloone.

¹⁴ Ebiyooba keemechi Isiyaasi taatoo Hiziqiyaas waan waaꞌi, “Ebi asheenaꞌo waato, amoocheeniye? Neech boonoshi gettito, amooniye?” iꞌi echehe. Hiziqiyaasiyoo, “Boonoshi waato, wohi showoochee, Baablooneeniye” iꞌi wochiye.

¹⁵ Aroochee Isiyaasi, “Taatee kexoochee boonoshi beeggito amooniye?” iye. Hiziqiyaasiyoo “Bulli mooyon beeggitinaꞌone; ginjabeetooch beeti qiicoochee boonoshich ta bekkiyaani mooyo amolla aalloone” iye.

¹⁶ Aroochee Isiyaasi Hiziqiyaasich, “Doono Yeerichi qaaroon waayebe.

¹⁷ Doono Yeeri ishichiye: ‘Ebiyoche, ne kexooch beeto bulli, hanaach beddaahaa ne qaabbechinaꞌo kicito bulli, Baabloonee showooch bi qacceyemmi aabo woyemmone. Amolla echeyaachemmone.

¹⁸ Ne shiyeti, ne hajjee bushiisheenaꞌoochee ikkikkeenaꞌo kecaa hammemminaꞌone; guruusho tuneree Baablooni taatee kexooch maddemminaꞌone’ itone” iye.

¹⁹ Hiziqiyaasi, “Ta yemeenooch baach diggoonaa keqqaalli beemona tunebaani, taan amo qaaqqiye” iꞌi, Isiyaasich, “Ne getteti Doono Yeerichi qaaro deꞌoone” iye.

Hiziqiyaasichi Taatee Yemeeno Ciiro

²⁰ Hiziqiyaasi shuuneti eche shuunoo, oogeti giidecho bi tunoo, aaco kotemmi xaaꞌoon bi shuunoonaa aaco katemooch woyemmi woretoon bi iichiyoo bullina Yihudee taateenaꞌo kiinee macaafooch kooreetone.

²¹ Hiziqiyaasi qitiꞌi bi qaabbechinaꞌo waan xaꞌeehe. Bi bushoo Minaasi bi xaaꞌooch kereeꞌi taatehe.