2 Taateenaꞌo 17 - Kafa Linguistics Project

Ciireexi Israꞌeelee Taatoo Hosheehi Mooyo

¹ Yihudee taatoo Akaazi taateti aaraa guttinnee natooba, Elaahi bushoo Hosheehi Shamaaraa Israꞌeeleenaꞌo toommooch taateꞌi, yiixiye naton qeejjiye.

² Biyoo Doono Yeeri aafooch gonde mooyon tuniihe. Tunebaani bi tuniito, biyee aafi Israꞌeelee taateenaꞌochoommon toonoone.

³ Asooree taatoo Shalimaniseeri biin kocha waahe. Hosheehi biich hajjeehe; biichoo gibiroon qocciye.

⁴ Tunebaani Asooree taatoo, Hosheehi waanee gondoon danehe. Ebiyoo Gibitsee taatoo Sooꞌi biin gaachemmoyich wocheyechinaꞌon bi daachiyoonaa nati natona bi qocciibeeti gibiroon Asooree taatoyich qoco bi qayonane. Ebichi naboona Asooree taatoo biin yechiꞌi cuyee kexooch giijjiye.

⁵ Aroochee Asooree taatoo showoo bullin kochiye. Shamaara waaꞌi, keejje naton giichiye.

⁶ Hosheehi taateti yiixiyinnee natooba, Asooree taatoo Shamaarin yechiye. Israꞌeeleenaꞌonoo kecciꞌi, Asooree showooch daammiye. Boonoshinoo Halaahi katemooch, Gozaani woraafee daggooch beeti Haboori aachi gaꞌooch, wotta Meedee showeexi katemeenaꞌooch boonoshi kotemmoyich tuniihe.

Israꞌeeleenaꞌo Boonoshi Axaaxee Naboona Kecco

⁷ Ebi bulli Israꞌeeleenaꞌo toommooch bi tuneto, Gibitsee showoochee, Gibitsee taatoo Faroonichi kishoochee boonoshin kichiti boonoshi Nuggishoo Doono Yeerin boonoshi xuqqitoyichiye; bare nuggisheenaꞌoyichoo boonoshi goyinnee maddetoyichiye;

⁸ Doono Yeeri Israꞌeeleenaꞌo aafoochee yookkii kichiti aageteenaꞌo doyoonaa Israꞌeelee taateenaꞌo dojjiti doyoonon boonoshi dabbitoyichiye.

⁹ Israꞌeeleenaꞌo boonoshi Nuggishoo Doono Yeerichi qaaroon xummiyoona kaamoo tuneyaanee mooyon aashoona shuuneꞌi biin xuqqiyeete. Qiddeenaꞌochi dilaaloochee tiijjii, xaqqee uxerechi ooge boonoshi katemooch beddaahaa, boonoshi katemeenaꞌo bulliich boonoshi qellich guudi toommeexi goyinnee xaaꞌeenaꞌon shuuneheete.

¹⁰ Geppoo bulli toommonaa waajjechi michi baatoo bullinooch, boonoshi qellich goyinnee xaqqee giimbeenaꞌonaa Asheeri misileenaꞌonon neechiyeete.

¹¹ Doono Yeeri boonoshi aafoochee yookkii kichiti aageteenaꞌo tuniitoommon, guudi toommeexi goyinnee xaaꞌeenaꞌo bulliichaa ixaanoon shookkii beeheete; gonde mooyon tuniibee Doono Yeerin ippii beeheete;

¹² Doono Yeeri bajjiti, shahalleenaꞌoyich goyinnee maddeheete.

¹³ Doono Yeeri, “Gonde ittoshi gommoochee wottebote. Ittoshi qaabbechinaꞌoyich ta getteti sheeroo bulliyoommon, keemechi ta guuninaꞌona ittoshich ta deejjiti ta getoonaa ta qociyoonon quyebote” iꞌi bi wocheyechinaꞌo bullinaa bi keemechinaꞌo bullina Israꞌeeleenaꞌonaa Yihudee asheenaꞌonoyich kupphiiꞌi gettitone.

