2 Taateenaꞌo 18 - Kafa Linguistics Project

Yihudee Taatoo Hiziqiyaasi Mooyo

¹ Israꞌeelee taatoo, Elaahi bushoo Hosheehi taateti keejjinnee natooba, Yihudee taatoo, Akaazi bushoo Hiziqiyaasi taatehe.

² Bi taatehooba, bi eeno hiyaa uuche natone. Yerusaalem beechii hiyaa yiixiye naton qeejjiye. Bi indee Abbi getteehan; biyoo Zakaariyaasi busheene.

³ Bi qaabbechi Daawiti tuniitoommon, biyoo Doono Yeeri aafooch kaame mooyon tuniihe.

⁴ Guudi toommeexi goyinnee xaaꞌeenaꞌon happii aalliihe; goyinnee xaqqee giimbeenaꞌonoo tiichiye; nuggishee Asheeri misiloon kuxxii duppiye. Arooba beddaahaa Israꞌeeleenaꞌo ixaanoon aroyich shookkii boonoshi beetoyich, Muusi gooshoochee shuuneti, Nehushitaani getteebeeti dingeree misiloonoo tiichiye.

⁵ Hiziqiyaasiyoo Israꞌeelee Nuggishoo Doono Yeerin gibenehe. Biyee gubboo tuneba biyee aaf beeti Yihudee taateenaꞌo bulliichee biinoommo aalloone.

⁶ Doono Yeerich gibeneeton tunehe. Biin dabboochee gubb wotteyaanoone. Doono Yeeri Muusich gettiti geteenaꞌon quyehe.

⁷ Doono Yeeri biinna tookkii bi beetoyich, bi tuniibeeto bulli biich kaamehe. Asooree taatoo toommooch hukkoon tiijjiꞌi biich hajjeyoon qajjiye.

⁸ Qiddeenaꞌochi dilaaloochee tiijjiꞌi, xaqqee uxerechi ooge katemooch beddaahaa, katemeenaꞌo bulliich, Gaazinaa bi guudoonooch beddaahaanoo hammiꞌi, Filsixeemeenaꞌon kochii wochiye.

⁹ Taatoo Hiziqiyaasi taateti awuddinnee natooba, Elaahi bushoo Israꞌeelee taatoo Hosheehi taateti shabaattinnee natooba, Asooree taatoo Shalimaniseeri Shamaarin kocha waaꞌi katemoon giichiye;

¹⁰ bi giicheeti keejjinnee nati ciirooch katemoon yechiye. Hiziqiyaasi taateti shirittinnee natooba, ebi geto, Israꞌeelee taatoo Hosheehi taateti yiixiyinnee natooba, Shamaari yecheehe.

¹¹ Asooree taatoo Israꞌeeleenaꞌon Asooree showooch keccii daammiye. Boonoshinoo Halaahi katemooch, Gozaani showooch beeti Haboori aachi gashoonaa Meedee showeexi katemeenaꞌonooch kotiihe.

¹² Ebi tuneto, boonoshi Nuggishoo Doono Yeerichi qaaroyich deꞌa geto boonoshi qajjitoyichiye; wottoo bi wogoon boonoshi happitoyich, ebiyoo bi guuno Muusichi geto bullin waayo boonoshi qajjitonaa tuniyoo boonoshi qajjitonoyichiye.

Asooreenaꞌo Yerusaalemin Kocha Miicho

¹³ Taatoo Hiziqiyaasi taateti aaraa awuddinnee natooba, Asooree taatoo Senakireebi Yihudee showee xaqqee uxerechi katemeenaꞌo bullin kochii yechiye.

¹⁴ Ebich Yihudee taatoo Hiziqiyaasi Lakishi katemooch beeti Asooree taatoyich, “Xuqqeto taane; ta waanee wottebe; taan ne echemmo bullin immemmo taane” iꞌi wochoon daachiihe. Asooree taatoo, Yihudee taatoo Hiziqiyaasich, “Aashire hume kiilo giraamee birewoonaa hume kiilo giraamee aachoonon taach deejjibe” iye.

¹⁵ Hiziqiyaasiyoo Doono Yeerichi yaafee kexonaa taatee kechi ginjabeetoonooch beeti birewoo bullin immiye.

¹⁶ Wotta ebiyooba Hiziqiyaasi Doono Yeerichi yaafee kechi shaaqqeenaꞌooch dikkeeti aachoonaa bi, bi qelloona yaafee kechi kellee qoomeenaꞌooch bi dikkiiti aachoonon tiijjiꞌi, Asooree taatoyich immiye.

Senakireebi Yerusaalemi Asheenaꞌon Shatiyoo

¹⁷ Asooree taatoo bi ginee iraasheenaꞌo tuneti Taritaanin, Rabisarisinaa Rabishaqinon meeti ginee naayinaꞌona tookkii Lakishee Yerusaalem, taatoo Hiziqiyaas waan daachiihe. Boonoshiyoo kechii Yerusaalem waaꞌi, dambee kote aaco kindiibeeti, woretee gaꞌeexi qoredda machechochi goyo waan daammiibeeti gommooch neexeheete.

¹⁸ Aroochee taatoon wochiiheete. Hiliqiyi bushoo taatee kechi iraashoo Eliyaqimi, taatoochi koorechi Shebininaa Asaafi bushoo, kiinee koorechi Yoꞌaahina boonoshi waan waaheete.

