2 Taateenaꞌo 19 - Kafa Linguistics Project

Yerusaalemi Wodemmi Tuno Keemmeyoo

¹ Taatoo Hiziqiyaasi ebin waayeꞌi bi tahoon keexxiye; dookoonoo taheꞌi Doono Yeerichi yaafee kexooch hammiye.

² Aroochee taatee kechi iraashoo Eliyaqimi, taatoochi koorechi Shebininaa qeesheenaꞌo tuneti qaabbeenaꞌona dookoon taheree, Amootsi bushoo, keemechi Isiyaas waan boonoshi hammemmoyich tuniihe.

³ Boonoshiyoo hammiꞌi, Isiyaasich, “Hiziqiyaasi ishichiye: ‘Hanaachi aabo xuuxeecho, kaareechonaa ceeqeechonane. Bushoo shiijjeya bedaa agaatoyich hakkoo guuteeti maacheen shaahito noone.

⁴ Beeyechi Doono Yeerin bi naaggemmoyich bi doono tuneti, Asooree taatoo deejjiti Rabishaqichi naago bullin ne Nuggishoo Doono Yeeri diqqich waayo qayaanoone. Ebich ne Nuggishoo Doono Yeeri bi waayeti naagoyich biin bi naxemmoyich, echeti cureenaꞌoyich ne corootemmoyich neen qollehoye’ itone” iyeete.

⁵ Hiziqiyaasichi wocheyechinaꞌo ebin Isiyaasich boonoshi gettitoyee gubb,

^6-7 Isiyaasi boonoshich, “Doono Yeeri ishichiye: ‘Asooree taatoochi wocheyechinaꞌo taan boonoshi naagaa ne waayeti qaaroyich shattaahine. Ebiyoche, ayaanoon bi toommooch deejjemmo taane. Tuneti woroon waayeree bi showooch wottemmone. Aroochaa goraadoona bi qitemmoyich tuniyemmo taane’ itone getiree ittoshi taatoyich getote” iye.

Asooreenaꞌo Bare Miichee Wochoon Deejjoo

⁸ Asooree taatoo Lakishee tiyii hammiꞌi, Libini katemoon kochiibeeto bi tunoon Rabishaqi waayeꞌi, arooch hammiye.

⁹ Ebiyooba Topphiyee asho tuneti, Gibitsee taatoo Tirihaaqi biin kocha waabeeto bi tunoon taatoo Senakireebi waayehe. Ebich wocheyechinaꞌon ishichiꞌi wochinnoon Hiziqiyaas waan daachiihe:

¹⁰ “Ishichiree Yihudee taatoo Hiziqiyaasich getote: ‘Ne gibenaabeeti nuggishoo, “Yerusaalemi Asooree taatoo kishooch dihaachemmone” getona neen dachaaye.

¹¹ Asooree taateenaꞌo showoo bulli toommooch amoon boonoshi tuniito gaata, aabichiꞌi asheenaꞌon ciroona boonoshi aalliito gaata waayeto neene. Newochi ebiichee wodenne?

¹² Ta qaabbechinaꞌo aalliiti Gozaan, Haraaninaa Retsefinooch beeti aageteenaꞌochi nuggisheenaꞌo, Telasaar beeti Edenee asheenaꞌonochi nuggisheenaꞌoo boonoshin wodiiteete?

¹³ Hamaati taatoo, Arifaadi taatoo, Sefariwayimi taatoo, Heeni taatoonaa Iwaahi taatoona, aayeete?’ getote” iye.

Hiziqiyaasi Corootiti Corooto

¹⁴ Hiziqiyaasi koorichoon wocheyechinaꞌo waanee deqqiꞌi shemmehe. Yaafee kexooch daammiꞌi, Doono Yeeri aafooch yaggiye.

¹⁵ Aroochee Hiziqiyaasi Doono Yeer waan ishichiꞌi corootiye: “Kiruubeenaꞌoyee tookk kotaabeeti, Israꞌeelee Nuggishoo Doono Yeero, ne baach showee taateenaꞌo bullichi Nuggishoo neene. Showoonaa shimaayoonon hallito neene.

¹⁶ Doono Yeero, ne waamon no waan gaꞌiiree waayebe. Doono Yeero, ne aafoon gaxxiree ciine. Senakireebi beeyechi Yeeri neen naagoyich bi deejjiti miichee qaaroon waayebe.

¹⁷ “Doono Yeero, iberoone; Asooree taateenaꞌo aageteenaꞌonaa boonoshi showoonon aalliitinaꞌone;

¹⁸ boonoshi nuggisheenaꞌochi misilonoo qaaqqooch duppiꞌi michitinaꞌone; mixonaa xaqqoonoochee shuuneeti, ashi kishee shuuneenaꞌoani, nuggisheenaꞌo tuno boonoshi qajjitoyich, aalletinaꞌone.