¹⁴ Tunebaani boonoshi Nuggishoo Doono Yeerin gibeneyaani boonoshi qaabbechinaꞌochoommon babbereheetani, waayeyaaneenaꞌone.

¹⁵ Bi qociyoon, boonoshi qaabbechinaꞌona tookkii bi giyiti wogoonaa boonoshich wochii wochii kupphii bi gettiti qaaroonon hoxeheete; gaacaalli shahalleenaꞌoyich goyinnoona boonoshiyoo gaacaalleenaꞌo tuneheete. Doono Yeeri boonoshichoommon boonoshi tuniyaachemmoyich, boonoshich bi gettiti, boonoshi guudoona beeti aageteenaꞌon dabbiyeete.

¹⁶ Boonoshi Nuggishoo Doono Yeerichi geto bullin qajjiyeete; boonoshi qellich aachoon ukkii, gutte maanji misiloon shuuneheete. Nuggishee Asheeri misiloon shuuneheete; shimaajji xojjenoyich goyinneheete; Baꞌaaloyichoo maddeheete.

¹⁷ Boonoshi anaami bushiisheenaꞌonaa maache bushiisheenaꞌonon michii deejjiyeete; qaaxechinaꞌonaa kaayechinaꞌonon tuneheete; gonde mooyon tuniyoyich boonoshi qelloon beshii imona Doono Yeerin ippiiheete.

¹⁸ Ebich Doono Yeeri boonoshin oogichii kaarehe; Yihudi yoodoon baach echiichii, Israꞌeeleenaꞌon bi aafoochee wokkiihe.

¹⁹ Yihudee asheenaꞌoo wotta Israꞌeeleenaꞌo boonoshin dojjiti doyeenaꞌon dabbiyeetani, boonoshi Nuggishoo Doono Yeerichi getoon quyeyaaneenaꞌone.

²⁰ Doono Yeeri Israꞌeelee shiijjeroo bullin qajjiye; boonoshinoo xuuxiihe; bi aafoochee boonoshin bi yookkimmi wottoon, boggechinaꞌo kishooch boonoshin beshiiꞌi immiye.

²¹ Israꞌeeleenaꞌon Daawitichi yareenaꞌoyee bi bariitoyee gubb, boonoshi Nebaaxi bushoo Yeroboꞌamin taatiiheete. Yeroboꞌamiyoo Israꞌeeleenaꞌo Doono Yeerin boonoshi dabbaachemmoyich tuniyoona ooge axaaxoon boonoshi shuunemmoyich tuniihe.

^22-23 Israꞌeeleenaꞌo Yeroboꞌami tuniiti axaaxoo bullin dabbiyeete. Doono Yeeri bi guuninaꞌo tuneti bi keemechinaꞌo bullina bi gettitoommon, Israꞌeeleenaꞌon bi aafoochee bi wokkiimmi wottoon, are axaaxoochee wohaaneenaꞌone. Ebich Israꞌeeleenaꞌo boonoshi hajjee showoochee kecaa hammiꞌi hanaach beddaahaa Asooree showooch beetinaꞌone.

Asooreenaꞌo Shamaaree Showooch Koto

²⁴ Asooree taatoo asheenaꞌon Baablooni, Kutaahi, Awi, Hamaatinaa Sefariwayimina getteebeeti katemoochee deebiꞌi, keccii bi daammiti Israꞌeeleenaꞌochi keroon Shamaaree showeexi katemeenaꞌooch kotiihe. Boonoshiyoo Shamaaree showoon hajjiꞌi, are katemeenaꞌooch koteheete.

²⁵ Batti batt arooch boonoshi kotehooba, Doono Yeerin shataaneenaꞌone. Doono Yeeriyoo daahereenaꞌon boonoshi daggooch deejjiye. Daahereenaꞌoo boonoshi daggoochee ikkikke asheenaꞌon wuxiyeete.

²⁶ Ebiyoo Asooree taatoyich, “Daammaa Shamaaree showooch beeti katemeenaꞌooch ne kotiiti aagetee asheenaꞌo are showee nuggishoochi sheeroon ariyaaneenaꞌone. Ebich nuggishoo daahereenaꞌon boonoshi daggooch deejjiye. Ebiyoche, daahereenaꞌoo boonoshin wuxii beetinaꞌone. Ebiyoo are showee nuggishoochi sheeroon ariyoo boonoshi qajjitoyichiye” getteehe.