¹⁹ Aroochee Rabishaqi boonoshich, “Hiziqiyaasich ishichi getote: Beshe taatoo tuneti Asooree taatoo ishichii beetone: ‘Ebi shaahoon ne gibenaabeeti gibeno amoone?

²⁰ Noonee ceroo koyee ariyoonaa hakkoona tatemmon neech shaahii beete? Konin gibenaꞌaaniye ta toommooch ne tiyeto?

²¹ Ebiyoche, and Gibitsee taatoon gibeneto ne tunegaata, tiishe shombeqee gumboon gibeneto neene; biyoo bi toommooch degeebeeti ashi kishoon shelleeꞌi kochiibeeti ebi are gumboommone. Gibitsee taatoo biin gibeneebeeto bullich ebiyoommone.

²² Ittoshiyoo taach, “No Nuggishoo Doono Yeerin gibenemmo noone” ittoshi getaachemmoyich, Hiziqiyaasi Yihudee asheenaꞌonaa Yerusaalemi asheenaꞌonoyich, “Ittoshi goyinnemmo, Yerusaalem beeti deejjee gudee aafoochiye” getona, guudi toommeexi, Doono Yeerichi goyinnee xaaꞌeenaꞌonaa deejjee gudeenaꞌonon aalliitone.

²³ “ ‘Andoo waaree Asooree taatoo ta doonona tookki gajjiteebe. Hareshee yoohon hakkiibeeti asheenaꞌon danoon hakkemmo ne tunegaata, gutte hume haresheenaꞌon neech immemmo taane.

²⁴ Gibitseenaꞌochi gaarinaꞌonaa hareshechinaꞌonon gibenebee, ta doonochi ginee iraashoochee shotaani ikkoonolla kochii wochoon ne hakkemmo, aabichireeshiye?

²⁵ And iberoochaa Doono Yeeri daaggaanoon hini showoon aalliiya waaton neech shaahaa beetote? Doono Yeeri taan, damba keyiree ebi showoon koyi ta aalliyemmoyich gettitone’ itone” iye.

²⁶ Aroochee Hiliqiyi bushoo Eliyaqimi, Shebininaa Yoꞌaahina Rabishaqich, “No, ne guuno waayaabeeto no tunetoyich, Araamee noonoona nooch getani, xaqqee uxeree toommooch beeti asheenaꞌo waayeebeeti Ayihudee noonoona nooch ne getaachemmoyich neen qollehone” iyeete.

²⁷ Tunebaani Rabishaqi boonoshich, “Ta doono ebin ta gettemmoyich taan bi wocheto, ittoshinaa ittoshi doononoyich baachiye? Ittoshina tookki boonoshi gondechoon maayemmi boonoshi aachiyoonoo uchemmi xaqqee uxeree toommooch beeti asheenaꞌoyichoo toone?” iye.

²⁸ Aroochee Rabishaqi neexeechii qaaroon oogichiꞌi, Ayihudee noonoona, “Beshe taatoo tuneti Asooree taatoochi qaaroon waayebote.

²⁹ Taatoo ishichitone. Ta kishoochee ittoshin wodiyoon hakkaachemmo bi tunetoyich, Hiziqiyaasi ittoshin dachaaye.

³⁰ Wottoo, ‘Doono Yeeri iberoochaa noon wodiyemmone. Hini katemeyoo Asooree taatoo kishooch beshiitaa icheyaachemmine’ iꞌi Hiziqiyaasi Doono Yeerin ittoshi gibenemmoyich bi gettii beeton waayeyaahote.

³¹ “Hiziqiyaasi gettii beeton waayeyaahote. Ebich Asooree taatoo ishichii beetone: ‘Taanna tookki shunebote; ta waanoo wobote; ittoshi ikkikkoona ittoshi woyinoonaa ittoshi balaasoonoochee mamote; oppeexi ittoshi aacoochee uyote.

³² Ebiyoo waaꞌa ittoshi showoon shaahiibeeti showooch, maayoonaa woyinee uyoona, koshonaa woyinee qomboona, zayitee mixonaa eeyona beeti showooch ittoshin ta daammemmi wottoon, qitaanoon kashoona ittoshi beeyemmoyichiye. “Doono Yeeri noon wodiyemmone” getona Hiziqiyaasi ittoshin bi dachigaata, waayeyaahote.

³³ Iberoochaa aagetee nuggisheenaꞌoochee bi showoon Asooree taatoo ta kishoochee wodiito, beete?

³⁴ Hamaatinaa Arifaadinochi nuggisheenaꞌo, aayeete? Sefariwayimi, Heeninaa Iwaahinochi nuggisheenaꞌo, aayeete? Shamaarin ta kishoochee wodiiteete?

³⁵ Ebi aagetee showeenaꞌochi nuggisheenaꞌo bulli daggoochee boonoshi showoon ta kishoochee wodiyoon hakkito beete? Doono Yeeri Yerusaalemin ta kishoochee bi wodiyemmo, aabichireeshiye?’ itone” iye.

³⁶ Tunebaani “Biich amoonolla wochiyaahote” iꞌi taatoo Hiziqiyaasi boonoshich gettitoyich, asheenaꞌo biich ikke qaaroonona wochaanoon cikkii qajjiyeete.

³⁷ Aroochee Hiliqiyichi bushoo taatee kechi iraashoo Eliyaqimi, taatoochi koorechi Shebininaa Asaafi bushoo, kiinee koorechi Yoꞌaahina boonoshi tahoon keexxii, Hiziqiyaas waan waaꞌi, Rabishaqi gettiton biich gettiyeete.