¹⁹ Andoo no Nuggishoo Doono Yeero, showee taateenaꞌo bulli Doono Yeeri ne ikkeeto baach Nuggishoo ne tunoon boonoshi ariyemmoyich, bi kishoochee noon ne wodiyemmoyich, neen qollehoye” iye.

Senakireebichi Dihoon Isiyaasi Keemo

²⁰ Aroochee Amootsi bushoo Isiyaasi Hiziqiyaasich ishichiꞌi wochoon daachiihe: “Israꞌeelee Nuggishoo Doono Yeeri ishichiye: ‘Asooree taatoo Senakireebichi naboona ta waan ne corootiti corootoon waayeto taane’ iye.

²¹ Bi toommooch Doono Yeeri gettiti qaaro ebine: “ ‘Tsiyooni gidiide maache bushee neen hoxemmine; neen coonemmine. Woci ne beetaa, Yerusaalemi gidiidee ne toommooch qeeqqeremmine.

²² Koniniye ne hoxaa naaggeto? Koni toommoochiye, ne goohito? Koni toommoochiye, geecoona aafoon ne ciixxeto? Israꞌeelee Yaafoo Yeeri ta toommoochiye.

²³ Ne wocheyechinaꞌona Doono taan cooneto neene. Newoo, “Wodde ta gaarinaꞌona genje guudinaꞌooch, Libanoosichi cullullooch kecheto taane; genji genje ciideenaꞌon, macecikkiti yigeenaꞌon dichito taane; are showee daareenaꞌooch, gaawe shaareenaꞌooch giyeto taane;

²⁴ bare showeenaꞌoochoo aachi oppeenaꞌon iijjeto taane; aroocheenoo aacon ucheto taane; Gibitsee showeexi woce aaco bullin ta baatee madoona neexxaꞌa, takkito taane” ito neene.

²⁵ “ ‘Xaqqee uxerechi katemeenaꞌon happiree, xaqqee gutoo ne tuniyemmoyich ta tuniyoon, ebin meeti aaboyee shiichaꞌa ta maacon, wonnee yemeenooch ta gaboon, hanaach shuunee toommooch ta heechiyoon, waayeyaano neene?

²⁶ Are showee asheenaꞌochi mochoo nirehe; gibenoon kuxxii yeelleheete; aabo keyigaata bekkech shoolliibeeti, gaddeexi mocoommon, mocee nolloommon, kechi toommooch colleti mocoommon, tuneheete.

²⁷ “ ‘Tunebaani ta, ne kotoon, ne keyonaa ne gimonon, ta toommoochoo ne nagixoon ariyaabeeto taane.

²⁸ Ta toommooch ne nagixoonaa ne geecoona ta waamooch bi giyitoyich, ne muddooch tuutoon, ne kookkooch lugaamoon gediree, ne waati boochoona neen wochemmo taane’ itone.

²⁹ “Hiziqiyaaso, ebi neech malletoo tunebe: Hini natooch bi aalla colleton, gubbi natooch bi ochoon maayemmo ittoshine; aroochee keejjinnee natooch maayoon shoohiree qeccemmo ittoshine; woyinoonoo bechiree, bi aafoon maci maayemmo ittoshine.

³⁰ Yihudi yaroochee muriccii echeti curo wochinnoon cammon dech awuremmone; aafoonoo aafemmone.

³¹ Yerusaalemee echetinaꞌo, Tsiyooni guudoochee muriccitinaꞌo kechemminaꞌone. Doono Yeeri bi qanaatoona ebin tuniyoyich maaccitone.

³² “Ebich Asooree taatoochon Doono Yeeri ishichiye: ‘Hini katemooch waataachemmone; bi shangoonoo awureyaachemmone. Gaachoon yeshiree hini katemooch waataachemmone; showee gutoonoo gutaachemmone.

^33-34 Bi waati kaattoona bi hilla wottemmone; katemoochoo giyaachemmone. Ta oogoyicha getiree, ta guuno Daawiticha getiree, hini katemeen deebe wodiyemmo taane’ itone Doono Yeeri” iye.

³⁵ Aroobee xum Doono Yeerichi maraakoo Asooreenaꞌo kaambooch kechiꞌi, balli shinnaa uuche hume asheenaꞌon wuxiye. Haree maaddoona asho tiyaahaa, eboshi bullichi dubeno qeyiꞌi beehe.

³⁶ Aroochee Asooree taatoo Senakireebi Nanawa wottee hammiꞌi, arooch kotehe.

³⁷ Ikke areddoon bi nuggishoo Nisirookichi yaafee kexooch goyinnee bi beetaa, bi bushiisheenaꞌo Adirameleekinaa Sharetseerina biin goraadoona wuxiyeete; aroochee muricciꞌi Araraatee showooch maxxeheete. Bi bushoo Asiradooni bi xaaꞌooch kereeꞌi taatehe.