²⁷ Asooree taatoo, “Are showoochee keccii ittoshi deebiti, qeesheenaꞌoochee ikkoon ittoshi daachiitaa, hamiree arooch kotebe; are showee nuggishoochi sheeroon boonoshich dojjibe” iꞌi gettiye.

²⁸ Ebina Shamaaree showoochee keccii boonoshi deebiti, ikke qeeshoo waaꞌi, Beeteel kotehe. Biyoo Doono Yeerich aabichi boonoshi shattemmo gaata boonoshich dojjiye.

²⁹ Tunebaani ebi Shamaaree showooch koteti aagetee asheenaꞌo bulli boonoshi koteti katemi katemoochaa boonoshi shahalloon andoo shuunoochiye boonoshi beeto. Ebinoo wonna Shamaaree asheenaꞌo shuuneti guudi toommeexi goyinnee xaaꞌeenaꞌooch daammii neechiyeete.

³⁰ Baablooneenaꞌo Sukoot Benootichi shahalloon, Kutaaheenaꞌo Nerigalichi shahalloonaa Hamaateenaꞌo Ashiimichi shahalloonon shuuneheete;

³¹ Aweenaꞌo Nibihaazinaa Taritaakinochi shahalleenaꞌon shuuneheete; Sefariwayimeenaꞌoo Adirameleekinaa Anameleekina getteebeeti boonoshi nuggisheenaꞌoyich boonoshi bushiisheenaꞌon goggiꞌi deejjiyeete.

³² Doono Yeerichoo shattiyeete; wottoo boonoshi daggoochee guudi toommeexi goyinnee xaaꞌeenaꞌoochaa boonoshi qoodooch deejjoon deejjemmi, qeesheenaꞌon kaacciyeete;

³³ ebiyoommon Doono Yeerichoo shattii beeheete; tunebaani arooch beebee boonoshi waati boonoshi showee doyoommona boonoshi hajjee nuggisheenaꞌoyichoo goyinnee beeheete.

³⁴ Hanaach beddaahaa aafi boonoshi doyoommon tunii beetinaꞌone. Doono Yeerich goyinneyaaneenaꞌone. Israꞌeeli iꞌi Doono Yeeri shigiiti Yaaqobichi yareenaꞌoyich bi gettiti qociyoon, doyoon, sheeroonaa getoonon dabbaaneenaꞌone.

³⁵ Doono Yeeri boonoshina tookkii wogoon giyiꞌi boonoshich ishichii gettitone: “Bare nuggisheenaꞌoyich goyinneyaahote; boonoshich maddeyaahote; boonoshich deejjiyaahote.

³⁶ Tunebaani ooge ta hakkoonaa giidechi ta mochoona Gibitsee ittoshin kichiti Doono Yeeri taan shatote; taach goyinnebote; taach deejjoon giddiibote.

³⁷ Ittoshich ta kooriti doyeenaꞌonaa qociyeenaꞌonon, sheeroonaa getoonon bulli aaboon kupphii quyebote; bare nuggisheenaꞌoyich goyinneyaahote.

³⁸ Ittoshina tookkaa ta giyeti wogoon batteyaahote; bare nuggisheenaꞌoyichoo goyinne maddeyaahote.

³⁹ Tunebaani ittoshi Nuggishoo Doono Yeeri taan shatote; tawoo ittoshi etteenaꞌo bulli kishoochee ittoshin wodiyemmo taane” iye.

⁴⁰ Tunebaani wonnee boonoshi doyoommon tuniiheetani, waayeyaaneenaꞌone.

⁴¹ Ebi aagetee asheenaꞌo Doono Yeerin shattii beeheete; wotta qiicaa shuuneeti boonoshi shahalleenaꞌoyichoo ikke baddaa goyinnee beeheete; ebiyoommon boonoshi bushiisheenaꞌonaa boonoshi bushaa bushiisheenaꞌona hanaach beddaahaa boonoshi qaabbechinaꞌo tuniitoommon, tunii beetinaꞌone.